ភ្នំពេញៈ សាធារណរដ្ឋឆែកដែលជាប្រទេសមួយនៅក្នុងសហភាពអឺរ៉ុបមានគម្រោងធ្វើកិច្ចសហប្រតិបត្តិការជាមួយកម្ពុជាលើវិស័យជាច្រើន ខណៈដែលលោកនាយករដ្ឋមន្ត្រី ហ៊ុន សែន នឹងដឹកនាំគណៈប្រតិភូទៅបំពេញទស្សនកិច្ចជាផ្លូវការរយៈពេល ២ ថ្ងៃ នៅប្រទេសនេះ គឺចាប់ពីថ្ងៃទី ១៣ ដល់ថ្ងៃទី ១៤ ខែតុលាខាងមុខ ដើម្បីពង្រឹងទំនាក់ទំនងរវាងប្រទេសទាំង ២។
ក្រសួងការបរទេស និងសហប្រតិបត្តិការអន្តរជាតិបានប្រកាសឱ្យដឹងអំពីដំណើរទស្សនកិច្ចរបស់លោក ហ៊ុន សែន ទៅកាន់សាធារណរដ្ឋឆែកនេះគឺបន្ទាប់ពីលោក Marek Libricky ឯកអគ្គរដ្ឋទូតឆែកប្រចាំកម្ពុជាបានជួបពិភាក្សាគ្នាជាមួយលោក ប្រាក់ សុខុន រដ្ឋមន្ត្រីក្រសួងការបរទេសកាលពីថ្ងៃទី ១៨ ខែ កញ្ញា។ ប៉ុន្តែក្រសួងការបរទេសមិនទាន់បញ្ជាក់ថា តើលោក ហ៊ុន សែន នឹងជួបជាមួយមេដឹកនាំរូបណាខ្លះនៃសាធារណរដ្ឋឆែកនោះទេ។
លោក កេត សោផាន់ អ្នកនាំពាក្យក្រសួងការបរទេសបានថ្លែងយ៉ាងខ្លីពីម្សិលមិញថា ក្រសួងកំពុងរៀបចំពីដំណើរទស្សនកិច្ចនេះ ខណៈលោក ផៃ ស៊ីផាន អ្នកនាំពាក្យរដ្ឋាភិបាលថ្លែងថា លោកមិនបានដឹងច្បាស់ពីដំណើរទស្សនកិច្ចរបស់លោក ហ៊ុន សែន នេះទេ។
លោក Marek Libricky បានលើកឡើងនៅក្នុងជំនួបជាមួយលោក ប្រាក់ សុខុន ថា សាធារណរដ្ឋឆែកបានចាត់ទុកកម្ពុជាគឺជាមិត្តដ៏ជិតស្និទ្ធហើយលោកនឹងខិតខំធ្វើយ៉ាងណា ដើម្បីជំរុញទំនាក់ទំនងរវាងប្រទេសទាំង ២ ឱ្យកាន់តែជិតស្និទ្ធបន្ថែមទៀត និងមានកិច្ចសហប្រតិបត្តិការល្អលើគ្រប់វិស័យ។
លោកបន្តថា កិច្ចសហប្រតិបត្តិការរវាងកម្ពុជា និងឆែកគឺផ្ដោតសំខាន់លើកិច្ចសហប្រតិបត្តិការអភិវឌ្ឍន៍ ខណៈឆែកបានជ្រើសរើសកម្ពុជាជាប្រទេស ១ ក្នុងចំណោមប្រទេស ៦ ផ្សេងទៀតសម្រាប់កិច្ចសហប្រតិបត្តិការអភិវឌ្ឍន៍ដែលជាកិច្ចសហប្រតិបត្តិការថ្មីមួយខុសពីកិច្ចសហប្រតិបត្តិការផ្ដល់ជំនួយអភិវឌ្ឍន៍កន្លងមក។
លោកថា៖ «(កម្ពុជា-ឆែក) នឹងមានគម្រោងកិច្ចសហប្រតិបត្តិការលើវិស័យជាច្រើន រួមមានសុខាភិបាល កសិកម្ម ការពារជាតិ អាកាសចរណ៍ បរិស្ថាន ទឹកស្អាត ស្ថានីយចម្រោះទឹកកខ្វក់ ទេសចរណ៍បៃតង។ល។ សម្រាប់វិស័យសុខាភិបាលភាគីឆែកមានគម្រោងបើកមន្ទីរពេទ្យទំនើបមួយនៅពេលខាងមុខ ហើយបច្ចុប្បន្នភាគីឆែកកំពុងពិភាក្សាលើកិច្ចសហប្រតិបត្តិការនេះជាមួយភាគីកម្ពុជា»។
