.jpg)
ក្រុមគ្រូពេទ្យកំពុងត្រួតពិនិត្យរកអ្នកឆ្លងកូវីដ។ រូបថត CDC
ភ្នំពេញៈ លោកនាយករដ្ឋមន្ត្រី ហ៊ុន សែន បានសម្រេចឱ្យក្រសួងបញ្ចូលក្របខ័ណ្ឌគ្រូពេទ្យនឹងត្រូវបង្កើនដល់ទៅ ៣ ០០០ នាក់ សម្រាប់ឆ្នាំ ២០២១ ខណៈដែលកម្ពុជាពង្រឹងការប្រយុទ្ធនឹងជំងឺកូវីដ ១៩។
លោកនាយករដ្ឋមន្ត្រីបានបញ្ជាក់ដូច្នេះកាលពីថ្ងៃទី ២៩ ធ្នូ នៅពេលដែលលោកថ្លែងទៅកាន់ជនរួមជាតិក្នុងការបិទបញ្ចប់ព្រឹត្តិការណ៍ឆ្លងកូវីដសហគមន៍ ២៨ វិច្ឆិកា។ លោកមានប្រសាសន៍ថា លោកបានទូរស័ព្ទទៅលោក ម៉ម ប៊ុនហេង រដ្ឋមន្ត្រីក្រសួងសុខាភិបាលដើម្បីពិភាក្សាអំពីចំនួនគ្រូពេទ្យ ដែលត្រូវការដោយលោក ម៉ម ប៊ុនហេង បានប្រាប់លោកថា ក្រសួងសុខាភិបាលត្រូវការគ្រូពេទ្យប្រមាណ ៥ ០០០ នាក់។
ប៉ុន្តែលោកនាយករដ្ឋមន្ត្រីសម្រេចថានៅឆ្នាំ ២០២១ ការបញ្ចូលក្របខ័ណ្ឌពេទ្យមានចំនួន ៣ ០០០ នាក់សិន។ ក្រុមគ្រូពេទ្យនឹងបង្កើនសមត្ថភាពមុននឹងដាក់ពង្រាយទៅតាមគោលដៅ។
លោកបន្តថា៖ «អ៊ីចឹងទេសូមបញ្ជាក់ជូនថា ក្របខ័ណ្ឌថ្មីប្រគល់ជូន ៣ ០០០ នាក់ សម្រាប់ឆ្នាំ ២០២១។ បើសិនជានៅខ្វះ យើងនឹងគិតគូរបន្ថែមទៀត និងរៀបចំការដាក់ពង្រាយយ៉ាងណា ដើម្បីឱ្យទៅតាមដែលយើងអាចដោះស្រាយបានបញ្ហា។ ប៉ុន្តែខ្ញុំសុំផ្ដាំថា គ្រូពេទ្យដែលជ្រើសរើសនេះជាគ្រូពេទ្យដែលហ៊ានចូលប្រយុទ្ធជាមួយនឹងកូវីដ ១៩។ នេះជាលក្ខខណ្ឌតម្រូវ»។
លោកបន្តថា៖ «ពិតហើយគ្មានអ្នកណាមានជំនាញប្រយុទ្ធជាមួយកូវីដ ១៩ ទេ។ គ្រូពេទ្យដែលយើងប្រើកន្លងទៅកូវីដ១៩ទើបតែកើត តែពេទ្យយើងបានកើតយូរហើយ។ ប៉ុន្តែសួរថា ហ៊ានចូលប្រយុទ្ធ ឬមិនហ៊ាន ហើយយើងបានណែនាំអំពីរបៀបជ្រើសរើសយ៉ាងណារួចហើយ ខ្ញុំបានយល់ព្រមជាលាយលក្ខណ៍អក្សររួចហើយ»។
កាលពីខែវិច្ឆិកា ក្រសួងមុខងារសាធារណៈបានប្រកាសពីការបែងចែកក្របខ័ណ្ឌមន្ត្រីរាជការស៊ីវិលតាមក្រសួងនានាសរុបជាង ៦ ០០០ កន្លែង ដែលក្នុងនោះ ក្រសួងសុខាភិបាលនឹងត្រូវជ្រើសរើស ១ ៣០០ នាក់។ ប៉ុន្តែចំនួនក្របខ័ណ្ឌ ១ ៣០០ កន្លែង សម្រាប់ក្រសួងសុខាភិបាលនឹងត្រូវបង្កើនដល់ ៣ ០០០ កន្លែង តាមអនុសាសន៍របស់លោកនាយករដ្ឋមន្ត្រី។ នេះបើតាមលោក យក់ ប៊ុនណា អ្នកនាំពាក្យក្រសួងមុខងារសាធារណៈ។
