The Phnom Penh Post Search

Search form

Logo of Phnom Penh Post newspaper Phnom Penh Post - ឆ្នាំ​នេះ​ដំណាំ​ពោត​អាច​ទទួល​បាន​ផល​ល្អ

ឆ្នាំ​នេះ​ដំណាំ​ពោត​អាច​ទទួល​បាន​ផល​ល្អ

ឆ្នាំ​នេះ​ដំណាំ​ពោត​អាច​ទទួល​បាន​ផល​ល្អ

Content image - Phnom Penh Post
(អង្គុយលើអង្រឹង) ជាព្រះមេហួរ ក្នុងព្រះរាជពិធីច្រត់ព្រះនង្គ័ល កាលពីម្សិលមិញ ហេង ជីវ័ន
Content image - Phnom Penh Post
ព្រះមហាក្សត្រនរោត្តម សីហមុនី យាងជាព្រះរាជអធិបតី ក្នុងព្រះរាជពិធីច្រត់ព្រះនង្គ័ល ហេង ជីវ័ន
Content image - Phnom Penh Post
ក្បួនដង្ហែស្តេចមាឃ នៅក្នុងព្រះរាជពិធីច្រត់ព្រះនង្គ័ល នៅទីរួមខេត្តកំពង់ចាមកាលពីម្សិលមិញ ហេង ជីវ័ន
Content image - Phnom Penh Post
ប្រជាពលរដ្ឋដែលចូលរួមនៅក្នុងព្រះរាជពិធីច្រត់ព្រះនង្គ័ល រង់ចាំអ៊ុតមើលលទ្ធផល ខណៈគោឧសភរាជកំពុងបរិភោគគ្រឿងតង្វាយទាំង៧មុខមានដូចជា ស្រូវ ពោត សណ្ដែក ល្ង ស្មៅ ទឹក និងស្រា ហេង ជីវ័ន
Content image - Phnom Penh Post
ក្បួនដង្ហែភ្ជួរព្រះស្រែ នៅក្នុងព្រះរាជពិធីច្រត់ព្រះនង្គ័ល កាលពីម្សិលមិញ ហេង ជីវ័ន

កំពង់ចាមៈ ដំណាំ​ពោត​នៅ​ឆ្នាំ​នេះ អាច​នឹង​ទទួល​បាន​ទិន្នផល​យ៉ាង​គាប់​ប្រសើរ បើ​ធៀប​ទៅ​នឹង​ដំណាំ​ផ្សេងៗ រួម​មាន​ស្រូវ សណ្ដែក ល្ង និង​ដំណាំ​រួម​ផ្សំ​មួយ​ចំនួន​ទៀត។ នេះ​បើ​ផ្អែក​លើ​ការ​ផ្សង​ប្រផ្នូល ក្នុង​ព្រះ​រាជ​ពិធី​ច្រត់​ព្រះ​នង្គ័ល​ដែល​ធ្វើ​ឡើង​នៅ​ទី​រួម​ខេត្ត​កំពង់ចាម​កាល​ពី​ព្រឹក​ម្សិលមិញ។

