កំពង់ធំ: ចៅក្រមស៊ើបសួរសាលាដំបូងខេត្តកំពង់ធំកំពុងសាកសួរសាក្សី និងអ្នកពាក់ព័ន្ធក្នុងសំណុំរឿងចោទប្រកាន់លោក ម៉ៅ ប៊ុនធូរ នាយកទីចាត់ការអន្តរវិស័យនៃសាលាខេត្តកំពង់ធំ ជុំវិញបទល្មើសមួយចំនួនក្នុងនោះក៏មានករណីបង្ខាំងមនុស្សខុសច្បាប់ផងដែរ ខណៈបក្ខពួកគាត់ម្នាក់ទើបត្រូវបានសាលាដំបូងខេត្តឃុំខ្លួនបណ្ដោះអាសន្ន។
លោក សាយ វាសនា ព្រះរាជអាជ្ញារងនៃអយ្យការអមសាលាដំបូងខេត្តកំពង់ធំបានបញ្ជាក់ប្រាប់ភ្នំពេញប៉ុស្ដិ៍ពីម្សិលមិញថា លោកបានបញ្ជូនសំណុំរឿងលោក ម៉ៅ ប៊ុនធូរ ទៅចៅក្រមស៊ើបសួរ ផូង វណ្ណ កាលពីថ្ងៃទី ២៦ ខែសីហា ដើម្បីពិនិត្យសម្រេចជុំវិញបទល្មើសចាប់ឃុំឃាំង និងបង្ខាំងមនុស្សដោយខុសច្បាប់, បទកំហែងយក និងបទជ្រៀតជ្រែក ដោយខុសច្បាប់ទៅក្នុងការបំពេញមុខងារសាធារណៈ។
លោកបញ្ជាក់ថា៖ «ករណីលោក ម៉ៅ ប៊ុនធូរ ខ្ញុំបានបញ្ជូនសំណុំរឿងហ្នឹងទៅលោកចៅក្រមគាត់ពិនិត្យហើយព្រោះគាត់ជាប់ពាក់ព័ន្ធសំណុំរឿងហ្នឹងដែរ។ ចៅក្រមគាត់ មានពេលវេលាច្រើនសម្រាប់ស៊ើបអង្កេតស្រាវជ្រាវថា តើគាត់ជាប់ពាក់ព័ន្ធយ៉ាងណា ឬអ្នកណាខ្លះពាក់ព័ន្ធថែមទៀត បច្ចុប្បន្នលោកចៅក្រមកំពុងសាកសួរសាក្សី និងអ្នកពាក់ព័ន្ធមួយចំនួន»។
លោកបន្ថែមថា ចំពោះលោក អ៊ុច វណ្ណារិទ្ធ ដែលជាបក្ខពួកលោក ម៉ៅ ប៊ុនធូរ ត្រូវបានសមត្ថកិច្ចឃាត់ខ្លួនបញ្ជូនមកសាលាដំបូងខេត្តកំពង់ធំកាលពីថ្ងៃទី ២៥ ខែសីហា ហើយត្រូវតុលាការសម្រេចឃុំខ្លួនកាលពីថ្ងៃទី ២៦ ខែសីហា ដោយចោទពីបទ «ចាប់ឃុំឃាំង និងបង្ខាំងមនុស្សដោយខុសច្បាប់, បទកំហែងយក និងបទជ្រៀតជ្រែកដោយខុសច្បាប់ទៅក្នុងការបំពេញមុខងារសាធារណៈ»។
តាមដីកាបញ្ជាឲ្យចូលខ្លួនរបស់លោក សាយ វាសនា ចុះថ្ងៃទី ២៥ ខែសីហា បានឲ្យដឹងថា កាលពីថ្ងៃទី ១ ខែ កក្កដា ឆ្នាំ ២០២០ ឈ្មោះ ម៉ៅ ប៊ុនធូរ និងឈ្មោះ អ៊ុច វណ្ណារិទ្ធ ព្រមទាំងបក្ខពួកបានបើករថយន្តទៅចាប់ខ្លួនជនរងគ្រោះម្នាក់ឈ្មោះ ញឹម មុល ភេទប្រុស ខណៈជនរងគ្រោះកំពុងជិះម៉ូតូយកបាយទៅឲ្យអ្នកបើកបរត្រាក់ទ័រកាយដីប្រឡាយម្នាក់នៅចំណុចបឹងផ្គរលាន់ក្នុងសង្កាត់ស្រយូវព ក្រុងស្ទឹងសែន ខេត្តកំពង់ធំ។
