ភ្នំពេញៈ ច្បាប់ថ្មីដែលទើបប្រកាសឲ្យប្រើនឹងផ្តល់អត្ថប្រយោជន៍ដល់កម្មករនិយោជិតក្នុងវិស័យឯកជនឲ្យទទួលបានប្រាក់សោធនដូចកម្មករនិយោជិតក្នុងវិស័យសាធារណៈ ខណៈអត្ថប្រយោជន៍ផ្សេងៗទៀតក៏នឹងទទួលបានដូចគ្នា នៅពេលពួកគេបានបង់វិភាគទាន និងបំពេញតាមលក្ខខណ្ឌនៃច្បាប់។
អត្ថប្រយោជន៍ទាំងនេះ ត្រូវបានកំណត់នៅក្នុងច្បាប់ស្តីពីរបបសន្តិសុខសង្គមដែលព្រះមហាក្សត្រឡាយព្រះហស្តលេខាប្រកាសឲ្យប្រើនៅដើមខែវិច្ឆិកាឆ្នាំនេះ។ ច្បាប់នេះ មានវិសាលភាពគ្របដណ្ដប់លើបុគ្គលដែលស្ថិតនៅក្នុងវិស័យសាធារណៈ បុគ្គលដែលស្ថិតនៅក្រោមច្បាប់ស្តីពីការងារដោយរួមបញ្ចូលទាំងបុគ្គលធ្វើការតាមផ្លូវអាកាសនាវាសមុទ្រ ព្រមទាំងអ្នកបម្រើការតាមផ្ទះ និងបុគ្គលស្វ័យនិយោជន៍ជាដើម។
តាមច្បាប់ស្តីពីរបបសន្តិសុខសង្គមដែលមាន ១១ ជំពូក និង ១០៧ មាត្រាបានឲ្យដឹងថា ដើម្បីធានានូវសន្ដិសុខប្រាក់ចំណូល នៅពេលជួបហានិភ័យសង្គមនានា កម្មករនិយោជិតនឹងទទួលបាននូវអត្ថប្រយោជន៍ប្រសិនបើស្ថិតនៅក្នុងជរាភាព ទុព្វលភាព មរណភាព ហានិភ័យការងារ ការថែទាំព្យាបាលវេជ្ជសាស្ដ្រ ការមានជំងឺ ការគ្មានការងារធ្វើ និងអត្ថប្រយោជន៍គ្រួសារជាដើម។
ជាមួយគ្នានេះក្នុងមាត្រា ២១ នៃច្បាប់នេះក៏បានបញ្ជាក់ដែរថា ប្រភពធនធានផ្នែកប្រាក់សោធនសម្រាប់ផ្តល់ជូននិយោជិតទាំងអស់គឺទទួលបានពីការបង់ភាគទានពីរដ្ឋ និយោជក និងសមាជិក (បសស) (ប្រាក់កម្មករនិយោជិតបានបង់រៀងរាល់ខែ) រួមនឹងផលដែលបានពីវិនិយោគ និងអំណាយស្របច្បាប់ដទៃទៀត។
លោក ស៊ុំ សោភ័ណ អនុប្រធានបេឡាជាតិរបបសន្តិសុខសង្គមនៃក្រសួងការងារ និងបណ្តុះបណ្តាលវិជ្ជាជីវៈបានប្រាប់ភ្នំពេញប៉ុស្តិ៍ពីម្សិលមិញថា មន្ត្រីពាក់ព័ន្ធកំពុងរៀបចំលិខិតបទដ្ឋានគតិយុត្តពាក់ព័ន្ធនឹងច្បាប់នេះ ដើម្បីបញ្ជាក់និងផ្សព្វផ្សាយបន្ថែម។
លោកបន្តថា៖ «ចូលជាធរមានទាំងអស់ ប៉ុន្តែគ្រាន់តែអនុវត្តដំបូងនៅឆ្នាំ ២០២០ យើងផ្តោតលើកម្មករនិយោជិតក្នុងវិស័យឯកជនមុន។ ដោយសារវិស័យសាធារណៈយើងមានរបបសោធនធានាហើយតាមរយៈការបង់ពន្ធចូលរដ្ឋដែលគាត់បានទទួលហើយថ្ងៃក្រោយបានយើងរៀបចំចំពោះមន្ត្រីរាជការបន្តបន្ទាប់»។
