.jpg)
អ្នកដំណើរចូលត្រួតពិនិត្យសុខភាព នៅប៉ុស្តិ៍ត្រួតពិនិត្យព្រំប្រទល់សៀមរាប-កំពង់ធំ។ រូប មន្ទីរព័ត៌មានខេត្តសៀមរាប
ភ្នំពេញៈ ចំនួនអ្នកឆ្លងវីរុសកូវីដ ១៩ នៅក្នុងរាជធានីភ្នំពេញ និងខេត្តកណ្តាល ហាក់ដូចមានភាពធូរស្បើយដោយចំនួននៃអ្នកឆ្លងក្នុងរយៈពេលប៉ុន្មានថ្ងៃចុងក្រោយនេះ មានការថយចុះគួរឱ្យកត់សម្គាល់ ប៉ុន្តែនៅតាមបណ្តាខេត្តមួយចំនួនបែរជាចំនួនអ្នកឆ្លងវីរុសនេះមានការកើនឡើង។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ កាលពីថ្ងៃទី ១៤ ខែឧសភា បានស្នើឱ្យអភិបាលរាជធានី-ខេត្តត្រូវពង្រឹងបន្ថែមនូវវិធានការទប់ស្កាត់ការរាតត្បាតជំងឺកូវីដ ១៩ នៅតាមមូលដ្ឋានរបស់ខ្លួន។
លោកលើកឡើងថា៖ «ការដាក់វិធានការបិទខ្ទប់នៅភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាលគឺជាមេរៀនបទពិសោធ ដែលគួរត្រូវបានដកស្រង់ដើម្បីប្រតិបត្តិនៅតាមមូលដ្ឋានរបស់ខ្លួនទៅតាមស្ថានភាពជាក់ស្តែង»។
លោក ម៉ម ប៊ុនហេង បន្ថែមថា អភិបាលរាជធានី-ខេត្តទាំងអស់ត្រូវបន្តពង្រឹងការអនុវត្តច្បាប់ វិធានការសុខាភិបាល និងវិធានការរដ្ឋបាល ដើម្បីទប់ស្កាត់ការឆ្លងរាលដាលជំងឺកូវីដ ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ឱ្យមានប្រសិទ្ធភាពខ្ពស់ ព្រមទាំងលើកកម្ពស់ការយល់ដឹងអំពីវិធានការបង្ការជំងឺកូវីដ១៩ឱ្យកាន់តែស៊ីជម្រៅទៅដល់បុគ្គល គ្រួសារ និងសហគមន៍។
ក្នុងរយៈពេលប៉ុន្មានថ្ងៃចុងក្រោយ បន្ទាប់ពីស្ថានភាពនៃការឆ្លងរាលដាលវីរុសកូវីដ ១៩ ក្នុងរាជធានីភ្នំពេញ និងខេត្តកណ្តាលមានការថយចុះនៅខេត្តតាកែវ មានការឆ្លងរាលដាលនូវជំងឺនេះជារៀងរាល់ថ្ងៃ ដែលរហូតមកដល់ពេលនេះ មានអ្នកឆ្លងជំងឺកូវីដ ១៩ ជាង ១០០ នាក់ហើយ ដែលភាគច្រើនជាកម្មករ-កម្មការិនីរោងចក្រដោយគិតត្រឹមថ្ងៃទី ១៦ ឧសភា គឺមានអ្នកឆ្លងរហូតដល់ ៥១ នាក់។
