.jpg)
រោងចក្រឃ្យុងស៊ីង ដែលត្រូវបានភ្លើងឆេះ ដោយសារទូស្សេខ្សែភ្លើង។ រូបថត FRPD
កណ្ដាល៖ រោងចក្រមួយឈ្មោះ ឃ្យុងស៊ីង Kyungshin ដែលស្ថិតនៅតំបន់សេដ្ឋកិច្ចពិសេស 7NG ក្នុងភូមិវិហារសួគ៌ ឃុំវិហារសួគ៌ ស្រុកខ្សាច់កណ្ដាល ខេត្តកណ្ដាល ត្រូវបានអគ្គិភ័យឆាបឆេះបណ្តាលឱ្យខូចខាតទ្រព្យសម្បត្តិមួយចំនួននៅព្រឹកថ្ងៃទី ២៤ ខែមីនានេះ។
ស្នងការនគរបាលខេត្តកណ្តាលលោក ឈឿន សុចិត្ត ប្រាប់ ភ្នំពេញ ប៉ុស្តិ៍ថា ហេតុការណ៍ភ្លើងឆេះនេះកើតឡើងនៅវេលាម៉ោង ៨ ព្រឹក បណ្តាលមកពីទូស្សេខ្សែភ្លើង។ ប៉ុន្តែត្រូវបានកម្លាំងជំនាញសណ្ដាប់ធ្នាប់ចរាចរណ៍ស្រុកខ្សាច់កណ្ដាលជួយពន្លត់ទាន់ពេលវេលា។
លោកថា៖ «ភ្លើងឆេះរលត់តាំងពីព្រឹកវាទូស្សេខ្សែភ្លើងនៅកន្លែងរោងម៉ាស៊ីនភ្លើងមួយ បន្តឆេះកន្លែងរោងបាយ ឆេះខូចម៉ាស៊ីនភ្លើង ១, ម៉ាស៊ីនស្កេនក្រយៅដៃប្រមាណ ១៥ គ្រឿង, កៅអី និងតុបាយ»។
ប៉ុន្តែបើតាមរបាយការណ៍របស់អគ្គស្នងការដ្ឋាននគរបាលជាតិបានឱ្យដឹងថា ករណីភ្លើងឆេះនេះបណ្ដាលឱ្យមានកម្មករផ្នែកជាង ១ នាក់ឈ្មោះ ភឹម រដ្ឋា ភេទប្រុស អាយុ ២៤ ឆ្នាំ រស់នៅភូមិព្រៃចាស់ ឃុំវិហារសួគ៌ ស្រុកខ្សាច់កណ្ដាល រងរបួសស្រាល។
របាយការណ៍ដែលថា ម្ចាស់រោងចក្រនេះឈ្មោះ ចាង សាងហូ ភេទប្រុស អាយុ ៤៦ ឆ្នាំ (ជាជនជាតិកូរ៉េខាងត្បូង) ដែលក្នុងរោងចក្រនេះមានកម្មករកពុងធ្វើការចំនួន ១ ៦៧៥ នាក់ ក្នុងនោះមានស្រីចំនួន ១ ៣១៨ នាក់។
ទោះជាយ៉ាងណា បើតាមលោក សុចិត្ត ការឆេះនេះត្រូវបានខាងរោងចក្រ 7NG បានប្រើប្រាស់ឡានទឹករបស់ខ្លួនចំនួន ២ គ្រឿង និងប្រើរថយន្តពន្លត់អគ្គិភ័យស្រុកខ្សាច់កណ្ដាល ១ គ្រឿង សហការពន្លត់រលត់អស់ហើយ៕
