.jpg)
ភ្នំពេញៈ ច្បាប់ស្តីពីការគ្រប់គ្រង ប្រទេសជាតិស្ថិតក្នុងភាពអាសន្នត្រូវបានក្រុមប្រឹក្សាធម្មនុញ្ញសម្រេចអនុម័តជាឯកច្ឆន្ទក្នុងកិច្ចប្រជុំពេញអង្គនៃក្រុមប្រឹក្សាធម្មនុញ្ញពីម្សិលមិញ និងគ្រោងបញ្ជូនច្បាប់នេះទៅកាន់ស្ថាប័នរដ្ឋសភាវិញ ដើម្បីអនុវត្តយន្តការបន្តទៅតាមនីតិវិធី។
លោក តាំង រតនា អ្នកនាំពាក្យក្រុមប្រឹក្សាធម្មនុញ្ញប្រាប់ភ្នំពេញប៉ុស្តិ៍ ម្សិលមិញថាក្រោយពីស្ដាប់ការពន្យល់របស់តំណាងរាជរដ្ឋាភិបាល និងការពិភាក្សាយ៉ាងល្អិតល្អន់ក្នុងកិច្ចប្រជុំពេញអង្គរបស់ខ្លួនថ្ងៃទី ២៧ មេសា ស្តីពីការពិនិត្យ និងសម្រេចលើសំណើសុំពិនិត្យធម្មនុញ្ញភាព «ច្បាប់ស្តីពីការគ្រប់គ្រងប្រទេសជាតិស្ថិតក្នុងភាពអាសន្ន» របស់រដ្ឋសភារួចមកក្រុមប្រឹក្សាធម្មនុញ្ញបានសម្រេចជាឯកច្ឆន្ទថា ច្បាប់នេះពិតជាស្របនឹងរដ្ឋធម្មនុញ្ញ ព្រោះពុំមានបទប្បញ្ញត្តិណាមួយនៅក្នុងច្បាប់នេះមិនស្របនឹងរដ្ឋធម្មនុញ្ញឡើយ។
លោកបានបញ្ជាក់ថា៖ «សេចក្ដីសម្រេចរបស់ក្រុមប្រឹក្សាធម្មនុញ្ញគឺជាសេចក្ដីសម្រេចស្ថាពរ និងបិទផ្លូវតវ៉ា ហើយមានអានុភាពអនុវត្តទៅលើអំណាចទាំងអស់ដែលមានចែងក្នុងរដ្ឋធម្មនុញ្ញ និងត្រូវចុះផ្សាយក្នុងព្រះរាជក្រឹត្យ»។
លោកថា៖ «បន្ទាប់ពីក្រុមប្រឹក្សាធម្មនុញ្ញសម្រេចអនុម័តជាឯកច្ឆន្ទរួចច្បាប់នេះនឹងត្រូវបញ្ជូនទៅម្ចាស់សំណើ [រដ្ឋសភា] វិញ ដើម្បីអនុវត្តយន្តការទៅតាមនីតិវិធីច្បាប់»។
ច្បាប់ស្តីពីការគ្រប់គ្រងប្រទេសជាតិស្ថិតក្នុងភាពអាសន្នត្រូវបានរាជរដ្ឋាភិបាលបង្កើតឡើងនាថ្ងៃទី ៣១ ខែ មីនា ឆ្នាំ ២០២០ ដោយផ្អែកតាមមាត្រា ២២ ថ្មីនៃរដ្ឋធម្មនុញ្ញ កម្ពុជាដែលចែងថា នៅពេលប្រជាជាតិប្រឈមមុខនឹងគ្រោះថ្នាក់ ព្រះមហាក្សត្រទ្រង់ប្រទានដំណឹងជាសាធារណៈដាក់ប្រទេសជាតិក្នុងភាពអាសន្ន ក្រោយពីបានមតិ ឯកភាពពីនាយករដ្ឋមន្ត្រី ប្រធានរដ្ឋសភា និងប្រធានព្រឹទ្ធសភា។
ច្បាប់នេះត្រូវបានរដ្ឋសភាអនុម័តនៅថ្ងៃទី ១០ មេសា នាសម័យប្រជុំរដ្ឋសភាលើកទី ៤ នីតិកាលទី ៦ និងព្រឹទ្ធសភា ពិនិត្យ ឯកភាពទាំងស្រុងលើទម្រង់ និងគតិច្បាប់ក្នុងសម័យប្រជុំនៃព្រឹទ្ធសភា នីតិកាលទី ៤ ថ្ងៃទី ១៧ មេសា៕
