The Phnom Penh Post Search

Search form




Logo of Phnom Penh Post newspaper Phnom Penh Post - ច្បាប់​អង្គការ​ត្រូវ​អនុម័ត​ដោយ​ឯកបក្ស

ច្បាប់​អង្គការ​ត្រូវ​អនុម័ត​ដោយ​ឯកបក្ស

Content image - Phnom Penh Post
កងកម្លាំង​សមត្ថកិច្ច​ រារាំង​ការដង្ហែក្បួនរបស់ប្រជាពលរដ្ឋ ព្រះសង្ឃ និងមន្ត្រីអង្គការសង្គមស៊ីវិល ទៅ​កាន់រដ្ឋសភា កាលពីថ្ងៃ​ម្សិលមិញ​។ ហេង ជីវ័ន

ច្បាប់​អង្គការ​ត្រូវ​អនុម័ត​ដោយ​ឯកបក្ស

ភ្នំពេញៈ តំណាងរាស្ត្រ​គណបក្ស​ប្រជាជន​កម្ពុជា ៦៨ រូប បាន​ចំណាយ​ពេល​ត្រឹម​តែ​មួយ​ព្រឹក​ប៉ុណ្ណោះ ក្នុង​ការ​អនុម័ត​ដោយ​បោះ​ឆ្នោត​ជា​ឯកច្ឆន្ទ លើ​សេចក្តី​ព្រាង​ច្បាប់​សមាគម និង​អង្គការ​ក្រៅ​រដ្ឋា​ភិបាល ខណៈ​ដែល​តំណាងរាស្ត្រ​គណបក្ស​ប្រឆាំង​ទាំង ៥៥ រូប​បាន​ធ្វើ​ពហិការ​ចូល​ប្រជុំ ដោយ​ហៅ​សេចក្តី​ព្រាង​ច្បាប់​នេះ​ថា មាន​លក្ខណៈ​គាប​សង្កត់ រឹត​ត្បិត​សេរីភាព​បុគ្គល ព្រម​ទាំង​ផ្ទុយ​នឹង​រដ្ឋ​ធម្មនុញ្ញ​កម្ពុជា និង​អនុសញ្ញា កតិកា​សញ្ញា​អន្តរជាតិ។

ទន្ទឹម​នឹង​ដំណើរការ​នៃ​កិច្ចពិភាក្សា និង​អនុម័ត​លើ​សេចក្តី​ព្រាង​ច្បាប់​ដ៏​ចម្រូង​ចម្រាស កាល​ពី​ម្សិលមិញ​នេះ សន្តិសុខ​ជុំវិញ​បរិវេណ​រដ្ឋសភា​ត្រូវ​បាន​​រឹត​បន្តឹង​ដោយ​កម្លាំង​សមត្ថកិច្ច​ចម្រុះ​ជាង ១០០ នាក់​ប្រដាប់​​ដោយ​ខែល និង​ដំបង រារាំង​ចំពោះ​ក្បួន​ដង្ហែ​តវ៉ា​ដោយ​សន្តិវិធី​របស់​សង្គម​ស៊ីវិល និង​ពលរដ្ឋ​ប្រមាណ ៣០០ នាក់។

ក្នុង​កិច្ច​អន្តរាគមន៍​ការពារ​សេចក្តី​ព្រាង​​ច្បាប់​នេះ ឧបនាយក​រដ្ឋមន្ត្រី និង​ជា​រដ្ឋមន្ត្រី​ក្រសួង​មហាផ្ទៃ លោក ស ខេងបាន​​ថ្លែង​ថា កម្ពុជា បាន​ប្រើពេល​អស់ ២០ ឆ្នាំ ក្នុង​ការ​តាក់​តែង​សេចក្តី​ព្រាង​ច្បាប់​នេះ ជាមួយ​នឹង​ការ​បើក​សិក្ខា​សាលា​ថ្នាក់​ជាតិ​ចំនួន ៣ ​ដង​រួច​មក​​ហើយ​ដែល​មាន​អង្គ ទូត​នានា​ចូលរួម​ជជែក​ដេញ ដោល​ផងដែរ ដែល​មិនមាន​ហេតុផល​ជាក់​លាក់​ណា ក្នុង ការ​ពន្យារ​ពេល​ទៀត​នោះទេ។

