The Phnom Penh Post Search

Search form

Logo of Phnom Penh Post newspaper Phnom Penh Post - ចៅ​អធិការ​មួយ​អង្គ​ប្រឈម​ការ​ចាប់​ផ្សឹក

ចៅ​អធិការ​មួយ​អង្គ​ប្រឈម​ការ​ចាប់​ផ្សឹក

ចៅ​អធិការ​មួយ​អង្គ​ប្រឈម​ការ​ចាប់​ផ្សឹក

កំពង់ស្ពឺៈ ព្រះ​ចៅ​អធិការ​វត្ដ​មួយ​អង្គ ក្នុង​ខេត្ត​កំពង់ស្ពឺ កំពុង​ប្រឈម​ការ​បណ្ដេញ​ចេញ​ពី​វត្ត បន្ទាប់​ពី​ក្រុម​អ្នក​ភូមិ​ ​រក​ឃើញ​ថា ​ព្រះ​សង្ឃ​​អង្គ​នោះ បាន​លួច​ស្លៀក​ពាក់ ក្លែង​ធ្វើ​ជា​គ្រហស្ថ ជិះ​ម៉ូ​តូ​ដើរ​ច្រៀង​ខារ៉ាអូខេ។

លោក ប្រាជ្ញ យ៉េង មេឃុំ ពោធិ៍​អង្ក្រង បាន​ថ្លែង​ពី​ម្សិល​មិញ​ថា ព្រះ​តេជ​គុណ កា ធី ព្រះ​ជន្ម​ ៣២ ​វស្សា ដែល​ជាព្រះ​ចៅ​អធិការ​វត្ត​ពោធិ៍ ស្ថិត​ក្នុង​ភូមិ​និង​ឃុំ ពោធិ៍​អង្ក្រង ស្រុក​បសេដ្ឋ ត្រូវ​​បាន​ពុទ្ធ​បរិស័ទ្ធ ចោទ​ប្រកាន់​ថា បាន​លួច​ដោះ​ស្បង់​ចីវរ ហើយ​ស្លៀក​ពាក់​ខោអាវ ជិះ​ម៉ូតូ​ដើរ​លេង​យប់ និងចូល​ច្រៀង​ខារ៉ាអូខេ ឱប​ថើប​ស្រី​ក្មេង ព្រម​ទាំង​លេង​ល្បែង​ភ្នាល់​គប់​ប៉េង​ប៉ោង។ លោក​ យ៉េង ​បន្ត​ថា៖​«​ក្រុម​ពុទ្ធបរិស័ទ្ធ​ ទាមទារ​ឲ្យ​អាជ្ញាធរ​យើង ផ្សឹក ឬ បណ្ដេញ ព្រះ​តេជ​គុណ កា ធី ចេញ​ពី​វត្ត ដោយ​ពួក​គាត់​ថា ព្រះ​សង្ឃ​អង្គ​នេះ ​បាន​ត្រូវ​អបត្តិ»។

លោក​ជុំ សា​ម៉ន ប្រធាន​ការិយាល័យ​ធម្មការ​ និង​សាសនា ស្រុក បរ​សេដ្ឋ​ឲ្យ​ដឹង​ថា ករណី​នេះ លោក​បាន​សហការ​ជា​មួយ​គណៈ​កម្មការ​អាចារ្យ​វត្ត និង​អាជ្ញាធរ​ឃុំ ស្រុក ធ្វើ​ការ​ជួប​ប្រជុំ​សួរ​ដេញ​ដោល​ព្រះ​តេជ​គុណ កា ធី ពីរ​លើក​រួច​មក​ហើយ។ ព្រះ​អង្គបាន​ទទួល​សារ​ភាព​ថា ព្រះ​អង្គ​ពិត​ជា​បាន​ស្លៀក​ពាក់ ដើរ​លេង​គប់​ប៉េង​ប៉ោង ដូច​អ្វី​ដែល​អ្នក​ភូមិ​បាន​ឃើញ​ពិត​មែន​ ប៉ុន្តែ​បាន​បដិសេធ​ថា ព្រះ​អង្គ​មិន​បាន​ចូល​ច្រៀង​ខារ៉ា​អូខេ ឱប​ស្រី​ ដូច​ការ​ចោទ​ប្រកាន់​នោះ​ទេ។

លោក​ថ្លែង​ថា​៖​«ព្រះ​អង្គ​មាន​ដីកា​ថា កាល​ដែល​ព្រះ​អង្គ​ធ្វើ​បែប​នោះ​ព្រោះ​ចង់​សប្បាយ ព្រោះ​បួស​រៀន​តាំង​ពី​ក្មេង​មក មិន​ដែល​បាន​ដើរ​លេង​សប្បាយ​ទេ»។ ដោយ​ព្រះ​អង្គ​ធ្លាប់​មាន​ស្នា​ដៃ​ ក្នុង​ការ​ចូល​រួម​អភិវឌ្ឍន៍​ភូមិ​ឃុំ ដូច​ជា​សង់​ព្រះ​វិហារ ផ្លូវ​ថ្នល់ និង​សាលា​រៀន​ទើប​ក្រុម​គណៈ​កម្មការ​អាចារ្យ​វត្ត បាន​ស្នើ​សុំ​ឲ្យ​មាន​ការ​សម្រុះ​សម្រួល ជា​មួយ​ពុទ្ធបរិស័ទ្ធ ឲ្យ​មាន​ការ​អនុគ្រោះ​កុំ​ផ្សឹក​ប៉ុន្តែ​អ្នក​ភូមិ​មិន​ព្រម។

លោក​ណុប គឹម​ស្រេង អភិបាល​ស្រុក​បរសេដ្ឋ បាន​ថ្លែង​ថា​៖​«​តាម​គំនិត​​ខ្ញុំ​ ដើម្បី​ការពារ​កុំឲ្យ​មាន​ភាព​ឆ្គាំ​ឆ្គង​ទៅ​នឹង​ធម្ម​វិន័យ​ព្រះ​ពុទ្ធ​ សាសនា មន្ត្រី​សង្ឃ ​គួរ​តែ​ផ្សឹក​ចៅ​អធិការ​វត្ត ព្រះ​នាម កា ធី ទើប​ជា​ការ​ប្រសើរ»៕

អត្ថបទគួរចាប់អារម្មណ៍