ដីកាបន្តថា បន្ទាប់ពីឃាត់ខ្លួនឈ្មោះ ញឹម មុល ក្រុមជនសង្ស័យបានបន្តទៅចាប់ខ្លួនឈ្មោះ ជុត ថាន និងឈ្មោះ យក់ គុត ដែលជាអ្នកបើកបរត្រាក់ទ័របន្ថែមទៀត។ ក្នុងនោះបានរឹបអូសយកត្រាក់ទ័រ ២ គ្រឿង, ម៉ូតូ ១ គ្រឿង និងទូរស័ព្ទ ២ គ្រឿង ប៉ុន្ដែក្នុងកំណត់ហេតុដកហូតជូនទៅខណ្ឌរដ្ឋបាលជលផលខេត្តកំពង់ធំគឺមានតែត្រាក់ទ័រ ២ គ្រឿងប៉ុណ្ណោះ រីឯវត្ថុតាងផ្សេងៗទៀតគ្មានកត់ចូលក្នុងរបាយការណ៍ទេ។
ដីកាបន្តថា ក្រោយពីពិនិត្យសំណុំរឿង និងវត្ថុតាងនេះបង្ហាញថា ឈ្មោះ ញឹម មុល, ឈ្មោះ ជុត ថាន និងឈ្មោះ យក់ គុត ពុំបានជីករណ្ដៅ ឬកាយប្រឡាយខុសច្បាប់ទេ។ ឈ្មោះ ញឹម មុល គ្រាន់តែជាអ្នកយកបាយឲ្យកម្មករបើកបរត្រាក់ទ័រកាយប្រឡាយប៉ុណ្ណោះ។
ចំណែកត្រាក់ទ័រយកទៅកាយប្រឡាយដែលមានឈ្មោះ យក់ គុត និងឈ្មោះ ជុត ថាន ជាអ្នកបើកបរគឺជារបស់ក្រុមហ៊ុន ប៊ី វី ប៊ី តែមិនបានជីកប្រឡាយថ្មីខុសច្បាប់ទេ ហើយក៏មិនមែនធ្វើលើដី ឈ្មោះ អ៊ុច វណ្ណារិទ្ធ ឬរបស់អ្នកផ្សេងដែរ។ ពិសេសក្រុមស្ដារប្រឡាយនេះគឺមានការឯកភាពពីលោក ម៉ាក់ ប៊ុនហុង អភិបាលក្រុងស្ទឹងសែន, លោក យូ ឡា ប្រធានមន្ទីរធនធានទឹក និងឧតុនិយមខេត្តកំពង់ធំ និងលោក សុខ លូ អភិបាលខេត្តកំពង់ធំ ត្រឹមត្រូវតាមច្បាប់ទាំងអស់។
ដីកាបញ្ជាក់ថា ដូច្នេះអំពើរបស់ឈ្មោះ អ៊ុច វណ្ណារិទ្ធ ភេទប្រុសអាយុ ៣២ ឆ្នាំ និងឈ្មោះ ម៉ៅ ប៊ុនធូរ គឺជាបទល្មើស «ចាប់ឃុំឃាំង និងបង្ខាំងមនុស្សដោយខុសច្បាប់, បទកំហែងយក និងបទជ្រៀតជ្រែកដោយខុសច្បាប់ទៅក្នុងការបំពេញមុខងារសាធារណៈ» ដែលមានចែងឲ្យផ្ដន្ទាទោសតាមបទប្បញ្ញត្តិមាត្រា ២៥៣, មាត្រា ៣៦៣, មាត្រា ៣៦៤ និងមាត្រា ៦០៩ នៃក្រមព្រហ្មទណ្ឌឆ្នាំ ២០០៩។
លោក ញឹម មុល, លោក យក់ គុត និងលោក ជុត ថាន ដែលត្រូវបានក្រុម ម៉ៅ ប៊ុនធូរ និងឈ្មោះ អ៊ុច វណ្ណារិទ្ធ ចាប់ឃុំខ្លួនរយៈពេល ២ យប់ ២ ថ្ងៃដោយគ្មានបញ្ជាក់ពីមូលហេតុ មិនអាចស្វែងរកប្រភពទាក់ទងសុំការបញ្ជាក់បន្ថែមជុំវិញករណីនេះបានទេកាលពីម្សិលមិញ។
លោក យូ ឡា ប្រធានមន្ទីរធនធានទឹក និងឧតុនិយមខេត្តកំពង់ធំបានថ្លែងពីថ្ងៃទី ៣១ សីហា ថា ជនរងគ្រោះទាំង ៣ នាក់ ពិតជាបានសុំច្បាប់ និងស្នើសុំការឯកភាពពីមន្ត្រីជំនាញ ក៏ដូចជាអាជ្ញាធរមូលដ្ឋានត្រឹមត្រូវ ប៉ុន្ដែលោកមិនបានដឹងថាក្រុមលោក ម៉ៅ ប៊ុនធូរ ចាប់បង្ខាំងពួកគេដោយគ្មានបញ្ជាក់ពីមូលហេតុច្បាស់លាស់បែបនេះទេ។
