ភ្នំពេញ៖ រដ្ឋសភាបានបញ្ចប់កិច្ចពិភាក្សា និងអនុម័តសេចក្តីព្រាងច្បាប់ស្តីពីការគ្រប់គ្រង ការប្រើប្រាស់ និងការចាត់ចែងលើទ្រព្យ សម្បត្តិរដ្ឋ នៅថ្ងៃអង្គារនេះ ដោយគ្រោងបញ្ជូនទៅស្ថាប័នព្រឹទ្ធសភាពិនិត្យបន្ត ខណៈមន្ត្រីថា ច្បាប់នេះនឹងជួយពង្រឹងអភិបាលកិច្ចល្អក្នុងការគ្រប់គ្រងលើទ្រព្យសម្បត្តិរដ្ឋ។ សង្គមស៊ីវិលគាំទ្រការបង្កើតច្បាប់នេះដែលរំពឹងថានឹងអាចកំណត់ច្បាស់លាស់ក្នុងការគ្រប់គ្រង។
លោក ឡេង ប៉េងឡុង អ្នកនាំពាក្យរដ្ឋសភាបានថ្លែងថា រដ្ឋសភាបានបន្តសម័យប្រជុំលើកទី៥ នីតិកាលទី៦ នៅថ្ងៃទី ៦ ខែតុលា នេះ ដើម្បីពិភាក្សា និងអនុម័តសេចក្តីព្រាងច្បាប់សំខាន់ៗដែលបម្រើដល់វិស័យសេដ្ឋកិច្ច ពាណិជ្ជកម្ម និងកិច្ចសហប្រតិបត្តិការអន្តរជាតិ។
លោកបញ្ជាក់ថា៖ «រដ្ឋសភាយើងបានបញ្ចប់កិច្ចពិភាក្សា និងអនុម័តរបៀបវារៈចំនួន ១១ ចំណុចរួចរាល់ហើយ ក្នុងនោះច្បាប់ដែលសំខាន់ៗ គឺយើងកំពុងរៀបចំបញ្ជូនទៅព្រឹទ្ធសភា ពិនិត្យបន្តទៀត។ ពិសេសសេចក្តីព្រាងច្បាប់ស្តីពីការគ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរដ្ឋ ក៏នឹងបញ្ជូនទៅព្រឹទ្ធសភាជាមួយគ្នាទាំងអស់ដែរ តែខ្ញុំមិនអាចបញ្ជាក់ពេលវេលាជាក់លាក់ទេ»។
បើតាមលោកឡេង ប៉េងឡុង ច្បាប់នេះ នឹងជួយពង្រឹងអភិបាលកិច្ចល្អក្នុងការគ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរដ្ឋ ប្រកបដោយប្រសិទ្ធភាព និងចីរភាព។ ទន្ទឹមនឹងនេះ បង្កើនចំណូលពីទ្រព្យសម្បត្តិរដ្ឋឲ្យកាន់តែមានភាពច្បាស់លាស់ សំដៅធានាដល់ការគ្រប់គ្រងធនធានសាធារណៈ។ បង្កើនចំណូលជាប្រយោជន៍ដល់ថវិកាជាតិ និងកំណើនសេដ្ឋកិច្ចជាតិ។
លោក អំ សំអាត ប្រធានផ្នែកឃ្លាំមើល និងការពារសិទ្ធិមនុស្សនៃអង្គការ (LICADHO) គាំទ្រឲ្យមានច្បាប់នេះ ដើម្បីពង្រឹងក្របខណ្ឌច្បាប់រចនាសម្ព័ន្ធស្ថាប័ន និងលើកកម្ពស់សមត្ថភាពស្ថាប័នពាក់ព័ន្ធក្នុងការគ្រប់គ្រងទ្រព្យសម្បតិ្តរដ្ឋ។
លោកថ្លែងនៅថ្ងៃអង្គារទី ៦ តុលា នេះថា៖ «កន្លងមកយើងសង្កេតឃើញថា ការគ្រប់គ្រងទ្រព្យសម្បត្តិរដ្ឋមិនទាន់បានល្អប្រសើ ហើយនៅមានបញ្ហាច្រើន។ ប៉ុន្ដែចំពោះច្បាប់នេះខ្ញុំរំពឹងថា អាចនឹងធានា ឬកំណត់ឲ្យបានច្បាស់ថា តើមានអ្វីខ្លះជាទ្រព្យសម្បត្តិរដ្ឋ? ហើយការចាត់ចែង ប្រើប្រាស់និងការគ្រប់គ្រងហ្នឹងធ្វើយ៉ាងម៉េច? ហើយការលក់ដូរហ្នឹង ធ្វើយ៉ាងណាឲ្យបានល្អប្រសើរ? អ៊ីចឹងច្បាប់នេះ គឺគេនឹងគិតគូរពីបញ្ហាទាំងនេះ»។
