.jpg)
ដំណើរការបោះឆ្នោតក្រុមប្រឹក្សារាជធានីខេត្តកន្លងទៅ។ ហ្វេសប៊ុក
ភ្នំពេញៈ សមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ បានកើនចំនួន ៨១៩ រូបបន្ថែមទៀតសម្រាប់អាណត្តិទី ៣ ខណៈការបោះឆ្នោត នឹងប្រព្រឹត្តទៅនៅថ្ងៃអាទិត្យទី ២៦ ខែឧសភាឆ្នាំ ២០១៩។ នេះបើតាមអនុក្រឹត្យកាលពីថ្ងៃទី២៥ ខែមករា ដែលភ្នំពេញប៉ុស្ដិ៍ទើបទទួលបានកាលពីម្សិលមិញ។
ការបង្កើនសមាជិកក្រុមប្រឹក្សានេះធ្វើឡើងបន្ទាប់ពីសេចក្ដីស្នើវិសោធនកម្មច្បាប់ស្តីពីការជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ និងវិសោធនកម្មច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ត្រូវបានប្រកាសដាក់ឲ្យប្រើកាលពីពេលថ្មីៗនេះដើម្បីជួយពង្រឹងការងារ និងដោះស្រាយបញ្ហាថ្នាក់ក្រោមជាតិឲ្យមានប្រសិទ្ធភាពខ្ពស់ ស្របទៅនឹងកំណើនពលរដ្ឋនៅកម្ពុជា។
អនុក្រឹត្យដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី ២៥ ខែមករា ឆ្នាំ ២០១៩ នេះ បានឲ្យដឹងថាសមាជិកក្រុមប្រឹក្សារាជធានី និងខេត្តសម្រាប់អាណត្តិទី ៣ សរុបមាន ៥៥៩ រូប ហើយសមាជិកក្រុមប្រឹក្សាក្រុង ស្រុក ខណ្ឌ សរុបមាន ៣៥៨៤ រូប ខណៈក្រុមប្រឹក្សាឃុំ-សង្កាត់ជាអង្គបោះឆ្នោតមាន ១១ ៥៧២ នាក់។
កាលពីអាណត្តិទី ២ សមាជិកក្រុមប្រឹក្សា ក្រុង ស្រុក ខណ្ឌ សរុបមាន ២ ៩៣១ នាក់ រីឯសមាជិកក្រុមប្រឹក្សា រាជធានី ខេត្តមាន ៣៩៣ នាក់ ហើយសមាជិកក្រុមប្រឹក្សាឃុំ-សង្កាត់ ដែលជាអង្គបោះឆ្នោតមាន ១១ ៤៥៩ នាក់។
យោងតាមអនុក្រឹត្យនេះ នៅអាណត្តិទី ៣ សមាជិកក្រុមប្រឹក្សារាជធានី ខេត្ត ត្រូវកើន ១៦៦ រូប ហើយសមាជិកក្រុមប្រឹក្សាក្រុង ស្រុក ខណ្ឌ ត្រូវកើន ៦៥៣ រូប ដែលសរុប សមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ កើនឡើង ៨១៩ រូប បើប្រៀបធៀបនឹងអាណត្តិមុន។
អនុក្រឹត្យនេះ បញ្ជាក់ថា៖ «ត្រូវបានកំណត់ចំនួនសមាជិកក្រុមប្រឹក្សារាជធានី និងសមាជិកក្រុមប្រឹក្សា ខេត្តនីមួយៗសម្រាប់ អាណត្តិទី ៣ ដោយអនុលោមតាមមាត្រាទី ១៨ ថ្មី នៃច្បាប់ពីវិសោធនកម្មច្បាប់ ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ»។