នៅ​ក្នុង​ព្រះ​រាជ​ពិធី​នេះ គោ​ឧសភរាជ​មួយ​នឹម បាន​បរិភោគ​តែ​ពោត​ប៉ុណ្ណោះ​ក្នុង​ចំណោម​អាហារ ៧ មុខ ដែល​ត្រូវ​បាន​គេ​រៀប​ដាក់​នៅ​លើ​ថាស​ទម្រ​ដោយ​ជើង​ពាន ដ៏​ប្រណីត​។ ព្រះ​រាជ​ពិធី​បុណ្យ​ច្រត់​ព្រះ​នង្គ័ល ជា​រឿយៗ ត្រូវ​បាន​គេ​រៀប​ចំ​ធ្វើ​នៅ​លើ​ទីវាល​ព្រះ​មេរុ​ហៅ​វាល​ព្រះ​ស្រែ​ស្ថិត​នៅ​ភាគ​ខាង​ជើង​ជាប់​ព្រះ​បរម​រាជវាំង​ក្នុង​រាជធានី​ភ្នំពេញ​។ សម្រាប់​ឆ្នាំ​នេះ ព្រះ​រាជ​ពិធី​បុណ្យ​ច្រត់​ព្រះ​នង្គ័ល​នេះ ត្រូវ​បាន​ប្រារព្ធ​ធ្វើ​នៅ​លើ​ទីលាន​បាល់​ទាត់ ខេត្ត​កំពង់ចាម ក្រោម​ព្រះ​រាជា​ធិបតីភាព​ដ៏​ខ្ពង់​ខ្ពស់​របស់​ព្រះ​មហាក្សត្រ សម្តេច​ព្រះ​បរមនាថ នរោត្តម សីហមុនី និង​មន្ត្រី​ជាន់​ខ្ពស់​រាជ​រដ្ឋាភិបាល ព្រឹទ្ធសភា រដ្ឋសភា ព្រម​ទាំង​អ្នក​មុខ​អ្នក​ការ និង​ប្រជា​នុរាស្ត្រ​រាប់​ពាន់​នាក់​។ ក្នុង​ព្រឹត្តិការណ៍​នេះ លោក លន់ លឹមថៃ អភិបាល​ខេត្ត​កំពង់ចាម ត្រូវ​បាន​តែង​តាំង​ជា​ស្តេច​មាឃ (តំណាង​ឲ្យ​ព្រះ​មហាក្សត្រ) ជា​អ្នក​កាន់​ព្រះ​នង្គ័ល​ភ្ជួរ​រាស់​ទី​ព្រះ​ស្រែ និង​លោក​ស្រី ស្រ៊ុន ណាង ដែល​ជា​ភរិយា​របស់​លោក​ធ្វើ​ជា​ព្រះ​មេហួរ​(តំណាង​ឲ្យ​ព្រះ​មហាក្សត្រិយ៍) ជា​អ្នក​សាប​ព្រោះ​នូវ​គ្រាប់​ពូជ។

បន្ទាប់​ពី​ការ​ភ្ជួរ​រាស់ និង​សាប​ព្រោះ​ស្រូវ ពោត សណ្តែក ល្ង ជា​និមិត្ត​រូប ចំនួន ៣ជុំ នៅ​វាល​ព្រះ​ស្រែ ក្នុង​ទីលាន​បាល់​ទាត់ នៃ​ទី​រួម​ខេត្ត​កំពង់ចាម នា​ព្រឹក​ម្សិលមិញ ក្រុម​អ្នក​រៀប​ចំ​ពិធី​បាន​ដឹក​គោ​ឧសភរាជ​ចំនួន ២ ក្បាល ដើម្បី​ឲ្យ​បរិភោគ​វត្ថុ​៧​មុខ រួម​មាន៖ស្រូវ ពោត សណ្តែក ល្ង ស្មៅ ទឹក និង​ស្រា ហើយ​ក្រុម​អាច្ចារ្យ​ព្រាហ្មណ៍​បុរោហិត បាន​ធ្វើ​ការ​កត់​ត្រា ដើម្បី​ព្យាករណ៍​អំពី​លទ្ធផល​នៃ​ការ​ដាំ​ដុះ​ក្នុង​រដូវ​វស្សា​ឆ្នាំ​នេះ។

គ្រឿង​តង្វាយ​ទាំង​៧មុខ​នោះ តំណាង​ឲ្យ​ភាព​សម្បូរ​សប្បាយ និង​ភាព​កោលាហល​ក្នុង​សង្គម ដោយ​ស្មៅ និង​ស្រា តំណាង​ឲ្យ​ជំងឺ​រាត​ត្បាត និង​ភាព​អន្តរាយ ដូច្នេះ​នៅ​ក្នុង​ការ​ព្យាករ ក្រុម​ព្រាហ្មណ៍​បុរោហិត ត្រូវ​ត្រួត​ពិនិត្យ​ដោយ​យក​ចិត្ត​ទុក​ដាក់ ទៅ​លើ​លទ្ធផល ដែល​គោ​ឧសភរាជ​ទាំង​ពីរ បរិភោគ​អាហារ​ដែល​ជា​គ្រឿង​តង្វាយ​ទាំង​៧​មុខ​ខាង​លើ។ ជា​លទ្ធផល នៅ​ក្នុង​ព្រឹត្តិការណ៍​នៃ​ពិធី​ច្រត់​ព្រះ​នង្គ័ល​ឆ្នាំ​នេះ គោ​ឧសភរាជ បាន​បរិភោគ​តែ​ពោត​មួយ​មុខ​គត់​ហើយ​ក្នុង​ខណៈ​នោះ សម្តេច​ព្រះ​រាជ​គ្រូ​ព្រាហ្មណ៍​បុរោហិត កង កេង បាន​ទូល​ថ្វាយ និង​ជម្រាប​ជូន​អង្គពិធី​ថា តាម​រយៈ​ការ​ផ្សង​ប្រផ្នូល​នៃ​ការ​បរិភោគ​របស់​គោ​ឧសភរាជ នាំ​ឲ្យ​មាន​ការ​ព្យាករ​ថា ក្នុង​ឆ្នាំ​នេះ «ពោត» នឹង​ទទួល​បាន​ទិន្នផល​ល្អ​ប្រសើរ។

