ភ្នំពេញ៖ អភិបាលរាជធានីភ្នំពេញ លោក ឃួង ស្រេង បញ្ជាឲ្យអាជ្ញាធរដែនដីមានវិធានការចំពោះអ្នកចាក់ដីរំលោភលើប្រឡាយលូ ៥ និងត្រូវរុះរើការរំលោភនោះចេញវិញ ចៀសវាងការមានវិធានការតាមផ្លូវច្បាប់ ខណៈរដ្ឋបាលរាជធានីភ្នំពេញគ្រោងនឹងបង្កើតគណៈកម្មការមួយ ដើម្បីដោះស្រាយជុំវិញបញ្ហានេះ។
ការដាក់បញ្ជានេះ បានធ្វើឡើងកាលពីថ្ងៃទី ៨ កក្កដា អំឡុងពេលលោក ឃួង ស្រេង ដឹកនាំមន្ត្រីជំនាញចុះត្រួតពិនិត្យស្ថានីយបូមទឹកលូ ៥ ស្ថិតក្នុងសង្កាត់ស្ទឹងមានជ័យ ៣ ខណ្ឌមានជ័យ ដែលបានសាងសង់រួចរាល់។ នេះបើតាមការចុះផ្សាយរបស់ក្រសួងព័ត៌មាន។
លោក ឃួង ស្រេង និយាយថា ប្រឡាយបង្ហូរទឹកមានសារប្រយោជន៍យ៉ាងខ្លាំងសម្រាប់ប្រជាពលរដ្ឋ ដែលអាចរំដោះទឹកលិចលង់លំនៅឋានរបស់ប្រជាពលរដ្ឋ ដែលរស់នៅទីក្រុងបានយ៉ាងប្រសើរ។
លោកបន្តថា មន្ត្រីពាក់ព័ន្ធអាជ្ញាធរដែនដីត្រូវកំណត់ឲ្យបានច្បាស់ពីដីសាធារណៈរបស់រដ្ឋ និងដីជាកម្មសិទ្ធិរបស់ប្រជាពលរដ្ឋ។ ព្រោះប្រឡាយនេះ កំពុងត្រូវបានប្រជាពលរដ្ឋមួយចំនួនសង់លំនៅឋានរំលោភ ដោយការចាក់ដីបំពេញប្រឡាយ យកជាកម្មសិទ្ធិ។
លោកបញ្ជាក់ថា៖ «ហើយការងារបន្ទាប់ រដ្ឋបាលរាជធានីភ្នំពេញនឹងបង្កើតឲ្យមានក្រុមការងារមួយ ដែលមានការចូលរួមពីការិយាល័យសូរិយោដីខណ្ឌ មន្ទីរសាធារណការនិងដឹកជញ្ជូនរាជធានីភ្នំពេញ ដើម្បីចុះបាញ់ថ្នាំកំណត់ទីតាំងឱ្យបានច្បាស់ និងធ្វើការណែនាំប្រជាពលរដ្ឋដែលរំលោភប្រឡាយខាងលើឲ្យរុះរើចេញ»។
លោក អ៊ុម ហឿង ចៅសង្កាត់ស្ទឹងមានជ័យទី៣ ប្រាប់ភ្នំពេញប៉ុស្តិ៍ នៅថ្ងៃនេះថា ប្រឡាយលូ ៥ នេះ មានទទឹង ៥០ ម៉ែត្រ ដោយគម្រោងនៃការអភិវឌ្ឍ គ្រោងនឹងធ្វើផ្លូវសងខាងប្រឡាយ។ លោកថា ដោយសារតែសាលារាជធានីភ្នំពេញ ទើបដាក់ចេញនូវវិធានការនេះ ដូច្នេះ មកដល់ពេលនេះ មិនទាន់មានការរុះរើណាមួយកើតឡើងនោះទេ ដោយគ្រាន់តែមានប្រជាពលរដ្ឋមួយចំនួន បានយល់ព្រមផ្តិតមេដៃលើឯកសារ ដែលអាជ្ញាធរចុះស្រង់ស្ថិតិ ខណៈពលរដ្ឋមួយចំនួនទៀត បានបដិសេធ។
លោកចៅសង្កាត់បានឲ្យដឹងថា តាមការស្រង់ស្ថិតិនៅក្នុងសង្កាត់របស់លោក គឺមានប្រជាពលរដ្ឋចំនួន ៩៧ ខ្នងផ្ទះ ដែលរកឃើញថា បានរំលោភលើប្រឡាយលូ ៥ នេះ ហើយក្នុងនោះមាន ៣៨ ខ្នងផ្ទះ ត្រូវបានប្រកាសឲ្យរុះរើផ្ទះចេញ។
លោកបញ្ជាក់ថា៖ «តាមប្រឡាយនេះ គឺមានភូមិ ២ ដែលពាក់ព័ន្ធ គឺភូមិឫស្សី ១ និងឫស្សី ២ ហើយបានឲ្យមន្ត្រីស្រង់ស្ថិតិហើយ។ បើនិយាយឲ្យមែនទែនទៅ ការរស់នៅរបស់ពួកគាត់ គឺកើតមានយូរហើយ គឺជាង ១០ ឆ្នាំមកហើយ គ្រាន់តែថ្មីនេះ មានការរំលោភថ្មីខ្លះៗ ដោយសារតែពួកគាត់សង់បន្តគ្នា ឃើញអ្នកចាស់ធ្វើ ក៏ធ្វើដែរ ហើយឃាត់យ៉ាងណាក៏មិនស្តាប់»។
