ភ្នំពេញៈ ចៅអធិការវត្តពោធិ៍ចិនតុង វ៉ាន វន្នី បានលាចាកសិក្ខាបទស្ងាត់ៗបន្ទាប់ពីមានរឿងរ៉ាវទំនាក់ទំនងជាមួយស្ត្រីមា្នក់ ដែលរងការរិះគន់ពីសាធារណជនកាលពីកន្លងទៅ។ នេះបើតាមការបញ្ជាក់របស់ព្រះធម្មធរអនុគណខណ្ឌពោធិ៍សែនជ័យ ព្រហ្ម សុភី ។
កាលពីចុងខែមិថុនា ព្រះសង្ឃ វ៉ាន វន្នី ចៅអធិការវត្តពោធិសត្ថារាម ហៅវត្តពោធិ៍ចិនតុង និងស្ត្រីឈ្មោះ លីម ធីតា បានចេញមុខបដិសេធថាពួកគេមិនមានទំនាក់ទំនងស្នេហាជាមួយគ្នាទេ ហើយបានបដិសេធថា រូបដែលសាធារណជនបានឃើញនៅបណ្ដាញសង្គមហ្វេសប៊ុកដែលថតកៀកកើយគ្នា គឺជារូបកាត់ត។ ប៉ុន្តែ កាលពីម្សិលមិញ ស្ត្រីម្នាក់មានហ្វេសប៊ុកឈ្មោះ Jou Mary ដែលមានរូបថតរបស់ លីម ធីតា បានបង្ហោះសារឈឺចាប់ ព្រមទាំងបានបង្ហោះរូបលោក វ៉ាន វន្នី ទាំងនៅជាសង្ឃពាក់អាវ និងក្រោយពេលលាចាកសិក្ខាបទ។
ហ្វេសប៊ុក Jou Mary សរសេរថា៖ «អូនជាអ្នកទិញឲ្យបង តែបងគួរតែកុំទុកវាពាក់ទៀតធ្វើអីបើអូនលែងមានន័យសម្រាប់បង ហើយអរគុណគ្រប់យ៉ាងសម្រាប់ការបោកប្រាស់ អរគុណព្រហ្មលិខិតដែលធ្វើបាបខ្ញុំ។ កម្សត់កម្រជាមួយគ្នាជិត ១ ឆ្នាំ មានទាំងផ្អែមបានទាំងជូរចត់ ដោះស្រាយបញ្ហាជាមួយគ្នា។ ពេលចប់រឿងបានសឹកបងបោះបង់អូនចោល ព្រោះជឿគ្រួសារបង។ អរគុណមេរៀនជីវិត»។
ព្រះតេជព្រះគុណ ព្រហ្ម សុភី បានមានសង្ឃដីកាកាលពីម្សិលមិញថា៖ «សឹកបាត់យូរហើយតើ! សឹកហើយ! គាត់លាទៅស្រុក លាឈប់ពីតំណែងចៅអធិការ» ។
ព្រះអង្គមានសង្ឃដីកាបន្តថា៖ «លោកអត់មាននៅហ្នឹងទៀតទេ ។ ព្រោះដើម្បីកាត់បន្ថយ ចង់និយាយថារស់ដោយមន្ទិលសង្ស័យ ក្នុងលក្ខណៈដែលរូបភាពវាចេញមកបែបនេះហើយ វាមិនល្អ ។ អ៊ីចឹងអ្វីដែលលោកអាចធ្វើបានជាការទទួលខុសត្រូវមួយដែរគឺសុំលាលែងពីតំណែងជាចៅអធិការ»។
ទោះយ៉ាងណា ព្រះតេជព្រះគុណ ព្រហ្ម សុភី មិនបញ្ជាក់ថាទំនាក់ទំនងរវាងឈ្មោះ លីម ធីតា និង វ៉ាន វន្នី ជារឿងពិតឬអត់ទេ គឺជាឆន្ទានុសិទ្ធិសម្រេចរបស់អ្នកដទៃឬការគិតរបស់សាធារណជនយល់ឃើញរៀងៗខ្លួនទៅ។
