.jpg)
កិច្ចប្រជុំនៅក្រសួងការបរទេសកាលពីថ្ងៃទី ២៩-៣០ កញ្ញា។ រូបថត ក្រសួងការបរទេស
ភ្នំពេញៈ ក្រសួងការបរទេសបានធ្វើការផ្សព្វផ្សាយច្បាប់ស្តីពី «ការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ» និង «ច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម» ទៅដល់អង្គការមិនមែនរដ្ឋាភិបាលបរទេស បន្ទាប់ពីក្រុមការងារហិរញ្ញវត្ថុនៃប្រទេសអាស៊ីប៉ាស៊ីហ្វិក បានដាក់កម្ពុជានៅក្នុងបញ្ជីប្រផេះ គឺប្រទេសដែលមានហានិភ័យខ្ពស់ក្នុងការលាងលុយកខ្វក់។
ក្រសួងការបរទេស និងសហប្រតិបត្តិការអន្តរជាតិបានបើកកិច្ចពិគ្រោះយោបល់ជាមួយអង្គការមិនមែនរដ្ឋាភិបាលបរទេសលើកទី ២ រយៈពេល ២ ថ្ងៃគឺថ្ងៃទី ២៩-៣០ ខែកញ្ញា កន្លងមកនេះ។
លោក លុយ ដាវីត រដ្ឋលេខាធិការក្រសួងការបរទេសបានប្រាប់ភ្នំពេញ ប៉ុស្តិ៍ កាលពីថ្ងៃទី ៣០ ខែកញ្ញា ថា ការប្រជុំជាមួយនឹងអង្គការមិនមែនរដ្ឋាភិបាលបរទេសនេះធ្វើឡើងបន្ទាប់ពីកាលពីឆ្នាំ ២០១៩ កន្លងទៅក្រុមការងារហិរញ្ញវត្ថុនៃប្រទេសអាស៊ីប៉ាស៊ីហ្វិកបានដាក់កម្ពុជាជាប្រទេសក្នុងបញ្ជីប្រផេះដែលមានហានិភ័យក្នុងការលាងលុយកង្វក់ ហើយពេលនោះរាជរដ្ឋាភិបាលកម្ពុជាក៏បានបង្កើតនូវច្បាប់ចំនួន ២ គឺច្បាប់ស្តីពី «ការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ» និង «ច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម»។
លោក លុយ ដាវីត ថ្លែងថា៖ «កិច្ចប្រជុំពិភាក្សានេះ មិនមែនដោយសារតែអង្គការមិនមែនរដ្ឋាភិបាលអន្តរជាតិទាំងនេះមានការជាប់ពាក់ព័ន្ធនឹងការលាងលុយកខ្វក់នោះទេតែជាកាតព្វកិច្ចរបស់ក្រសួងការបរទេសគឺធ្វើការផ្សព្វផ្សាយច្បាប់ទាំង ២ នេះឱ្យដល់អង្គការមិនមែនរដ្ឋាភិបាលបរទេសទាំងអស់។ ដូចនេះកាតព្វកិច្ចរបស់យើងគឺយើងបានបំពេញអស់ហើយ»។ អ្នកដែលបានចូលរួមក្នុងកិច្ចពិភាក្សានេះមានចំនួន ៣៧០ នាក់មកពី ២១៦ អង្គការមិនមែនរដ្ឋាភិបាលបរទេសចំនួន ២១៦ អង្គការក្នុងចំណោម ៣៥៦ អង្គការ ដែលបានចុះបញ្ជីជាមួយក្រសួងការបរទេស។
