ព្រៃវែងៈ ចំនួនសត្វស្លាបងាប់នៅតំបន់អភិរក្សសត្វស្លាបបឹងស្នេហ៍ ទួលពាន់តាឡី ក្នុងស្រុកបាភ្នំ ដែលត្រូវបានរកឃើញថា មានវត្តមានវីរុសគ្រុនផ្ដាសាយបក្សីបានចាប់ផ្ដើមថយចុះបន្តិចវិញ បន្ទាប់ពីមានភ្លៀង និងបន្ទាប់ពីបានងាប់ជាបន្តបន្ទាប់យ៉ាងហោចណាស់រហូតដល់ជាង ១ ៥០០ ក្បាល ចាប់តាំងពីពាក់កណ្តាលខែមីនា ឆ្នាំ ២០២១ មក។
លោក ពុធ បូ ប្រធានសហគមន៍អភិរក្សបឹងស្នេហ៍ទួលពាន់តាឡីបានប្រាប់ភ្នំពេញប៉ុស្តិ៍នៅថ្ងៃទី ៦ ខែមេសាថា ចំនួនសត្វស្លាបងាប់ក្នុងតំបន់អភិរក្សសត្វស្លាបបឹងស្នេហ៍ទួលពាន់តាឡី បានចាប់ផ្ដើមធ្លាក់ចុះមកវិញគួរឱ្យកត់សម្គាល់ចាប់តាំងពីមានភ្លៀងធ្លាក់ ៣-៤ មេក្នុងរយៈពេលប៉ុន្មានថ្ងៃមុននេះ។
លោកថ្លែងថា៖ «ចាប់ពីថ្ងៃទី ១ ខែមេសា មកទល់ពេលនេះចំនួនសត្វស្លាបងាប់ក្នុង ១ ថ្ងៃៗមានចំនួនចន្លោះពី ៣៥ ក្បាល ដល់ ៥៧ ក្បាល។ ចំនួននេះមានការថយចុះប្រមាណជាង ១៥០ ក្បាល បើធៀបកាលពីថ្ងៃទី ២១ និង ២២ ខែមីនា ដែលមានការងាប់ច្រើនរហូតដល់ជាង ២០០ ក្បាល ក្នុង ១ ថ្ងៃ»។
បើតាមលោក ពុធ បូ នៅថ្ងៃទី ៦ ខែមេសា ក្រុមការងាររបស់លោកបានចុះប្រមូលសត្វស្លាប ដែលងាប់នៅតាមមាត់បឹង និងដងព្រៃជាប់មាត់បឹងនៃតំបន់អភិរក្សសត្វស្លាបបឹងស្នេហ៍ទួលពាន់តាឡីនេះបានចំនួន ៥៧ ក្បាល ខណៈកាលពីថ្ងៃទី ៥ ខែមេសាបានរកឃើញមានងាប់ ៤៥ ក្បាល និងថ្ងៃទី ៤ មានងាប់ ៣៥ ក្បាល ថ្ងៃទី ៣ មាន ងាប់ ៥៥ ក្បាល និងថ្ងៃទី ២ មានងាប់ ៥០ ក្បាល។
សត្វដែលងាប់នោះត្រូវបានប្រមូលដុតកម្ទេចចោលនៅក្នុងរណ្ដៅដី ដែលត្រូវបានជីកតាមលក្ខណៈបច្ចេកទេស ដែលមន្ត្រីជំនាញ បសុសត្វស្រុកបាភ្នំរៀបចំ និងចាត់ចែងឱ្យធ្វើនៅចម្ងាយប្រមាណ ៥០០ ម៉ែត្រពីព្រៃរបោះដែលសត្វស្លាបរស់នៅ។
ករណីសត្វស្លាបងាប់នៅក្នុងតំបន់អភិរក្សសត្វស្លាបបឹងស្នេហ៍ទួលពាន់តាឡី បានកើតឡើងកាលពីថ្ងៃទី ១៧ ខែ មីនា ឆ្នាំ ២០២១ ដែលនៅពេលនោះក្រុមអ្នកភូមិ និងមន្ត្រីជំនាញមួយចំនួនបានផ្ដោតការសង្ស័យទៅលើការបំពុលទឹកដែលផ្ដើមចេញពីកសិករមួយចំនួនប្រើប្រាស់ថ្នាំពុលកសិកម្ម នៅក្នុងដីស្រែរបស់ពួកគេដែលស្ថិតនៅជាប់តំបន់អភិរក្សឬ បណ្ដាលមកពីវ័យចាស់ជរារបស់សត្វទាំងនោះ និងអាចឆ្លងជំងឺពីតំបន់ផ្សេង។