ទោះយ៉ាងណា ព្រះតេជព្រះគុណ ព្រហ្ម សុភី មានសង្ឃដីកាថា៖ «អាត្មាគិតថារឿងនេះចប់ហើយ បងឯងមកសួរ វិញ។ រឿងវាអត់បានប្រយោជន៍អី រឿងក្នុងសង្គមម៉ាគរគោក បងឯងមកតាមប្រមាញ់អីរូបភាពបែបនេះ?»។
ព្រះអង្គបានពន្យល់បន្ថែមថា វាជារឿងធម្មតាទេដែលព្រះសង្ឃក៏មានកំហុសដែរ ព្រោះព្រះសង្ឃជាមនុស្ស មិនមែនជាព្រះ ហើយអ្នកកាសែតក៏មានកំហុសដែរ ។
ព្រះអង្គបន្តថា រឿងនេះមិនមែនជារឿងព្រហ្មទណ្ឌទេ លើកលែងតែមាន «ខាងប្រុសប្រកែកស្រីប្រកាន់» ហើយមានការចោទប្រកាន់គ្នាពីបទព្រហ្មទណ្ឌ។
កាលពីថ្ងៃទី ២៤ មិថុនា កន្លងទៅ មានការចុះស្រាវជ្រាវមួយដោយគណៈកម្មការបានហៅព្រះសង្ឃ វ៉ាន វន្នី និងស្ត្រីឈ្មោះ លីម ធីតា មកសួរនាំពីរឿងរូបភាពស្និទ្ធស្នាលគ្នាដែលគេបង្ហោះនៅលើបណ្ដាញសង្គម។ ប៉ុន្តែ បុគ្គលទាំង ២ បានឆ្លើយថា ពួកគេមិនដែលស្គាល់គ្នាទេ ហើយរូបដែលបង្ហោះនោះគឺជារូបកាត់ត ។
ព្រះធម្មបញ្ញា មុនី សែម សុភា ព្រះអនុគណស្តីទីខណ្ឌពោធិ៍សែនជ័យ បានស្នើឲ្យមានការផ្សព្វផ្សាយឲ្យព្រះសង្ឃប្រុងប្រយ័ត្នក្នុងការលេងហ្វេសប៊ុកដែលអាចធ្វើឲ្យប៉ះពាល់តម្លៃព្រះសង្ឃខ្មែរ។
លោក សន ជ័យ ជាប្រធានអង្គការសម្ព័ន្ធគណនេយ្យភាពសង្គមកម្ពុជាបានថ្លែងថា នៅពេលដែលមានការចេញបកស្រាយរបស់ហ្វេសប៊ុក Jou Mary បែបនេះធ្វើឲ្យគេមើលឃើញថា ការអះអាងរបស់ក្រុមការងារស៊ើបអង្កេតកន្លងមកជា «រឿងអត់ប្រយោជន៍» ហើយជាការស៊ើបអង្កេតគ្មានគុណភាព។
លោកថា ការលើកឡើងថា រូបភាពទាំងនោះជារូបភាពកាត់តនោះ ជាការលើកឡើងតាមគ្នា ជាការសន្និដ្ឋានខុស ហើយវាធ្វើឲ្យមហាជនបាត់ជំនឿ។
លោកបន្តថា រឿងបែបនេះមិនមែនតូចតាចទេ ព្រោះវាធ្វើឲ្យប៉ះពាល់ដល់សាសនារបស់រដ្ឋ។
លោកបានបន្តទៀតថា៖ «បុគ្គលទាំងឡាយណាដែលយកសាសនាទៅធ្វើផ្ដេសផ្ដាស បែបនេះ គួរតែពិនិត្យមើលវិធានការផ្លូវច្បាប់ឲ្យបានតឹងរ៉ឹង បើមិនដូច្នេះទេ ព្រះពុទ្ធសាសនាអាចអាប់ឱនដោយសារតែបុគ្គលមួយចំនួន» ៕