The Phnom Penh Post Search

Search form

Logo of Phnom Penh Post newspaper Phnom Penh Post - ចៅ​អធិការ​ម្នាក់​​រំលោភ​កូន​នេន​ ១០ ​អង្គ​ត្រូវ​ជាប់​ខ្នោះ




ចៅ​អធិការ​ម្នាក់​​រំលោភ​កូន​នេន​ ១០ ​អង្គ​ត្រូវ​ជាប់​ខ្នោះ

Content image - Phnom Penh Post
សមត្ថកិច្ចសួរចម្លើយសង្ឃ​បរាជិក ក្នុង​ស្រុក​ក្រឡាញ់ កាល​ពី​ម្សិលមិញ។ រូបថត សហការី

ចៅ​អធិការ​ម្នាក់​​រំលោភ​កូន​នេន​ ១០ ​អង្គ​ត្រូវ​ជាប់​ខ្នោះ

សៀមរាបៈ នគរបាល​ប្រឆាំង​ការ​ជួញ​ដូរមនុស្ស​ ខេត្ត​សៀមរាប កាល​ពី​ម្សិលមិញ​ បាន​ឃាត់​ខ្លួន​ជន​សង្ស័យ​ម្នាក់​ដែល​ជា​​អតីត​​ចៅអធិការវត្ត​ ​បន្ទាប់​ពី​គណៈសង្ឃ​ខេត្ត​ចាប់​ផ្សឹក​ ក្នុង​រឿង​ចាប់​​រំលោភ​សេព​ មេថុន​ លើ​​លោក​នេន​ក្មេងៗ​ចំនួន​ ១០ អង្គ នៅ​ក្នុង​វត្ត​ រតនៈមុនី​រោងគោ ស្ថិត​ក្នុង​ឃុំ​រោង​គោ ស្រុក​ក្រឡាញ់។

លោក ជា ហេង នាយរង​ការិយាល័យ​ប្រឆាំង​ការ​ជួញ​ដូរ​មនុស្ស​ និង​ការ​ពារ​អនីតិជន​នៃ​ស្នងការ​ដ្ឋាន​នគរបាល​​ខេត្ត​សៀមរាប​ ​បាន​ឲ្យ​ដឹង​កាល​ពី​ម្សិល​មិញ​ថា ជន​ល្មើសជា​សង្ឃ​​បរាជិក គឺ​ជា​ចៅ​អធិការ​វត្ត​ខាង​លើ មាន​ឈ្មោះ វង្ស ចែត អាយុ​ ៤៦ ឆ្នាំ។ ការ​ចាប់​ផ្សឹក​នេះ បាន​ធ្វើ​ឡើង​បន្ទាប់​ពី​ ​ឪពុក​ ម្តាយ​ របស់​លោកនេន​ចំនួន​ ៩ អង្គ បាន​ដាក់​ពាក្យ​ប្តឹង​មក​សមត្ថកិច្ច​ថា​ លោក​សង្ឃ​ជា​ចៅអធិការ បាន​រំលោភ​​​នេនៗ​ទាំង​នោះ​តាម​រន្ធ​គូថ ក្នុង​រយៈពេល​ ៥ ខែ​មកនេះ។

លោក​ហេង​ បន្ត​ថា នេនៗ​បាន​ឈឺ​ចាប់​ត្រង់​រន្ធគូថ បាន​ទម្លាយ​រឿង​ប្រាប់​ថា​ចៅ​អធិការ​វង្ស ចែត ជា​អ្នក​ចាប់​បង្ខំ​រំលោភ និង​គំរាម​ថា​ នឹង​ដាក់​ទោស​ពិន័យ​ បើ​សិន​មិន​ព្រម​តាម។

កូន​នេន​​រងគ្រោះ​មាន​ព្រះជន្ម​ ពី​ ១១​ ទៅ​ ១៤ ​វស្សា​ ៥ អង្គ និង​ពី​ ១៦​ ទៅ​ ១៧ វស្សា ៥​ អង្គ ហើយ​ការ​រំលោភ​ម្តង​ចៅ​អធិការ​បាន​ផ្តល់​ប្រាក់​ឲ្យ​ចំនួន ពី ៣ ទៅ​ ១០ ម៉ឺន​រៀល»។

លោក ហេង បានឲ្យ​ដឹង​ថា សង្ឃ​ល្មើស ត្រូវ​បាន​អនុគ​ណ និង​ធម្មការ​ស្រុក​ បាន​ធ្វើការ​ផ្សឹក នៅ​ថ្ងៃទី​៨ ខែវិច្ឆិកា ហើយ​បាន​បញ្ជូន​ខ្លួន​​ មក​ប្រគល់ឲ្យ​សមត្ថកិច្ច​នៅ​ថ្ងៃ​ទី​៩ វិច្ឆិកា​ម្សិល​មិញ​។

លោក​ថា ៖ «យើង​កំពុង​ធ្វើការ​សាកសួរ ហើយ​នឹង​បញ្ជូន​ទៅ​តុលាការ​នៅ​ថ្ងៃ​ស្អែក​នេះ(ថ្ងៃ​អង្គារ) ដោយ​ចោទ​ពី​បទ​ពេស្យា​ចារ​»។

លោក សេង សុមុនី អ្នកនាំ​ពាក្យ​​ក្រសួង​ធម្មការ​ និង​សាសនា បាន​ឲ្យ​ដឹង​ថា ករណី​ចៅ​អធិការ​ល្មើស​​អង្គ​នេះ គឺ​ខុស​វិន័យ​សាសនា​ហើយ​​ក្លាយ​ជា​សង្ឃ​បរាជិក ដោយសារ​គាត់​​បាន​អស់ភេទ​ជា​សង្ឃ​ទៅ​ហើយ ដូច្នេះ នីតិវិធី​បន្ទាប់ គឺ​សមត្ថកិច្ច​នគរបា​ល ​និង​តុលា​ការ​ជា​អ្នក​ធ្វើការ​៕

អត្ថបទគួរចាប់អារម្មណ៍