លោកក៏បាន​ផ្ញើ​សារជាថ្មី​ទៅ កាន់​អង្គការ​សង្គម​ស៊ីវិលសំដៅ លើ​សមាគម និង​អង្គការ​ក្រៅ​រដ្ឋាភិបាល កុំ​ឲ្យ​បារម្ភ​ខ្លាំង​ពេក ចំពោះ​ការ​អនុម័ត​ច្បាប់​នេះ នឹង​មិន​​រឹត​ត្បិត​សិទ្ធិ​សេរីភាព​របស់​​ពួកគេ​​នោះទេ។

លោក​ថា៖ «យើង​​បាន​ទទួល​យក​ច្រើន​ណាស់​សម្រាប់​មតិយោបល់ មិន​មាន​ហេតុផល​ត្រូវ​ពន្យារ​ទៀត​ទេ ហើយ​វា​មិន​មែន​ជាការ​ចាប់​បង្ខំ​នោះ​ទេ​តែ​យើង​ធ្វើតាម​គោលការណ៍​លទ្ធិ​ប្រជាធិបតេយ្យ​នៅ​ក្នុង​មាត្រា ២៤ ពាក់ព័ន្ធ​នឹង​អព្យា​ក្រឹត​ភាព​របស់​សមាគម និង​​អង្គការ​ក្រៅ​រដ្ឋាភិបាល ខ្ញុំ​ជឿថា បើ​យើង​និយាយ​មិន​ស្រួល​ទេ គឺ​វា​អាច​រាល ប៉ុន្តែ​​បើ​យើង​មើល​ច្បាប់​គណបក្ស​នយោបាយ បើ​សិន​អង្គការ​ក្រៅ​រដ្ឋាភិបាល​ចង់​ធ្វើ​នយោបាយ គាត់​អាច​ប្រែ​ខ្លួន​ជា​គណបក្ស​នយោបាយ​បាន អត់​​មាន​ហាម​ឃាត់​ទេ តែបើ​គាត់​ធ្វើ​អង្គការ គាត់​ត្រូវ​អព្យាក្រឹត...ហើយ​​ខ្ញុំ​មិន​យល់ថា ហេតុអ្វី​​បានជា​បរទេស​មួយ ចំនួន ​ប្រឆាំង​នឹង​ច្បាប់​នេះ ច្បាប់​​នេះ ទាញ​ចេញពី​ប្រទេស​របស់​អ្នក​ឯង អ្នកឯង​មាន ម៉េច​បានជា​​កម្ពុជា​មាន​មិន​បាន?»។

ថ្លែង​ក្នុង​កិច្ចប្រជុំ​រដ្ឋសភា ពាក់​ព័ន្ធ​នឹង​ពហិការ​ចូលប្រជុំ​របស់​គណបក្ស​សង្គ្រោះ​ជាតិ លោក សួស យ៉ារ៉ា តំណាង​រាស្ត្រ​​គណបក្ស​​ប្រជាជន​បាន​លើក​ឡើង​ថា ប្រភព​ដើម​នៃ​វប្បធម៌​សន្ទនា គឺ​ការ​ចរចា​គ្នា​ដើម្បី​ដោះស្រាយ​​បញ្ហា​មិន​មែន​​ការ​បោះ​បង់​ឱកាស​ចូល​ប្រជុំ​ពិភាក្សា ហើយ​​ប្រកាស​ជំហរ​ប្រឆាំង​​នោះ​ទេ។

Content image - Phnom Penh Post
លោក​ខេមរិន្ទ្រ​ចូល​រួម​តវ៉ា​ប្រឆាំង​ច្បាប់​អង្គការ​ម្សិល​មិញ​​​។ ហេង ជីវ័ន

លោក​ថា៖«​ស្តាយ​​ណាស់ ដែល​​ពលរដ្ឋ​កម្ពុជា ​បាន​បង់ពន្ធ​ជូន​រដ្ឋ និង​យក​ប្រាក់ខែ​ជូន​អស់​លោក តែ​អស់លោក អត់​មក​អង្គុយ​តតាំង​ការពារ​ផល​ប្រយោជន៍​អង្គការ​ទេ បែរ​ជា​ប្រើ​តំណាង​រាស្រ្តម្នាក់ ឯកឧត្តម រៀល ខេមរិន្ទ្រ មក​ឈរ​ខាង​ក្រៅ ហើយ​​ចង់​ផ្លោះ​របង​ទៀត។ ទី២ ការ​លើក​ពី​អនុ​សញ្ញា​​អន្តរជាតិ លើក​​ឲ្យ​ច្បាប់​​មក​​អនុសញ្ញា​អី មាត្រា​ណា​ដែលថា​កម្ពុជា​បាន​ប្រឆាំង មិន​មែន​ស្រែក​ឡូឡា​អនាធិបតេយ្យ​នៅ​ខាង​ក្រៅ និង​ប្រមូល​ផ្តុំ​ជាមួយ​មហាជន​នោះ​ទេ!»។