លោកបន្តថា ប្រឡាយនៅចំណុចបឹងផ្គរលាន់នេះត្រូវបានពលរដ្ឋ និងអាជ្ញាធររៀបចំគម្រោងស្នើសុំការឯកភាពពីអាជ្ញាធរគ្រប់ជាន់ថ្នាក់ ដើម្បីស្ដារឡើងវិញ ព្រោះវាជាប្រឡាយចាស់ រាក់ និងមិនអាចផ្ទុកទឹកសម្រាប់ប្រើប្រាស់ដល់រដូវប្រាំងបាន។ រីឯក្រុមហ៊ុន ប៊ី វី ប៊ី បានជួយស្ដារប្រឡាយនេះដោយមិនគិតកម្រៃសេវាទេ ប៉ុន្ដែពេលនេះទើបតែស្ដារបានជាង ១០០ ម៉ែត្រប៉ុណ្ណោះ ខណៈប្រឡាយទាំងមូលមានប្រវែងជាង ១ ០០០ ម៉ែត្រ។
លោកថា៖ «ខ្ញុំអត់ដឹងពីនីតិវិធីរបស់តុលាការមានចំណាត់ការទៅលើឈ្មោះ ម៉ៅ ប៊ុនធូរ ឬឈ្មោះ អ៊ុច វណ្ណារិទ្ធ យ៉ាងណាទេ ប៉ុន្ដែគ្រាន់តែដឹងថា ជនរងគ្រោះទាំង ៣ នាក់នេះបានសុំច្បាប់ត្រឹមត្រូវ ហើយក៏មានការដឹងឮពីអាជ្ញាធរដែរ»។
លោក ម៉ៅ ប៊ុនធូរ នាយកទីចាត់ការអន្តរវិស័យនៃរដ្ឋបាលខេត្តកំពង់ធំបានថ្លែងនៅថ្ងៃទី ០២ ខែកញ្ញាថា ក្នុងប្រតិបតិ្តការនេះ ក្រោមការបញ្ជាពីអភិបាលខេត្តលោក សុខ លូ និងមន្ត្រីជំនាញរដ្ឋបាលជលផលខេត្តកំពង់ធំ ដោយមិនមែនលោកជាអ្នកដឹកនាំកម្លាំងទៅធ្វើសកម្មភាពទេ ដោយគ្រាន់តែចូលរួមជាមួយមន្រ្តីក្នុងនាមជាសមាជិកគណៈបញ្ជាការឯកភាពខេត្តកំពង់ធំ។
ករណីនេះ ពលរដ្ឋម្នាក់ឈ្មោះ អ៊ុច វណ្ណារិទ្ធ បានរាយការណ៍ថា មានការរំលោភបំពានព្រៃលិចទឹកនៅតំបន់ខាងលើនេះ ទើបមន្រ្តីជំនាញនៃរដ្ឋបាលជលផលខេត្តកំពង់ធំដឹកនាំកម្លាំងចម្រុះចុះទៅបង្រ្កាបនៅចំណុចប្រឡាយផ្ទរលាន់នោះ បន្ទាប់ពីឃាត់ខ្លួនមនុស្សម្នាក់នេះ មន្រ្តីជំនាញបានបញ្ជូនទៅស្នងការដ្ឋាននគរបាលខេត្តកំពង់ធំ ដើម្បីសាកសួរតាមនីតិវីធីច្បាប់។
លោកបន្តថា ខណៈកំពុងសាកសួរលោកបានត្រឡប់មកផ្ទះវិញមុនគេ ដោយសារលោកមិនមែនជាមន្រ្តីជំនាញចាត់ចែងក្នុងករណីនេះ ប៉ុន្ដែមន្រ្តីរដ្ឋបាលជលផលជាចាត់ចែងសំណុំរឿងនេះ។ ចំពោះវត្ថុតាងនានា មន្រ្តីរដ្ឋបាលជលផលបាននាំយកមករក្សាទុកនៅស្នងការដ្ឋាននគបាលខេត្ត ដោយលោកមិនបានពាក់ព័ន្ធទេ។
លោកបញ្ជាក់ថា៖ «ខ្ញុំបានដឹងថា សំណុំរឿងខ្ញុំនេះគេបញ្ជូនទៅចៅក្រមស៊ើបសួរហើយ ហើយខ្ញុំក៏បានចូលបំភ្លឺនៅថ្ងៃទី ០១ ខែកញ្ញា រួចរាល់ហើយដែរ ប៉ុន្ដែតុលាការបានឲ្យខ្ញុំត្រឡប់មកផ្ទះវិញ។ ខ្ញុំមិនមានការបារម្ភអ្វីទេ ព្រោះខ្ញុំមិនបានធ្វើដូចការចោទប្រកាន់ ហើយទុកលទ្ធភាពឲ្យតុលាការចាត់ចែងតាមនីតិវិធីច្បាប់»៕