លោកមានប្រសាសន៍ថា៖ «ផ្អែកលើការគ្រោងទុកយើងនឹងដំឡើងពី ១ ៣០០ ទៅ ៣ ០០០ នាក់ ដើម្បីគាំទ្រវិស័យសុខាភិបាល។ នៅក្នុងចំណោម ៣ ០០០ នាក់ យើងផ្ដោតភាគច្រើនទៅលើគ្រូពេទ្យសម្រាប់បម្រើក្នុងវិស័យសុខាភិបាល ប៉ុន្តែក៏អាចមានមន្ត្រីជំនាញចាំបាច់មួយចំនួននៅក្នុងវិស័យហ្នឹងដែរ»។
លោកបញ្ជាក់ថា ក្រសួង ៣ កំពុងធ្វើកិច្ចការជ្រើសរើសនេះរួមមានក្រសួងសុខាភិបាល ក្រសួងមុខងារសាធារណៈ និងក្រសួងសេដ្ឋកិច្ច និងហិរញ្ញវត្ថុ។ ការជ្រើសរើសនឹងចេញដោយក្រសួងសុខាភិបាល ចំណែកក្រសួងមុខងារសាធារណៈនឹងចូលរួមក្នុងការពិនិត្យតាមដានគោលការណ៍ដែលរដ្ឋាភិបាលបានសម្រេច និងនីតិវិធីនៃការជ្រើសរើសមន្ត្រី។
កាលពីថ្ងៃទី ១៥ ធ្នូ លោក ហ៊ុន សែន បានផ្ដល់អនុសាសន៍ឱ្យបញ្ចូលក្របខ័ណ្ឌសម្រាប់ក្រុមគ្រូពេទ្យស្ម័គ្រចិត្តដែលស្ម័គ្រចិត្តចូលរួមប្រយុទ្ធនឹងជំងឺកូវីដ ១៩។
លោក ទាវ សុធារ័ត្ន ដែលបានបញ្ចប់ការសិក្សាបរិញ្ញាបត្រផ្នែកថែទាំវេជ្ជសាស្ត្រពីសាកលវិទ្យាល័យមួយនៅក្រុងបាងកកប្រទេសថៃបានចូលរួមក្នុងនាមគ្រូពេទ្យស្ម័គ្រចិត្ត ប្រយុទ្ធនឹងកូវីដ១៩។ ជាបទពិសោធចូលរួមទប់ស្កាត់កូវីដ១៩ លោក សុធារ័ត្ន ធ្លាប់បានចុះទៅយកសំណាកនៅអាកាសយានដ្ឋាននៅស្តាតអូឡាំពិក និងនៅតាមមូលដ្ឋានផ្សេងៗតាមការចាត់តាំង។ ក្រៅពីកិច្ចការនេះលោកបម្រើការនៅមន្ទីរសុខាភិបាល ខេត្តមណ្ឌលគិរី និងនៅគ្លីនិកមួយនៅខេត្តនេះ។
សុធារ័ត្ន និយាយថា៖ «អត់ខ្លាចទៅនឹងបញ្ហាហ្នឹងទេ សំខាន់គឺយើងការពារខ្លួន។ និយាយរួម គ្រាន់តែក្រសួងប្រកាសភ្លាម ខ្ញុំស្ម័គ្រចិត្តភ្លែត ព្រោះដោយសារតែខ្ញុំមើលឃើញថា យើងត្រូវមានការការពារខ្លួនមានទំនុកចិត្តលើខ្លួនឯង។ ណាមួយយើងចង់បម្រើពលរដ្ឋយើងផង ហើយគាប់ជួនខ្ញុំរៀនចប់ហើយ ខ្ញុំក៏ស្ម័គ្រចិត្តតែម្ដង»។
លោកបញ្ជាក់ថា បន្ទាប់ពីបានចូលបម្រើជាគ្រូពេទ្យស្ម័គ្រចិត្ត ប្រយុទ្ធនឹងកូវីដលោកទទួលបានការបណ្ដុះបណ្ដាលជាច្រើនពីក្រសួងសុខាភិបាលដូចជាការស្លៀកពាក់ ការការពារសុវត្ថិភាពផ្ទាល់ខ្លួន ក្នុងពេលចុះបេសកកម្ម។ លោកនឹងប្រឡងចូលក្របខ័ណ្ឌនេះដើម្បីចូលរួមប្រយុទ្ធនឹងកូវីដ ១៩ ដោយមិនមានការភ័យខ្លាច។ «ខ្ញុំបានត្រៀមឯកសាររួចរាល់ហើយ នៅពេលក្រសួងចេញប្រកាសអំពីការប្រឡងជ្រើសរើស ខ្ញុំនឹងដាក់ភ្លាម។ សម្រាប់ខ្ញុំពេលដែលប្រឡងជាប់ហើយ បើរដ្ឋបញ្ជូនទៅខាងកូវីដខ្ញុំនឹងទៅតាមហ្នឹង ខ្ញុំអត់មានរួញរាទេ សំខាន់សមត្ថភាពយើងអាចប្រឡងជាប់ឬអត់?»៕