តប​នឹង​ការ​លើក​ឡើង​នេះ អ្នក​នាំពាក្យ​គណបក្ស​សង្គ្រោះ​ជាតិ លោក យ៉ែម បុញ្ញ​ឫទ្ធិ ថ្លែង​​ថា វប្បធម៌​នៃ​ការសន្ទនា ដែល​ថ្នាក់​ដឹក​នាំ​បក្ស​ទាំងពីរ​ប្រកាន់​យក ​គឺជា​ការ​ស្តាប់​មតិ​យោបល់​​គ្នា​ទៅវិញ​ទៅ​មក​ហើយ​មិន​អាច​​បំបិទ​មាត់​របស់​គណបក្ស​ប្រឆាំង​បាន​នោះ​ទេ។

លោក​ថា៖ «យើង​បាន​ស្នើ​ផ្អាក​ស្នើ​ពន្យារពេល​ក្រោម​មូល​ហេតុ​ជា​ច្រើន តែ​ពួកគេ (បក្ស​ប្រជាជន) មិន​រវល់​ទេ អ៊ីចឹង​ហើយ​បានជា​យើង​ពហិការ​ប្រជុំ មិន​ចូលរួម»។

បើ​តាម​លោក បុញ្ញឫទ្ធិ គណបក្ស​សង្គ្រោះ​ជាតិ រក្សា​បន្ត​ទាមទារ​ឲ្យ​មាន​ការ​ផ្លាស់ប្តូរ​ខ្លឹមសារ​នៃ​ច្បាប់​បច្ចុប្បន្ន​នេះ ហើយ​បើ​គណបក្ស​នេះ​ជាប់​ឆ្នោត​ក្នុង​ឆ្នាំ​ ២០១៨​ នោះ​គណបក្ស​នឹង​ត្រូវ​ធ្វើ​វិសោធនកម្ម​លើ​ច្បាប់​នេះ។

ក្នុង​សេចក្តីថ្លែង​ការណ៍​របស់​ខ្លួន ចេញផ្សាយ​មួយថ្ងៃ​មុន​កិច្ច​ប្រជុំ​សភា​គណបក្ស​សង្គ្រោះ​​ជាតិ បាន​អំពាវនាវ​ដល់​រដ្ឋសភា​ឲ្យ​ទម្លាក់​ចោល​ការ​អនុម័ត​ច្បាប់​នេះ ដើម្បី​ដកឃ្លា​ពិចារណា​ឡើងវិញ ក្នុងការ​សម្រួល​សេចក្តី​ព្រាង​ច្បាប់​នេះ។

គណបក្ស​​សង្គ្រោះ​ជាតិ បាន​ពិនិត្យ​ឃើញ​ថា ខ្លឹមសារ​ទាំង​មូលនៃ​សេចក្តីព្រាង​ច្បាប់​នេះ មាន​លក្ខណៈ​គាប​សង្កត់ កម្រិត​សិទ្ធិ​សេរីភាព​បុគ្គល ក្នុងការ​សម្តែង​​មតិ និង​ក្នុង​ការ​ចូលរួម​ពី​ជីវភាព​សង្គម សេដ្ឋកិច្ច​នយោបាយ ប៉ះពាល់​ដល់​លំហ​ប្រជាធិបតេយ្យ ដែល​ផ្ទុយ​​ពី​រដ្ឋធម្មនុញ្ញ​នៃ​ព្រះរាជា​ណាចក្រ​កម្ពុជា មាត្រា ៣៥​ ផ្ទុយ​ពី​អនុសញ្ញា និង​កតិកា​សញ្ញា​​អន្តរជាតិ​ផ្សេងៗ​ទៀត ដែល​​កម្ពុជា​បាន​ចុះ​ហត្ថលេខា។