បើតាមលោក ដាវីដ ក្រសួងបានស្នើទៅអង្គការទាំងនោះឱ្យគោរព និងអនុវត្តទៅតាមច្បាប់ស្ដីពីសមាគម និងអង្គការមិនមែនរដ្ឋាភិបាល (LANGO) និងត្រូវគោរពតាមកាតព្វកិច្ចរបស់ខ្លួនទៅតាមច្បាប់ ២ នេះដែលក្រសួងបានធ្វើការផ្សព្វផ្សាយក្នុងកិច្ចប្រជុំចំនួន ២ ថ្ងៃកន្លងមក។
លោកថ្លែងថា៖ «យើងចាត់ទុកថា ការប្រជុំ ២ ថ្ងៃមកនេះប្រព្រឹត្តទៅដោយរលូនដោយមានការចោទសួរគ្នាទៅវិញទៅមក ហើយអង្គការទាំងនោះហាក់ដូចជាយល់ដឹងពីកាតព្វកិច្ចរបស់ខ្លួនពីព្រោះមន្ត្រីជំនាញនៃក្រសួងមហាផ្ទៃ និងធនាគារជាតិបានពន្យល់យ៉ាងលម្អិតពីច្បាប់នេះទៅដល់អង្គការទាំងនោះ»។
កិច្ចប្រជុំពិគ្រោះយោបល់រវាងរាជរដ្ឋាភិបាលកម្ពុជាជាមួយអង្គការមិនមែនរដ្ឋាភិបាលបរទេសលើកទី ៣ នឹងធ្វើឡើងនៅឆ្នាំក្រោយទៀត។
មិនមានប្រភពទាក់ទងតំណាងអង្គការមិនមែនរដ្ឋាភិបាលបរទេសដែលបានចូលរួមកិច្ចប្រជុំជាមួយក្រសួងការបរទេសដើម្បីសុំអត្ថាធិប្បាយពីបញ្ហានេះនោះទេ។ ប៉ុន្តែលោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុកបានថ្លែងថា លោកមិនមានព័ត៌មានច្បាស់ពីការពាក់ព័ន្ធរបស់អង្គការមិនមែនរដ្ឋាភិបាលបរទេសទៅនឹងការលាងលុយយ៉ាងណាទេ តែលោកមើលឃើញថា រាល់ការលំហូរសាច់ប្រាក់ដែលម្ចាស់ជំនួយបញ្ជូនមកអង្គការសប្បុរសធម៌ ឬអង្គការសង្គមស៊ីវិលក្នុងស្រុក សុទ្ធតែបានឆ្លងកាត់ប្រព័ន្ធធនាគាររបស់រាជរដ្ឋាភិបាល។ លើសពីនេះរាល់ការចំណាយរបស់សង្គមស៊ីវិលទាំងអស់សុទ្ធតែមានការត្រួតពិនិត្យត្រឹមត្រូវជាប្រចាំឆ្នាំទៅលើការចាយវាយដែលវាពិបាកក្នុងការប្រព្រឹត្តអំពើពុករលួយ ជាពិសេសការលាងលុយកខ្វក់នេះ។
លោកថា៖ «ខ្ញុំមិនដឹងថា អង្គការណាខ្លះទេ តែសម្រាប់អង្គការផ្នែកតស៊ូមតិ ផ្នែកសិទ្ធិមនុស្សផ្នែកលទ្ធិប្រជាធិបតេយ្យនេះគឺយើងមិនបានប្រើប្រាស់ថវិកាណាមួយពាក់ព័ន្ធនឹងការលាងលុយទេ ក្រៅពីការធ្វើសកម្មភាពផ្នែកសិទ្ធិមនុស្ស ការអប់រំ ការចុះធ្វើការផ្សព្វផ្សាយផ្សេងៗដែលមិនមានចំណុចណាមួយដែលជាបញ្ហាទេ តែខ្ញុំមើលឃើញថា បញ្ហាលាងលុយកខ្វក់គឺមានតាមរយៈប្រព័ន្ធធនាគារ វិស័យឯកជន អចលនទ្រព្យ កាស៊ីណូជាដើម ដែលអាចធ្វើទៅបាន បើតាមការឱ្យដឹងពីអ្នកជំនាញ»។
លោកថា លោកមិនដែលឃើញមានការលាងលុយកខ្វក់ ឬការធ្វើអំពើទុច្ចរិតណាមួយកើតមានឡើងពីអង្គការសង្គមស៊ីវិលនោះទេ៕
