ព្រះសីហនុៈ ឆ្នេរសមុទ្រក្នុងតំបន់ពយម៉ាចូវដែលមានទីតាំងក្នុងភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ ត្រូវបានគេរាយការណ៍ថាមានគ្រួសារដ៏មានឥទ្ធិពលម្នាក់កំពុងសង់របងថ្មហ៊ុមព័ទ្ធយកធ្វើជាកម្មសិទ្ធិផ្ទាល់ខ្លួនដោយពុំខ្វល់ខ្វាយអំពី បម្រាមរបស់អាជ្ញាធរខេត្តឡើយ។
ក្រុមអ្នកភូមិសុំមិនបញ្ចេញឈ្មោះបាននិយាយថាដីចំណីឆ្នេរសមុទ្រក្នុងតំបន់នេះមិនត្រូវបានអាជ្ញាធរចេញប្លង់កម្មសិទ្ធិឲ្យនោះទេនិងហាមឃាត់លក់ដូរឬផ្ទេរកម្មសិទ្ធិទៀតផងបើទោះជាអ្នកភូមិខ្លះបានរស់នៅក្នុងតំបន់នោះជាយូរឆ្នាំមកហើយក្ដី។
ប៉ុន្តែថ្មីៗនេះ មានគ្រួសារដ៏មានឥទ្ធិពលម្នាក់ឈ្មោះ ប៉េង ជា បានសាងសង់របងថ្មហ៊ុមព័ទ្ធយកអស់ជាច្រើនហិកតា (របងដែលសង់ស្របតាមបណ្ដោយឆ្នេរប្រវែងជិត២០០០ម៉ែត្រនិងជម្រៅមានប្រវែងចន្លោះពី៥០ម៉ែត្រទៅ ៦០ ម៉ែត្រ)។
ជុំវិញករណីនេះ លោក សរ កក្កដា អភិបាលស្រុកព្រៃនប់ បានទទួលស្គាល់ថា ពិតជាមានករណីនេះកើតមានមែន ហើយ លោកកំពុងចុះពិនិត្យអង្កេត ស្រាវជ្រាវអំពីប្រវត្តិដី និងអត្តសញ្ញាណរបស់ម្ចាស់ដី ដើម្បីធ្វើរបាយការណ៍ដាក់ជូនទៅលោកអភិបាលខេត្តពិនិត្យនិងសម្រេច។
លោកថ្លែងថា៖«ដីតំបន់នោះគឺជាដីគម្រោងអភិវឌ្ឍន៍តំបន់ទេសចរណ៍នាគរាជរបស់អាជ្ញាធរខេត្តព្រះសីហនុដែលត្រូវបានហាមឃាត់ការសាងសង់លំនៅឋានថ្មី លក់ដូរឬផ្ទេរសិទ្ធិ និងមិនទាន់មានការចេញប្លង់កម្មសិទ្ធិនោះដែរ ពិសេសចាប់តាំងពីរូបខ្ញុំឡើងមកកាន់ជាគណៈអភិបាលស្រុកព្រៃនប់នេះខ្ញុំមិនដែលបានចេញប្លង់កម្មសិទ្ធិ ឬ អនុញ្ញាតឲ្យពលរដ្ឋណាម្នាក់សង់លំនៅឋានថ្មីក្នុងតំបន់នោះទេ»។
បើតាមលោកផៃ ប៊ុន វណ្ណៈ ភិបាលរងខេត្តព្រះសីហនុ ដីក្នុងតំបន់នោះដើមឡើយជាដីគម្របព្រៃឈើជាប់មាត់សមុទ្រដែលមានពលរដ្ឋតិចតួចបំផុតចូលរស់នៅនិងអាស្រ័យផលនៅក្នុងតំបន់នេះ ប៉ុន្តែអាជ្ញាធរមិនអនុញ្ញាតឲ្យមានការកាប់រាន ឬ លក់ដូរទៅឲ្យអ្នកផ្សេងឡើយ។
កាលពីឆ្នាំមុន តំបន់ឆ្នេរពយម៉ាចូវ ត្រូវបានអាជ្ញាធរខេត្តដាក់បញ្ចូលទៅក្នុងគម្រោងអភិវឌ្ឍន៍តំបន់ទេសចរណ៍នាគរាជ និងបានចេញបម្រាមដល់ពលរដ្ឋមិនឲ្យសាងសង់លំនៅឋានថ្មីនោះទេ។
ជុំវិញករណី ការសាងសង់របងថ្មរឹងមាំនៅក្នុងតំបន់នោះ លោកវណ្ណៈ បានអះអាងថា មិនមែនមានតែគ្រួសារលោក ប៉េង ជាមួយនោះទេគឺមានគ្រួសារ២ទៀតបានសាងសង់ដែរ។ ប៉ុន្តែក្រុមការងាររបស់លោកបានចុះផ្អាកសកម្មភាពនៃការសាងសង់នោះហើយកាលពីម្សិលមិញ។
លោកបានបញ្ជាក់ថា៖«យោងតាមការពិនិត្យភាពជាក់ស្ដែងគ្រួសារទាំង៣ដែលបានសង់របងថ្មនោះមានប័ណ្ណកម្មសិទ្ធិស្របច្បាប់ដែលចេញនៅឆ្នាំ១៩៩៩, ២០០៦ និង ឆ្នាំ ២០១៤ ហើយពួកគាត់ មានច្បាប់អនុញ្ញាតសុំធ្វើរបងហ៊ុមព័ទ្ធដែលចេញដោយគណៈអភិបាលខេត្តព្រះសីហនុនាឆ្នាំ២០១៧។ប៉ុន្តែយ៉ាងណាក្ដីយើងបានសុំឲ្យពួកគាត់ផ្អាកសកម្មភាពជាបណ្ដោះអាសន្នហើយ»។
លោកបានឲ្យដឹងទៀតថា យោងតាមប័ណ្ណសម្គាល់អចលនវត្ថុចេញនៅឆ្នាំ១៩៩៩ ដែលមានម្ចាស់កម្មសិទ្ធិឈ្មោះ ប៉េង ជា មានផ្ទៃដីសរុបជាង៩ហិកតា,ប័ណ្ណសម្គាល់អចលនវត្ថុដែលបានចេញនៅឆ្នាំ២០០៦ដែលមានម្ចាស់កម្មសិទ្ធិឈ្មោះ វេច ហុង មានផ្ទៃដីសរុបជាង ២០ ហិកតានិងប័ណ្ណសម្គាល់អចលនវត្ថុដែលបានចេញនៅឆ្នាំ២០១៤ដែលមានម្ចាស់កម្មសិទ្ធិឈ្មោះ ឡូវ សុគន្ធ មានផ្ទៃដីសរុប៤៩ហិកតា។ លោក ប៉េង ជា មិនអាចទាក់ទងដើម្បីសុំអត្ថាធិប្បាយបានទេ៕