ក្រសួងកសិកម្ម រុក្ខាប្រមាញ់ និងនេសាទនៅថ្ងៃទី ២៤ ខែ មីនា ឆ្នាំ ២០២១ បានប្រកាសអំពីលទ្ធផលពិសោធន៍ទៅលើសំណាកសត្វចង្កៀលខ្យលដែលងាប់ក្នុងតំបន់នោះថាមាន «វត្តមានវីរុសគ្រុនផ្ដាសាយបក្សីដែលបង្កឡើងដោយវីរុសក្នុងអនុក្រុម A|H5N1»។ លោក ពុធ បូ ថ្លែងថា៖ «វាពិតជាសំណាងដែរ ដែលចាប់តាំងពីពេលនោះមកដល់ពេលនេះ សត្វចិញ្ចឹមរបស់ប្រជាសហគមន៍យើងខ្ញុំដូចជាមាន់ ទា ជ្រូកមិនមានការឆ្លងជំងឺនេះ»។
ជាមួយគ្នានេះលោក កង ធឿន ប្រជាការពារភូមិកំពង់ស្លែង និង ជាសមាជិកក្រុមការងារសហគមន៍អភិរក្សបឹងស្នេហ៍បានប្រាប់ ភ្នំពេញ ប៉ុស្តិ៍ថា ចាប់ពីមានករណីផ្ទុះជំងឺគ្រុនផ្ដាសាយបក្សីនៅក្នុងតំបន់នោះ ប្រជាសហគមន៍បាននាំគ្នាស្ម័គ្រចិត្តជួយដើរប្រមូលសត្វដែលងាប់យកទៅដុតកម្ទេចចោលដើម្បីកាត់បន្ថយអត្រាឆ្លងដល់សត្វស្លាបព្រៃដទៃទៀត ពិសេសការពារកុំឱ្យមានឆ្លងដល់សត្វស្រុកដែលអ្នកភូមិចិញ្ចឹម។
លោកនិយាយថា៖ «ក្រុមការងារយើងមាន ២០ នាក់ ជារៀងរាល់ថ្ងៃក្រៅពីដើរប្រមូលសត្វដែលងាប់យកទៅដុតកម្ទេចចោល យើងបាននាំគ្នា ដាំកូនឈើប្រភេទ ផ្ចឹក សុក្រំ អង្កាញ់ និងដើមរាំង ប្រមាណជាង ២០០ ដើមបន្ថែមទៀត នៅក្នុងតំបន់អភិរក្សសត្វស្លាបបឹងស្នេហ៍ទួលពាន់តាឡីដើម្បីទុកឱ្យសត្វទំជ្រក»។
នៅក្នុងការដើរប្រមូលសត្វស្លាបដែលងាប់នោះ ប្រជាការពារ និងប្រជាសហគមន៍បានទទួលសម្ភារមួយចំនួន ដែលរួមមាន ស្បែកជើងឃ្លុបកវែង ម៉ាស់ ស្រោមដៃ និងប្រេង ១ កានពីមន្ទីរបរិស្ថាន និងទទួលបានការឧបត្ថម្ភជាប្រេង ១ កានបន្ថែមទៀតពីរដ្ឋបាលស្រុកបាភ្នំ។
លោក ទេព ភារុន អភិបាលស្រុកបាភ្នំប្រាប់ ភ្នំពេញ ប៉ុស្តិ៍ថា ការចូលរួមរបស់ប្រជាសហគមន៍នៅក្នុងការទប់ស្កាត់ការរីករាលដាលនៃជំងឺគ្រុនផ្ដាសាយបក្សី បានធ្វើឱ្យចំនួនសត្វស្លាបព្រៃងាប់នៅក្នុងតំបន់អភិរក្សខាងលើនេះមានការថយចុះជាបន្តបន្ទាប់ ដែលអាចនឹងឈានទៅរកភាពប្រក្រតីឡើងវិញក្នុងពេលឆាប់ៗខាងមុខ។
លោកថ្លែងថា៖ «ឥឡូវនេះចំនួនសត្វដែលងាប់ក្នុង ១ ថ្ងៃមានមិនដល់ ៦០ ក្បាលនោះទេ។ បើយោងរបាយការណ៍ ដែលយើងប្រមូលបានគិតចាប់ពីថ្ងៃ ១៧ ខែមីនា ដល់ថ្ងៃ ១ ខែមេសា ឆ្នាំ ២០២១ សត្វដែលបានងាប់សរុប ១ ៣៦៩ ក្បាល បើបូករួមរយៈពេល ៥ ថ្ងៃ (ពីថ្ងៃទី ២-៦ ខែមេសា) នេះបន្ថែមទៀតនោះចំនួនសត្វស្លាបដែលងាប់មានចំនួន ១ ៥៥៦ ក្បាល»។
លោកបន្តថា៖ «ទោះយ៉ាងណាតួលេខនេះយើងរាប់តែចំនួនសត្វដែលងាប់ និងប្រមូលមកដុតកម្ទេចចោលក្នុងភាពជាក់ស្ដែងប៉ុណ្ណោះ ប៉ុន្តែវាអាចមានច្រើនជាងនេះ ព្រោះនៅក្នុងព្រៃជ្រៅ ក្រុមការងារយើងមិនបានចុះទៅដល់នោះទេ»៕