លោក មាស អ៊ុយ នាយករដ្ឋបាលសាលាខេត្តតាកែវបានប្រាប់ភ្នំពេញប៉ុស្តិ៍នៅថ្ងៃទី ១៧ ខែឧសភាថា រដ្ឋបាលខេត្តតែងតែត្រៀមបង្ការជាប់ជានិច្ចហើយក៏បានធ្វើការបិទខ្ទប់តំបន់ដែលរកឃើញមានការឆ្លងច្រើនផងដែរ។ លោកប្រាប់ថា៖ «អ្នកដែលបានឆ្លងភាគច្រើនជាកម្មកររោងចក្រ ដែលស្ថិតក្បែរនឹងរាជធានីភ្នំពេញក្នុងនោះមានស្រុកបាទី ស្រុកព្រៃកប្បាស និងស្រុកសំរោង ដែលមានការឆ្លងច្រើនជាងគេ»។
អាជ្ញាធរខេត្តបានធ្វើការពង្រីកកន្លែងធ្វើចត្តាឡីស័កសម្រាប់អ្នកដែលមានការសង្ស័យ និងអ្នកដែលមានការពាក់ព័ន្ធ ហើយសម្រាប់អ្នកដែលចេញពីតំបន់ហានិភ័យនៃរាជធានីភ្នំពេញ និងខេត្តកណ្តាល គឺតម្រូវឱ្យពិនិត្យសុខភាព និងធ្វើចត្តាឡីស័កជាមុនសិន។
ចំណែកនៅខេត្តព្រះសីហនុ ការរកឃើញអ្នកមានវិជ្ជមានវីរុសកូវីដ ១៩ នៅតែបន្តមានជារៀងរាល់ថ្ងៃផងដែរ ជាហេតុនៅថ្ងៃទី ១៧ ខែឧសភា អភិបាលខេត្ត លោក គួច ចំរើន បានសម្រេចធ្វើការផ្អាកបណ្តោះអាសន្ននូវដំណើរការទីតាំងចំនួន ៤ កន្លែង នៅក្នុងភូមិសាស្ត្រក្រុងព្រះសីហនុ និងដាក់ជាមណ្ឌលចត្តាឡីស័កផងដែរ។
យោងតាមសេចក្តីប្រកាសរបស់រដ្ឋបាលខេត្តព្រះសីហនុ បានឱ្យដឹងថា ទីតាំងចំនួន ៤ ដែលត្រូវបានផ្អាកនោះមានសណ្ឋាគារយៀកឡាយ (Yue-lai Hotel) ធនាគាររួយលី (RUI LI Bank), ផ្សារទំនើបខ្នាតតូច ឡានធានហ្គូជីសាងឆឹង ដែលទីតាំងទាំង ៣ នេះស្ថិតក្នុងភូមិ ១ សង្កាត់លេខ ៣ និងទីតាំងមួយទៀត ជាកាស៊ីណូអន្តរជាតិវួយនីស៊ឺ (DV) ដែលស្ថិតក្នុងភូមិ ៤ សង្កាត់លេខ ៤ ក្រុងព្រះសីហនុ។
ការបិទផ្អាកនេះធ្វើឡើង បន្ទាប់ពីក្រុមឆ្លើយតបបន្ទាន់នៃមន្ទីរសុខាភិបាលខេត្តបានយកវត្ថុសំណាកពីភ្ញៀវ ពីបុគ្គលិកបម្រើការងារ និងកម្មករ នៅតាមទីតាំងចំនួន ៤ កន្លែងនេះ និងបានបញ្ជាក់ថា មានវិជ្ជមានវីរុសកូវីដ ១៩។
លោក គួច ចំរើន លើកឡើងថា៖ «ដើម្បីទប់ស្កាត់ការឆ្លងរាលដាលជំងឺកូវីដ១៩ទៅដល់អ្នកផ្សេងៗទៀត រដ្ឋបាលខេត្តព្រះសីហនុសម្រេចផ្អាកជាបណ្តោះអាសន្ននូវទីតាំងទាំងនេះរយៈពេល ១៤ ថ្ងៃចាប់ពីថ្ងៃនេះតទៅ»។
ជាមួយគ្នានេះ លោក គួច ចំរើន បានឱ្យម្ចាស់ទីតាំងទាំង ៤ នេះត្រូវសហការជាមួយក្រុមការងាររដ្ឋបាលខេត្ត ដើម្បីស្វែងរកអ្នកដែលមានការពាក់ព័ន្ធដើម្បីផ្តល់សំណាកផងដែរ។