លោកបន្ថែមថា ច្បាប់នេះ គឺជាលំនាំ ឬជាគោលការណ៍មួយសម្រាប់អនុវត្ត ប៉ុន្ដែការអនុវត្តមានប្រសិទ្ធភាពកម្រិតណានោះ គេមិនទាន់ដឹងច្បាស់នៅឡើយ។ ដូច្នេះគេនឹងរង់ចាំមើលការអនុវត្តច្បាប់នេះមានប្រសិទ្ធិភាពកម្រិតណា ហើយនៅមានភាពខ្វះចន្លោះចំណុចណាខ្លះ។
សេចក្ដីប្រកាសព័ត៌មានរបស់ទីស្ដីការគណៈរដ្ឋមន្ត្រី នៃសម័យប្រជុំពេញអង្គគណៈរដ្ឋមន្ត្រីនៅថ្ងៃទី ៣ កក្កដា ឆ្នាំ ២០២០ ឲ្យដឹងថា សេចក្ដីព្រាងច្បាប់នេះ ត្រូវបានរៀបចំដោយផ្អែកលើមាត្រា ៥៨ នៃរដ្ឋធម្មនុញ្ញនៃព្រះរាជាណាចក្រកម្ពុជាឆ្នាំ ១៩៩៣ ដែលចែងថា ទ្រព្យសម្បត្តិរបស់រដ្ឋមានជាអាទិ៍ ដីធ្លី ក្រោមដី ភ្នំ សមុទ្រ ក្រោមបាតសមុទ្រ ឆ្នេរសមុទ្រ អាកាស កោះ ទន្លេ ព្រែក ស្ទឹង បឹង ព្រៃឈើ ធនធានធម្មជាតិ មជ្ឈមណ្ឌលសេដ្ឋកិច្ចវប្បធម៌ មូលដ្ឋានការពារប្រទេស សំណង់ផ្សេងៗទៀត បានកំណត់ថា ជារបស់រដ្ឋ។ ការគ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរដ្ឋ នឹងត្រូវកំណត់ក្នុងច្បាប់។
សេចក្ដីព្រាងច្បាប់នេះត្រូវបានរៀបចំឡើងដើម្បីពង្រីងក្របខ័ណ្ឌច្បាប់ រចនាសម្ព័ន្ធស្ថាប័ន និងលើកកម្ពស់សមត្ថភាពស្ថាប័នក្នុងការគ្រប់គ្រងទ្រព្យសម្បត្តិរដ្ឋជាអាទិ៍ ការកំណត់អំពីប្រភព ប្រភេទទ្រព្យសម្បត្តិរដ្ឋ របបគតិយុត្តគ្រប់គ្រងនិងចាត់ចែងទ្រព្យសម្បត្តិរដ្ឋច្បាស់លាស់ជាក់លាក់។ ការរៀបចំបញ្ជីសារពើភណ្ឌទ្រព្យសម្បត្តិរដ្ឋ ការផ្ទេរសិទ្ធិកាន់កាប់ ការអភិរក្ស ការអភិវឌ្ឍ ការប្រើប្រាស់ទ្រព្យសម្បត្តិរដ្ឋ ការធ្វើអធិការកិច្ច និងសវនកម្ម។ ការកំណត់អំពីការលើកទឹកចិត្ត និងការដាក់ទណ្ឌកម្មចំពោះអំពើល្មើសច្បាប់នានាជាដើម។
សេចក្ដីប្រកាសព័ត៌មានបន្តថា សេចក្ដីព្រាងច្បាប់នេះមានគោលបំណងឆ្លើយតបទៅនឹងសេចក្ដីត្រូវការរបស់រាជរដ្ឋាភិបាលក្នុងការពង្រីងអភិបាលកិច្ចល្អ បង្កើនប្រសិទ្ធភាព តម្លាភាព សក្ដិសិទ្ធិភាពនិងគណនេយ្យភាពនៃការគ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរដ្ឋ ស្របតាមកម្មវិធីកែទម្រង់។ ការគ្រប់គ្រងហិរញ្ញវត្ថុសាធារណៈដើម្បីជាឧត្តមប្រយោជន៍ជាតិ និងប្រជាជន រួមចំណែកឈានទៅសម្រេចគោលដៅនៃចក្ខុវិស័យឆ្នាំ ២០៣០ ក្នុងការប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់ និងជាប្រទេសចំណូលខ្ពស់នៅឆ្នាំ ២០៥០។
បើតាមសេចក្ដីប្រកាសព័ត៌មាន សេចក្ដីព្រាងច្បាប់នេះ រៀបចំឡើងមានចំនួន ១២ ជំពូក និង ៩០ មាត្រា ហើយត្រូវបានសម្រេចឯកភាពដោយអង្គប្រជុំពេញអង្គគណៈរដ្ឋមន្ត្រី៕