.jpg)
បំណែកបដិមាត្រូវបានប្រគល់ជូនអាជ្ញាធរជាតិអប្សរា។ រូបថត អាជ្ញាធរអប្សរា
សៀមរាប: បំណែកបដិមាបុរាណចំនួន ៤១ ដុំ ត្រូវបានព្រះចៅអធិការវត្តព្រះឥន្ទទេព ព្រះនាម សែម សំ ប្រគល់ជូនអាជ្ញាធរជាតិអប្សរា ដើម្បីយកទៅថែរក្សាទុកនៅទីតាំងមានសុវត្ថិភាពដោយចម្លាក់ខ្លះជាព្រះពុទ្ធបដិមាដែលនៅសល់តែព្រះភ្នែន និងបល្ល័ង្កផ្កាឈូក បន្ទាប់ពីព្រះអង្គបានប្រមូលមករក្សាទុកបណ្តោះអាសន្ននៅក្នុងបរិវេណវត្ត។
លោក សំ សារ៉េត ប្រធាននាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការនៃអាជ្ញាធរជាតិអប្សរាបានថ្លែងពីថ្ងៃទី ១៣ តុលា ថា ក្រុមមន្ត្រីជំនាញបានចុះទៅទទួលបំណែកបដិមាទាំង ៤១ ដុំ ពីព្រះចៅអធិការវត្តព្រះឥន្ទទេពព្រះនាម សែម សំ យកមករក្សាទុកនៅការិយាល័យនាយកដ្ឋាននៃអាជ្ញាធរជាតិអប្សរា ដើម្បីធ្វើការចុះបញ្ជី ថតរូប និងទុកជាឯកសារសម្រាប់ធ្វើការជួសជុលឡើងវិញ។
លោកបញ្ជាក់ថា៖ «ខ្ញុំមិនសូវដឹងច្បាស់ពីសាវតារបំណែកចម្លាក់បុរាណទាំងអស់នេះទេ គឺយើងយកមករក្សាទុកសិន ហើយចាំធ្វើការស្រាវជ្រាវជាក្រោយទៀត»។
លោក ឈូក សុម៉ាឡា មន្ត្រីក្រុមចុះបញ្ជីសារពើភណ្ឌនៃនាយកដ្ឋានអភិរក្សប្រាសាទនៃអាជ្ញាធរជាតិអប្សរាដែលជាអ្នកទៅទទួលយកបំណែកចម្លាក់បដិមាទាំងនេះមិនអាចទាក់ទងសុំការបញ្ជាក់បន្ថែមបានទេ។
ប៉ុន្ដែអាជ្ញាធរជាតិអប្សរាបានដកស្រង់សម្ដីលោកកាលពីថ្ងៃទី ១៣ តុលា ថា ក្នុងចំណោមចម្លាក់បដិមាបុរាណទាំងនេះមានមួយចំនួនធំជាព្រះពុទ្ធបដិមា ដែលនៅសល់តែព្រះភ្នែន និងបល្ល័ង្កផ្កាឈូក ចំណែកខ្លះទៀតឃើញមានត្រឹមព្រះបាទទ្រង់ឈរលើជើងទម្រប៉ុណ្ណោះ។
លោកបានបន្តថា តាមការពិនិត្យឃើញថា ព្រះពុទ្ធបដិមាទាំងនេះមានមួយចំនួនស្ថិតនៅក្នុងរចនាប័ទ្មបាយ័នប្រហែលនាចុងសតវត្សរ៍ទី ១២ ទៅដើមសតវត្សរ៍ទី ១៣ និងខ្លះទៀតស្ថិតនៅក្នុងរចនាប័ទ្មសម័យកណ្តាល ប្រហែលជានៅសតវត្សរ៍ទី ១៥ ឬ ១៦ នៃ គ.ស។ លោកបានបញ្ជាក់ថា៖ «យើងបានចុះទៅទទួលបំណែកបដិមាខាងលើមករក្សាទុកដើម្បីធ្វើការងារចុះបញ្ជី ថតរូប និងទុកជាឯកសារសម្រាប់ធ្វើការជួសជុលនៅថ្ងៃក្រោយ»។
ព្រះតេជគុណ សែម សំ មិនមានប្រភពទាក់ទងសុំការបញ្ជាក់បន្ថែមជុំវិញករណីនេះបានទេ។ ប៉ុន្តែ អាជ្ញាធរជាតិអប្សរាបានដកស្រង់សង្ឃដីកាព្រះអង្គថា ដើមឡើយបំណែកចម្លាក់ទាំង ៤១ ដុំ នេះស្ថិតនៅក្នុងសភាពរាយប៉ាយ ក្នុងបរិវេណវត្តព្រះឥន្ទទេពដែលស្ថិតនៅក្នុងតំបន់អង្គរក្រុងសៀមរាប ហើយខ្លះទៀតនៅផ្នែកខាងក្រោយនៃខឿនព្រះវិហារក្នុងវត្តព្រះឥន្ទទេព។
ព្រះតេជគុណបានមានសង្ឃដីកាថា ដូច្នេះដើម្បីឱ្យមានសុវត្ថិភាព ព្រះអង្គក៏បានប្រមូលយកមករក្សាទុកនៅក្នុងរោងផ្នែកខាងត្បូងវត្ត ការពារការបាត់បង់ និងខូចខាតដោយប្រការផ្សេងៗ៕