ប្រធាន​លេខា​ធិការ​ដ្ឋាន​គណៈកម្មាធិការ​​ប្រព្រឹត្តកម្ម នៃ​អង្គការ​សមាគម​ការពារ​សិទ្ធិ​មនុស្ស​កម្ពុជា លោក សួន ប៊ុន​សក្តិ​មាន​​ការ​សោក​ស្តាយ​ ចំពោះ​តំណាងរាស្ត្រ​គណបក្ស​ប្រជាជន​​ដែល​​បន្ត​ជម្នះ​អនុម័ត​លើ​ច្បាប់​ដ៏​ចម្រូងចម្រាស និង​មាន​ការ​រិតត្បិត​សេរីភាព​របស់​បុគ្គល កាល​ពី​ម្សិលមិញ​នេះ។

លោក​ថា បើ​ទោះបីជា ច្បាប់​នេះ ត្រូវ​បាន​រដ្ឋសភា​ជាតិ​អនុម័ត​ហើយ​​ក្តី តែ​សង្គម​ស៊ីវិល​ជាច្រើន នៅ​តែ​បន្ត​ជំហរ​ក្នុងការ​ទាម​ទារ​​ទៅ​កាន់​ស្ថាប័ន​ជាតិ​ផ្សេង​ទៀត ដើម្បី​ធ្វើ​វិសោធន​កម្ម ឬ​ទម្លាក់​ចោល​​ច្បាប់​បច្ចុប្បន្ន​នេះ។

លោក​ថា៖ «សង្គម​ស៊ីវិល នឹង​ស្នើ​សុំ​ឯកសារ​ច្បាប់​ផ្លូវការ​នោះ មក​ពិនិត្យមើល​ផ្នែក​ច្បាប់​បន្ថែម​ទៀត ហើយ​នឹង​រៀបចំ​យុទ្ធ​សាស្ត្រ​ក្នុង​ការ​តស៊ូ​មតិ ដើម្បី​ទាម​ទារ​ឲ្យ​ធ្វើ​វិសោធនកម្ម ឬ​ទម្លាក់​ច្បាប់​នោះ​ចោល។ ខ្ញុំ​ក៏​នឹងធ្វើ​ញត្តិ ស្នើ​​កិច្ច​អន្តរាគមន៍​ពី​តួអង្គ និង​ស្ថាប័ន​រដ្ឋ​ពាក់ព័ន្ធ បន្ទាប់​ពី​ច្បាប់​នេះ​ចេញពី​សភា ទៅ​ព្រឹទ្ធសភា ទៅ​ក្រុម​ប្រឹក្សា​ធម្មនុញ្ញ និង​ព្រះមហាក្សត្រ​ឡាយ​ព្រះហត្តលេខា ហើយ​​ក៏​នឹង​ស្នើ​សហគមន៍​អន្តរជាតិ»។

ច្បាប់​ស្តីពី​សមាគម និង​អង្គការ​មិនមែន​រដ្ឋាភិបាល​មាន ៩ ជំពូក និង​ ៣៩ ​មាត្រា និង​ត្រូវ​បាន​​កែ​សម្រួល​បន្តិច​បន្តួច នូវ​មាត្រា​មួយ​ចំនួន​ដូចជា មាត្រា ៥, ១១, ៣០ និង ៣៥ ក្រោយ​ពី​សិក្ខា​សាលា​ថ្នាក់​ជាតិ​រៀបចំ​ដោយ​រដ្ឋសភា កាល​ពី​សប្តាហ៍​មុន។

ក្រៅពី​ការ​ជំទាស់​​អនុម័ត​ច្បាប់​នេះ ពី​សំណាក់​សមាគម និង​អង្គការ​មិន​មែន​រដ្ឋា​ភិបាល​ក្នុង​ស្រុក​​មួយ​ចំនួន ក៏មាន​អង្គការ​​អន្តរជាតិ និង​សហ​គមន៍​អន្តរជាតិ ដូច​ជា សហរដ្ឋ​អាមេរិក និង​សហគមន៍​អ៊ឺរ៉ុប​ផងដែរ បាន​ព្រមាន​ពី​ការ​ខាតបង់​របស់​ប្រទេស​កម្ពុជា ប្រសិន​បើ​ច្បាប់​ស្តីពី​សមាគម និង​អង្គការ​មិន​មែន​រដ្ឋាភិបាល​បច្ចុប្បន្ន​នេះ ត្រូវបាន​អនុម័ត​ដាក់​ឲ្យ​ប្រើ​ប្រាស់​នោះ៕

អត្ថបទគួរចាប់អារម្មណ៍