លោក ស៊ុំ សោភ័ណ បានបន្តថា ចំពោះកម្មករនិយោជិតក្នុងវិស័យឯកជនដែលបានចុះឈ្មោះក្នុងបញ្ជី (បសស) គឺមិនចាំបាច់ចុះឈ្មោះជាថ្មីនោះទេដោយគ្រាន់តែបន្តបង់ភាគទានតាមរយៈនិយោជកដូចបានកំណត់នៅក្នុងច្បាប់ថ្មីប៉ុណ្ណោះ ហើយការទទួលបាននូវអត្ថប្រយោជន៍ត្រឡប់មកវិញ គឺនឹងមានចែងដូចច្បាប់កំណត់។
គិតចាប់ពីឆ្នាំចុងឆ្នាំ ២០០៨ ដែលបេឡាជាតិរបបសន្តិសុខសង្គមបានដំណើរការមកទល់បច្ចុប្បន្ន មានកម្មករនិយោជិតក្នុងវិស័យឯកជនប្រមាណ ១ លាន ៦ សែននាក់បានចុះឈ្មោះក្នុងបញ្ជី (បសស)។ នេះបើតាម លោក ស៊ុំ សោភ័ណ។
បើតាមច្បាប់ស្តីពីរបបសន្តិសុខសង្គមបានបញ្ជាក់ថា កម្មករនិយោជិតដែលអាចទទួលបាននូវអត្ថប្រយោជន៍គឺត្រូវគោរពតាមការកំណត់ដូចជា បានចុះបញ្ជីក្នុងផ្នែកសោធន និងបានបង់វិភាគទានផ្នែកសោធនជាទៀងទាត់តាមការកំណត់នៃច្បាប់ព្រមទាំងចងជាកាតព្វកិច្ចផងដែរ។
យ៉ាងណាក្ដីមានសហជីពខ្លះបានបង្ហាញការបារម្ភចំពោះការអនុវត្តច្បាប់នេះដែលអាចជួបបរាជ័យ ខណៈ GMAC ស្នើឲ្យពន្យារអនុវត្តដោយអះអាងថាការចូលជាធរមានភ្លាមៗនៃការអនុវត្តរបបសោធនគឺជាការដាក់សម្ពាធហិរញ្ញវត្ថុលើនិយោជក។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករស្វាគមន៍ និងគាំទ្រចំពោះច្បាប់ថ្មីស្តីពីរបបសន្តិសុខសង្គម ដែលបានរាប់បញ្ចូលទាំងកម្មករនិយោជិតក្នុងវិស័យឯកជន ជាពិសេសកម្មករដែលស្ថិតនៅក្រោមច្បាប់ការងារ។ ប៉ុន្តែលោកយល់ថា ការអនុវត្តច្បាប់ថ្មីនេះអាចបរាជ័យ ខណៈការគ្រប់គ្រងកន្លងមកហាក់មិនមានតម្លាភាពនៅឡើយ។
លោកថា៖ «ពេលយើងអនុវត្តនេះអាចនឹងមិនធ្វើឲ្យល្អប្រសើរ ឬក៏ស្របតាមប្បញ្ញតិ្តច្បាប់ដែលកំពុងប្រកាសឲ្យប្រើ ព្រោះមានវិសាលភាពធំ។ យើងចង់សួរថាទាំងវិស័យសាធារណៈទាំងវិស័យឯកជនទាំងអស់ហ្នឹងគឺទាមទារឲ្យគាត់ស្វែងយល់ពីការទទួលបានផលប្រយោជន៍របៀបម៉េច?