លោក អ៊ុម ហឿង រំពឹងថា សាលារាជធានីភ្នំពេញនឹងបង្កើតគណៈកម្មការដោះស្រាយដោយយុត្តិធម៌ និងមានវិធានការដ៏ត្រឹមត្រូវនៅក្នុងរឿងនេះ ដើម្បីចៀសវាងការកើតទុកមិនសុខចិត្តពីសំណាក់ពលរដ្ឋមួយចំនួន ដែលនាំឲ្យកើតមានការតវ៉ានៅពេលខាងមុខ។
លោក ឡុង សាក់ ប្រជាពលរដ្ឋម្នាក់ ដែលមានដីជាប់ប្រឡាយនេះប្រាប់ភ្នំពេញប៉ុស្តិ៍ ថ្ងៃនេះដែរថា ពីដើមឡើយប្រឡាយនេះមានទំហំធំ ហើយពលរដ្ឋក៏បានរស់នៅតាមប្រឡាយនេះ យូរឆ្នាំហើយដែរ។
ប៉ុន្តែលោកថា ការដែលឃើញប្រឡាយមានលក្ខណៈតូចជាងមុន ក៏ព្រោះតែក្រុមហ៊ុនដែលបានសាងសង់ជាបុរី បានចាក់រំលោភចូលប្រឡាយ ហើយនៅពេលមានជាបញ្ហា គឺត្រូវធ្លាក់មកលើប្រជាពលរដ្ឋ ដែលផ្ទះរបស់ពួកគាត់ មិនបានចាក់ដីធ្វើគ្រឹះត្រឹមត្រូវ។
លោក សាក់ បញ្ជាក់ថា៖ «ពីដើមឡើយ ដូចខ្ញុំថាអ៊ីចឹង ប្រជាពលរដ្ឋយើងខាងណេះ មិនមានការទន្ទ្រានយកប៉ុន្មានទេ គឺខ្លាំងៗខាងបុរីឯណោះ ដែលចាក់ដីលុបចូលមកប្រឡាយហ្នឹង ហើយធ្វើផ្លូវស្អាតទៅ។ បើគ្រាន់តែធ្វើប្រឡាយ ត្រឹម ១០ ម៉ែត្រ មិនគួរណាឲ្យប្រជាជនរុះរើទេ ព្រោះប្រជាជនមានដីតែប៉ុណ្ណឹងសង់ផ្ទះ ហើយបើឲ្យរើចេញគាត់មានដីឯណា?»។
តាមការចុះផ្សាយរបស់ក្រសួងព័ត៌មានបានឲ្យដឹងថា ស្ថានីយបូមទឹកលូ ៥ នេះ មានទីតាំងស្ថិតនៅចំណុចមុំបី ចំណុចប្រសព្វ ៣ ខណ្ឌ គឺខណ្ឌមានជ័យ ពោធិ៍សែនជ័យ និងខណ្ឌដង្កោ។ ប្រឡាយនេះមានតួនាទីយ៉ាងសំខាន់ក្នុងការរំដោះទឹកជំនន់ទឹកភ្លៀងចេញពីតំបន់ជាច្រើននៅក្នុងខណ្ឌទាំង ៣ នេះតែម្តង។ ស្ថានីយបូមទឹក និងប្រឡាយនេះ ក៏ជាទីតាំងយុទ្ធសាស្ត្រមួយ ក្នុងការបូមទឹកចេញពីតំបន់ខាងកើតព្រលានយន្តហោះ តំបន់ចោមចៅ តំបន់ត្រពាំងថ្លឹង ភូមិគោកបញ្ជាន់ តំបន់ផ្សារស៊ិនជូរីផ្លាហ្សា តំបន់ថ្មគោល ផ្លូវ ២០០៤ និងមួយផ្នែកទៀតពីសង្កាត់ទឹកថ្លា ខាងត្បូងមហាវិថីសហព័ន្ធរុស្ស៊ី ដែលមានទំហំផ្ទៃរងទឹកភ្លៀងរហូតដល់ ១ ០២៨ ហិកតា។
ក្រសួងព័ត៌មានដដែលឲ្យដឹងទៀតថា ស្ថានីយបូមទឹកលូ ៥ ត្រូវបានសាងសង់ឡើងជាអគារថ្មី មានបណ្តោយ ១៨,៩ ម៉ែត្រ ទទឹង ១០,៩ ម៉ែត្រ បំពាក់បំពង់បូមទឹក ៤ គ្រឿង។ ក្នុងនោះ បំពង់ មុខកាត់ ៨ តឹក ២ គ្រឿង និងបំពង់មុខកាត់ ១ ម៉ែត្រចំនួន ២ គ្រឿង ដែលអាចមានសមត្ថភាពបូមទឹកបាន ៥ ម៉ែត្រគុបក្នុងមួយវិនាទី និងស្មើនិង ២៨ ៨០០ ម៉ែត្រគុប ក្នុង ១ ម៉ោង។ ប្រឡាយនេះនាំទឹកហូរទៅប្រឡាយម័រ បន្តទៅជើងឯក និងបន្តទៅស្ទឹងជ្រៅ ខេត្តកណ្តាលទើបហូរចូលទន្លេ៕