លោក​បាន​ថ្លែង​ថា​៖ «ទោះ​ជា​បែប​ណា​ក្ដី នេះ​គ្រាន់​តែ​ជា​ការ​ផ្សង​ប្រផ្នូល ទៅ​តាម​ទំនៀម​ទម្លាប់​ព្រះ​រាជ​បវេណី នៃ​ព្រះ​រាជ​ពិធី​ច្រត់​ព្រះ​នង្គ័ល ដែល​ខ្មែរ​មាន​តាំង​ពី​បុរាណ​កាល​មក​ប៉ុណ្ណោះ ក៏​ដូច​ជា​ការ​ប្រកាស​ថា រដូវ​វប្បមង្គល​បាន​ចូល​មក​ដល់​ហើយ»។

ជាមួយ​គ្នា​នេះ អ្នក​ជំនាញ​ផ្នែក​កសិកម្ម នៃ​ក្រសួង​កសិកម្ម បាន​អំពាវនាវ​សុំ​ឲ្យ​ប្រជា​កសិករ​ទាំង​អស់​បង្កើន​ការ​យក​ចិត្ត​ទុក​ដាក់​បន្ថែម​ទៀត ទៅ​លើ​ការងារ​បច្ចេកទេស​នៃ​ការ​ធ្វើ​ស្រែ ដើម្បី​ឆ្លើយ​តប​ទៅ​នឹង​គោល​នយោបាយ​របស់​រាជ​រដ្ឋាភិបាល ក្នុង​ការ​នាំ​ចេញ​អង្ករ​ឲ្យ​បាន​មួយ​លាន​តោន​នៅ​ក្នុង​ដំណាច់​ឆ្នាំ​២០១៥​ខាង​មុខ។

លោក បណ្ឌិត ហ៊ាន វណ្ណហន អនុ​ប្រធាន​អគ្គ​នាយកដ្ឋាន​កសិកម្ម នៃ​ក្រសួង​កសិកម្ម បាន​មាន​ប្រសាសន៍​កាល​ពី​ម្សិលមិញ​ថា ការ​ព្យាករ​តាម​បែប​ប្រពៃណី​ទំនៀម​ទម្លាប់​ពី​បុរាណ​ឬ​ការ​ព្យាករ​តាម​បែបប​ច្ចេកទេស​វិទ្យាសាស្ត្រ នៅ​មិន​អាច​មាន​ភាព​ប្រាកដ​ប្រជា​១០០​ភាគរយ​ទេ។