ចំណែកលោក ប្រាក់ សុខុន ក៏បានលើកឡើងក្នុងជំនួបនោះដែរថា កម្ពុជាមានវិស័យអាទិភាពប្រកបដោយសក្ដានុពលច្រើនក្នុងការវិនិយោគផ្ទាល់ពីបរទេស ហើយលោកគាំទ្រចំពោះគំនិតផ្ដួចផ្ដើមរបស់ប្រទេសឆែកដែលចង់រួមគ្នាបង្កើតមន្ទីរពេទ្យដែលមានគុណភាពនៅកម្ពុជា។
បន្ថែមពីនេះលោក ប្រាក់ សុខុន ក៏ចង់ឱ្យសាធារណរដ្ឋឆែកសិក្សាពីការសាងសង់ខ្សែបណ្ដាញអគ្គិសនីពីប្រទេសឡាវមកកម្ពុជា បន្ទាប់ពីកម្ពុជាទើបបានចុះកិច្ចព្រមព្រៀងដើម្បីទិញថាមពលពីប្រទេសឡាវចំនួន ២៩០០ មេហ្គាវ៉ាត់ដើម្បីបំពេញការខ្វះខាតនៅក្នុងប្រទេសនាពេលថ្មីៗនេះរួមទាំងឱ្យប្រទេសឆែក ពិនិត្យលទ្ធភាពវិនិយោគលើថាមពលកកើតថ្មី។
លោករដ្ឋមន្ត្រីក៏លើកឡើងពីកិច្ចសហប្រតិបត្តិការជាមួយភាគីឆែកលើវិស័យកសិកម្ម និងទេសចរណ៍ផងដែរ។ លោកថា៖ «កិច្ចសហប្រតិបត្តិការជាមួយភាគីឆែកក្នុងក្របខ័ណ្ឌថ្មីនេះនឹងនាំមកនូវថាមភាពថ្មីៗបន្ថែមទៀតសម្រាប់ការអភិវឌ្ឍប្រទេសកម្ពុជា»។
បើតាមលោក ប្រាក់ សុខុន កម្ពុជា និងឆែកមានចំណងមិត្តភាពជាប្រពៃណីតាំងពីទសវត្សរ៍ទី ៥០ ហើយភាគីទាំង ២ តែងពង្រីកទំនាក់ទំនងនេះជាបន្តបន្ទាប់រហូតដល់ពេលបច្ចុប្បន្ន។ លោកក៏បានអរគុណដល់ប្រទេស ឆែក ដែលបានលុបបំណុលដែលកម្ពុជាជំពាក់ដោយបានបង្វែរបំណុលនោះទៅជាជំនួយសម្រាប់អភិវឌ្ឍន៍វិញ ដែលលោកចាត់ទុកថា ជាគំរូល្អមួយសម្រាប់ប្រទេសផ្សេងទៀត។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាថ្លែងថា ថ្វីដ្បិតកម្ពុជារងការរិះគន់អំពីបញ្ហាសិទ្ធិមនុស្ស និងនយោបាយពីសហភាពអឺរ៉ុបក្ដី ប៉ុន្តែទំនាក់ទំនងកម្ពុជា-ឆែកគឺត្រូវញែកឱ្យដាច់ពីទំនាក់ទំនងកម្ពុជា-អឺរ៉ុប។
លោកបន្តថា នៅក្នុងចំណោមប្រទេសអឺរ៉ុបទាំងអស់គឺមានប្រទេសសមាជិកខ្លះមានទំនាក់ទំនងធម្មតាជាមួយកម្ពុជា ហើយប្រទេសខ្លះទៀតគឺមានទំនាក់ទំនងល្អជាមួយកម្ពុជា ថ្វីបើសហភាពអឺរ៉ុប និងកម្ពុជានៅមិនទាន់យល់ពីគ្នាពាក់ព័ន្ធនឹងបញ្ហាសិទ្ធិមនុស្ស និងនយោបាយក្ដី។
លោកថា៖ «ឆែកជាអតីតប្រទេសឆេកូស្លូវ៉ាគីហើយក្រោយមកបានបំបែកជា ២ ប្រទេសគឺ ឆែក និងស្លូវ៉ាគឺ។ អ៊ីចឹង! ប្រទេសហ្នឹងមានទំនាក់ទំនងល្អជាមួយកម្ពុជាយូរដែរហើយតាំងពីសម័យប្រទេសឆេកូស្លូវ៉ាគី ស្ថិតជារដ្ឋសង្គមនិយមដូចកម្ពុជាដែរគឺក្នុងដំណាក់កាលឆ្នាំ ១៩៧៩ ដល់ឆ្នាំ ១៩៨៩។ អ៊ីចឹង!ទំនាក់ទំនងជាប្រពៃណីបានបន្តរហូតមក បើទោះបីជាឆែក និងស្លូវ៉ាគីបានបែកជា ២ ប្រទេសក៏ដោយ»៕