ទន្ទឹមនឹងនេះដែរ រដ្ឋបាលខេត្តសៀមរាបបានបិទការចេញចូលជាបណ្តោះអាសន្ននៅទីតាំងផ្ទះ អាជីវកម្មដ្ឋានចំនួន ១៦ កន្លែងនៅក្នុងភូមិសាស្ត្រខេត្តសៀមរាបចាប់ពីថ្ងៃទី ១៦ ខែឧសភា រហូតមានការជូនដំណឹងជាថ្មី។
យោងតាមសេចក្តីប្រកាសព័ត៌មានរបស់រដ្ឋបាលខេត្តនៅថ្ងៃចន្ទ ១៧ ឧសភា បានឱ្យដឹងថា ការផ្អាកទីតាំងទាំង ១៦ កន្លែងនេះធ្វើឡើង បន្ទាប់ពីអ្នកជំងឺកូវីដ១៩ម្នាក់មានការពាក់ព័ន្ធ និងចេញចូលក្នុងទីតាំងទាំងអស់នេះតាំងពីថ្ងៃទី ១១ ខែឧសភា មក។
សម្រាប់ខេត្តកែបវិញ បន្ទាប់ពីមានការឆ្លងចូលក្នុងសហគមន៍ជាង ១០ ករណីមកចាប់ពីថ្ងៃទី ៨ ខែឧសភា រហូតមកដល់ថ្ងៃនេះមិនទាន់មានករណីរកឃើញឆ្លងថ្មីទៀតទេដោយសារអាជ្ញាធរខេត្តបានបន្តរឹតបន្តឹង និងប្រកាន់ខ្ជាប់នូវវិធានការសុខាភិបាលយ៉ាងតឹងរ៉ឹងជាប់ជានិច្ច។
លោក វ៉ៅ សុខា អភិបាលរងខេត្តកែបប្រាប់ភ្នំពេញប៉ុស្តិ៍នៅថ្ងៃ ១៧ ឧសភាថា ចាប់តាំងពីថ្ងៃទី ០៨ មកដល់ថ្ងៃនេះ ខេត្តកែបមិនមានការរកឃើញអ្នកឆ្លងករណីថ្មីទេ ដែលទាំងនេះដោយសារតែការអនុវត្តតឹងរ៉ឹងរបស់អាជ្ញាធរខេត្ត និងក្នុងមូលដ្ឋានភូមិ ឃុំ។
លោកថ្លែងថា៖ «យើងបានដាក់កន្លែងត្រួតពិនិត្យសុខភាពនៅតាមផ្លូវជាតិសំខាន់ៗមុនឆ្លងចូលទៅក្នុងខេត្ត ដោយយើងតម្រូវឱ្យមានការវាស់កំដៅ និងការបាញ់អាល់កុលផងដែរ ហើយអ្វីដែលសំខាន់ជាងនេះគឺ ការសហការរវាងប្រជាពលរដ្ឋក្នុងមូលដ្ឋាន និងអាជ្ញាធរតែម្តង»។
យោងតាមសេចក្តីប្រកាសរបស់ក្រសួងសុខាភិបាលនៅថ្ងៃទី ១៧ ខែឧសភា បានរកឃើញអ្នកឆ្លងវីរុសកូវីដ ១៩ ចំនួន ៣៦០ នាក់ បន្ថែមទៀត ខណៈអ្នកដែលបានព្យាបាលជាសះស្បើយមានរហូតដល់ ៨៨៦ នាក់ និងអ្នកទទួលមរណភាពបន្ថែមទៀតចំនួន ៤ នាក់។
អ្នកមានវិជ្ជមានវីរុសកូវីដ ១៩ នេះមានឆ្លងក្នុងព្រឹត្តិការណ៍សហគមន៍ចំនួន ៣៥៦ នាក់ និងអ្នកដំណើរពីបរទេសចំនួន ៤ នាក់។
គិតត្រឹមព្រឹកថ្ងៃទី ១៧ ខែ ឧសភា ឆ្នាំ ២០២១ កម្ពុជាមានអ្នកឆ្លងវីរុសកូវីដ ១៩ សរុបចំនួន ២២ ៥៤៤ នាក់ អ្នកជាសះស្បើយចំនួន ១៣ ០០៦ នាក់ និងអ្នកស្លាប់បានកើនឡើងរហូតដល់ ១៥៤ នាក់៕
វីដេអូ៖