ប្រសិនបើយើងមិនបានបង្ហាញឲ្យច្បាស់នោះនឹងធ្វើឲ្យពួកគាត់យល់ថាអ្នកណាតំណាងឲ្យពួកគាត់ ដើម្បីទទួលបានអត្ថប្រយោជន៍ត្រឡប់មកនេះ»។
កាលពីថ្ងៃសុក្រសប្តាហ៍មុនសមាគមរោងចក្រកាត់ដេរនៅកម្ពុជា (GMAC) បានបង្ហោះលើហ្វេសប៊ុករបស់ខ្លួន ដោយស្នើសុំរដ្ឋាភិបាលពន្យារពេលអនុវត្តនេះ ព្រោះការចូលជាធរមានភ្លាមៗនៃការអនុវត្តរបបសោធននឹងដាក់សម្ពាធហិរញ្ញវត្ថុទៅខាងនិយោជក ខណៈក្រុមហ៊ុនខ្លះមិនទាន់បានរៀបចំផែនការហិរញ្ញវត្ថុសម្រាប់ឆ្នាំក្រោយ ហើយនិយោជកខ្លះនៅមិនទាន់បានដឹងអំពីការអនុវត្តច្បាប់នេះ។
GMAC បានស្នើឲ្យមានវិធានការជាច្រើនចំណុចដូចជា ការលើកកម្ពស់ប្រសិទ្ធភាព និងជំរុញ (បសស) វិនិយោគក្នុងការកែលម្អសេវា បរិក្ខារបច្ចេកវិទ្យា និងពង្រឹងសមត្ថភាពមន្ត្រី (បសស) សម្រាប់ជំនាញទន់ និងជំនាញបច្ចេកទេសដែលពាក់ព័ន្ធដើម្បីឆ្លើយតបឲ្យមានប្រសិទ្ធភាពចំពោះតម្រូវការរបស់សមាជិកខ្លួន។
GMACបានបញ្ចប់សំណេររបស់ខ្លួនថា៖ «ចាប់ផ្តើមការជំរុញការយល់ដឹងឲ្យបានទូលំទូលាយអំពីវិសាលភាពគ្របដណ្តប់ និងអត្ថប្រយោជន៍របស់ ប.ស.ស. ទៅដល់សាធារណជនដើម្បីលើកទឹកចិត្តវិស័យក្រៅប្រព័ន្ធចូលរួមក្នុងរបបនេះដែរ ជាពិសេសក្នុងរបបសោធន»។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានប្រាប់តាមប្រព័ន្ធតេឡេក្រាមពីម្សិលមិញថា ក្រសួងនឹងចេញអនុក្រឹត្យបន្ថែមជុំវិញបញ្ហាទាំងនេះ។ លោកបន្តថា នៅពេលមានការសម្រេចបែបណានោះ ក្រសួងនឹងបើកឱកាសឲ្យភាគីពាក់ព័ន្ធចូលរួមផ្តល់មតិយោបល់ ឬធាតុចូលដើម្បីធ្វើឲ្យការអនុវត្តវិធាននៃសោធនទាំងនេះសម្រាប់វិស័យឯកជននេះ ទទួលបានជោគជ័យ។
លោកបញ្ជាក់ថា៖ «សូមពិនិត្យលើមាត្រាច្បាប់នេះ គឺមុនពេលដែលមានបទប្បញ្ញត្តិថ្មីនោះ បទប្បញ្ញតិ្តចាស់នៅមានជាធរមាន ហើយបទប្បញ្ញតិ្តថ្មីគឺធ្វើដោយអនុក្រឹត្យ ហើយអនុក្រឹត្យនឹងឆ្លងនៅដំណាក់កាលពិភាក្សាត្រីភាគីបន្ថែមទៀត។ ដូច្នេះអ្វីដែលជាកង្វល់អ្វីដែលចង់ផ្តល់ធាតុចូល គឺនៅពេលដែលយើងរៀបចំនៅបទប្បញ្ញតិ្តថ្មីនឹងអញ្ជើញភាគីពាក់ព័ន្ធទាំងអស់មកចូលរួម»៕