លោក​បាន​លើក​ឡើង​ផង​ដែរ​ថា តាំង​ពី​បុរាណ​មក មាន​ការ​និយាយ​ព្យាករណ៍​តៗ​គ្នា​មក​ថា ឆ្នាំ​រោង គឺ​ឆ្នាំ​មុន​នេះ​មាន​ទឹក​ធំ​[ទឹក​ជំនន់] ហើយ​ការ​ព្យាករ​តាម​លក្ខណៈ​វិទ្យាសាស្ត្រ​របស់​ក្រសួង​ធនធាន​ទឹក និង​ឧតុនិយម ក៏​បាន​អះ​អាង​ផង​ដែរ​ថា មាន​ទឹក​ធំ​ក្នុង​ឆ្នាំ​២០១២ ដែល​ការ​ព្យាករ​នោះ​បាន​ធ្វើ​ឲ្យ​ប្រជា​កសិករ​មួយ​ចំនួន​ដែល​រស់​នៅ​តាម​ដង​ទន្លេ និង​វាល​ទំនាប​មាន​ការ​បារម្ភ​និង​មិន​បាន​ធ្វើ​ការ​ដាំដុះ​ដំណាំ​ស្រូវ ឬ ដំណាំ​រួម​ផ្សំ​អ្វី​ផ្សេង​ទៀត​នោះ​ទេ។ ប៉ុន្តែ​ទី​បំផុត​បែរ​ជា​ជួប​ភាព​រាំង​ស្ងួត​ទៅ​វិញ។ ដូច្នេះ​ប្រជា​កសិករ​គួរ​គិត​ពិចារណា ទៅ​លើ​ការងារ​ដាំ​ដុះ​របស់​ខ្លួន​ថា តើ​គួរ​ដាំ​ពោត​តែ​មួយ​មុខ តាម​ការ​ព្យាករ​ដែល​បាន​មក​ពី​ការ​ផ្សង​ប្រផ្នូល លើ​ការ​បរិភោគ​របស់​គោ​ឧសភរាជ ឬ​ត្រូវ​ដាំ​ដំណាំ​ស្រូវ និង​ដំណាំ​រួម​ផ្សំ​ផ្សេង​ទៀត ដើម្បី​ឆ្លើយ​តប​ទៅ​នឹង​តម្រូវ​ការ​ទីផ្សារ​ក្នុង​ស្រុក​ក្នុង​តំបន់ និង​អន្តរជាតិ។

លោក​ថ្លែង​ថា៖«​បច្ចុប្បន្ន ទី​ផ្សារ​ពិភពលោក​កំពុង​មាន​តម្រូវ​ការ​ខ្ពស់​បំផុត​លើ​ស្រូវ អង្ករ បន្ទាប់​មក​គឺ​ពោត និង​សណ្ដែក​សៀង»។ លោក​បាន​បន្ថែម​ថា ការ​ត្រៀម​លក្ខណ​សម្បត្តិ​ប្រុង​ប្រៀប​រៀប​ចំ​ការងារ​បង្កប​ង្កើន​ផល បាន​ល្អ ដោយ​រាប់​ចាប់​តាំង​ពី​ការ​ជ្រើសរើស​ពូជ ការ​ភ្ជួរ​រាស់​ពង្រាប​ថ្នាល​និង​ដី​ស្រែ និង​ការ​ថែទាំ​ដាក់​ទឹក​ជី និង​ការ​សម្អាត​ស្មៅ គឺ​ធ្វើ​ឲ្យ​ការ​ប្រមូល​ផល​នឹង​ទទួល​បាន​នូវ​បរិមាណ​ផល​ខ្ពស់។ លោក​បាន​បន្ត​ថា​៖​«បច្ចុប្បន្ន ដើម្បី​សម្រេច​តាម​ផែនការ​របស់​រាជ​រដ្ឋាភិបាល ក្នុង​ការ​នាំ​ចេញ​អង្ករ​មួយ​លាន​តោន​ក្នុង​ឆ្នាំ​២០១៥ និង​ដើម្បី​លើក​ស្ទួយ​កម្រិត​ជីវភាព​របស់​ប្រជា​កសិករ ក្រសួង​បាន​និង​កំពុង​ជំរុញ​ឲ្យ​កសិករ​ដាំ​ដុះ​ដំណាំ​ស្រូវ​ដោយ​ប្រើ​ប្រាស់​នូវ​ពូជ​ប្រភេទ​ថ្មី ដែល​មាន​គុណភាព​ខ្ពស់ និង​បរិមាណ​ផល​ច្រើន»។

បច្ចុប្បន្ន ប្រជា​កសិករ​នៅ​តាម​បណ្ដា​ខេត្ត​មួយ​ចំនួន​បាន​ចាប់​ផ្ដើម​ការងារ​បង្ក​បង្កើន​ផល​ស្រូវ​ជា​បណ្ដើរៗ​ហើយ​បន្ទាប់​ពី​ភ្លៀង​បាន​ធ្លាក់​កាល​ពី​ចុង​ខែ​មេសា៕

អត្ថបទគួរចាប់អារម្មណ៍