អនុក្រឹត្យដដែលនេះ ក៏បានកំណត់ដែរថានៅរាជធានីភ្នំពេញ ខេត្តកណ្តាល ខេត្តកំពង់ចាម ខេត្តបាត់ដំបង ខេត្តព្រៃវែង ខេត្តសៀមរាប និងខេត្តតាកែវ តម្រូវឲ្យមានសមាជិក ២៧ រូបសម្រាប់ឈរឈ្មោះ។ រីឯខេត្តដែលមានសមាជិកក្រុមប្រឹក្សាតិចជាង គឺខេត្តមណ្ឌលគិរី ខេត្តប៉ៃលិន និងខេត្តកែប ត្រូវមានត្រឹមតែ ១៥ រូបប៉ុណ្ណោះសម្រាប់ឈរឈ្មោះ។
លោក សោម សូរីដា អគ្គលេខាធិការរងគណៈកម្មាធិការជាតិរៀបចំការបោះឆ្នោត (គ.ជ.ប) បានថ្លែងថា ការបង្កើនសមាជិកប្រឹក្សារាជធានី ខេត្ត ក្រុង ស្រុក ខណ្ឌនឹងមិនលំបាកដល់ (គ.ជ.ប) ទេ ដោយសារការអនុវត្តត្រូវធ្វើទៅតាមច្បាប់កំណត់។
លោកបញ្ជាក់ថា៖ «ការបង្កើនអាសនៈក្រុមប្រឹក្សារាជធានីខេត្ត ក្រុង ស្រុក ខណ្ឌ នេះ ពុំបង្កើនការលំបាកដល់ (គ.ជ.ប) ទេ ហើយជាទូទៅ (គ.ជ.ប) អនុវត្តភារកិច្ចរបស់ខ្លួនទៅតាមច្បាប់ជាធរមាន»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានគាំទ្រការលើកឡើងដែលថាការបង្កើនសមាជិកប្រឹក្សារាជធានី ខេត្ត ក្រុង ស្រុក ខណ្ឌ ដោយសារកំណើនប្រជាជន កំណើនសេដ្ឋកិច្ច និងដើម្បីផ្តល់នូវការងារសម្រាប់មន្ត្រីផ្សេងៗ។
លោកថា៖ «ធម្មតាប្រសិនបើការបង្កើតឡើង វាធ្វើឲ្យការងារមានប្រសិទ្ធភាពជាងមុន រាជរដ្ឋាភិបាលនឹងមិនខ្លាចបើកប្រាក់ឧបត្ថម្ភជូនពួកគាត់ប៉ុន្មាននាក់ដែលកើននោះទេ តែបើសិនបើកើនឡើងហើយប្រសិទ្ធភាពនិងលទ្ធភាពនៃការងារនៅដដែល ដូច្នេះការលើកឡើងដែលថាខាតបង់ថវិកាជាតិមិនខុសទេ»។
កាលពីថ្ងៃទី ២៦ ខែមករា ឆ្នាំនេះ គ.ជ.ប បានប្រកាសថាការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ ក្នុងអាណត្តិទី ៣ នឹងប្រព្រឹត្តទៅនៅថ្ងៃទី ២៦ ខែឧសភា ឆ្នាំ ២០១៩។ យ៉ាងណាក្ដី ចំនួន គណបក្សដែលនឹងចូលរួមបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី ៣ នេះ (គ.ជ.ប) ពុំទាន់អាចវាយតម្លៃបានទេ ដោយសារការចុះឈ្មោះគណបក្សនយោបាយនឹងធ្វើឡើងនៅថ្ងៃទី ៧ មីនា ខាងមុខនេះ។ នេះបើតាមការបញ្ជាក់ពី លោក សោម សូរីដា អគ្គលេខាធិការរង (គ.ជ.ប)។
ករណីដោយឡែក ១ ទៀត កាលពីថ្មីៗនេះ រាជរដ្ឋាភិបាលបានសម្រេចបង្កើត ក្រុង ស្រុក ខណ្ឌ ថ្មី ចំនួន ៦ បន្ថែមទៀត រួមមាននៅភ្នំពេញ បង្កើតខណ្ឌថ្មី ២ មានខណ្ឌបឹងកេងកង និងខណ្ឌកំបូល, ខេត្តព្រះសីហនុ មានក្រុងកោះរ៉ុង, ខេត្តស្ទឹងត្រែងមានស្រុកបុរីអូរស្វាយសែនជ័យ, ខេត្តកំពង់ធំ មានស្រុកតាំងគោក និងនៅខេត្តពោធិ៍សាត់ មានស្រុកតាលោសែនជ័យ៕
