.jpg)
ស្ត្រីជិះម៉ូតូដឹកក្មេងម្សិលមិញឆ្លងប្រឡាយបឹងត្របែកមានជញ្ជាំងទ្រេតស្ទើររលំនៅខណ្ឌចំការមន។ ហុង មិនា
ភ្នំពេញៈ អាជ្ញាធររាជធានីភ្នំពេញតម្រូវឲ្យក្រុមហ៊ុន លី ប្រាឌឺ (Ly Brothers) ត្រូវតែសាងសង់ជញ្ជាំងប្រឡាយបឹងត្របែកនៅសង្កាត់ផ្សារដើមថ្កូវ ខណ្ឌចំការមនជាថ្មីឡើងវិញ បន្ទាប់ពីស៊ីផាយជញ្ជាំងប្រឡាយជិត ២០០ ម៉ែត្រ ដែលក្រុមហ៊ុនទទួលម៉ៅការសាងសង់នោះទ្រេតស្ទើរដួលរលំ ដែលស្ថានភាពនេះអាជ្ញាធរថា ក្រុមហ៊ុនសាងសង់គ្មានគុណភាពតាមលក្ខណៈបច្ចេកទេសត្រឹមត្រូវ។
លោក ម៉េត មាសភក្ដី អ្នកនាំពាក្យសាលារាជធានីភ្នំពេញថ្លែងពីម្សិលមិញថា មន្ត្រីជំនាញរបស់រដ្ឋបាលរាជធានីភ្នំពេញបានតម្រូវឲ្យភាគីក្រុមហ៊ុនទទួលបន្ទុកម៉ៅការ សាងសង់ស៊ីផាយ (ជញ្ជាំងបេតុង) ប្រឡាយបឹងត្របែកដែលបានទ្រេតប្រវែងជិត ២០០ ម៉ែត្រនោះឡើងវិញ ដោយត្រូវសិក្សាលក្ខណៈបច្ចេកទេសឲ្យបានត្រឹមត្រូវតាមស្ដង់ដាដែលបានចុះកិច្ចព្រមព្រៀងគ្នាមុនពេលសាងសង់។
លោកបញ្ជាក់ថា៖ «យើងតម្រូវឲ្យក្រុមហ៊ុនធ្វើកន្លែងដែលទ្រេតហ្នឹងឡើងវិញទាំងអស់គឺធ្វើយ៉ាងណាឲ្យមានស្ដង់ដា និងបច្ចេកទេសត្រឹមត្រូវ។ ចំពោះការចំណាយលើការសាងសង់ជញ្ជាំងប្រឡាយបឹងត្របែកនេះ ខ្ញុំអត់ទាន់បានទទួលព័ត៌មានលម្អិតជុំវិញការចំណាយនេះទេ ចាំជម្រាបជូននៅពេលក្រោយទៀត»។
លោកបន្តថា ចំពោះជញ្ជាំងបេតុងជិត ២០០ ម៉ែត្រនេះ មិនមែនក្នុងន័យបាក់រលំ ក្រាបដល់ដីទេ ពោលគឺគ្រាន់តែទ្រេតខុសពីសភាពដើមក្នុងអំឡុងពេលសាងសង់។ ប៉ុន្ដែសំណង់នេះមិនបង្កឲ្យមានគ្រោះថ្នាក់ ឬរងរបួសដល់កម្មករសំណង់ ឬប្រជាពលរដ្ឋដែលរស់នៅក្បែរនោះទេ។
អភិបាលខណ្ឌចំការមនលោក ថេង សុថុល ប្រាប់ពីម្សិលមិញថា មន្ត្រីជំនាញរាជធានីភ្នំពេញបានបញ្ជាឲ្យក្រុមហ៊ុនខាងលើនេះខួងមើលគុណភាពដីឲ្យបានត្រឹមត្រូវមុននឹងបុកស៊ីផាយសាងសង់ជាថ្មី ដើម្បីចៀសវាងការទ្រេត ឬបាក់រលំជាយថាហេតុណាមួយកើតឡើងម្ដងទៀត ថែមទាំងចៀសវាងបង្កគ្រោះថ្នាក់ដល់អ្នកដំណើរ ឬប្រជាពលរដ្ឋរស់នៅក្បែរនោះ។
លោកបន្តថា បន្ទាប់ពីទទួលដំណឹងទ្រេតជញ្ជាំងប្រឡាយបឹងត្របែកកាលពីថ្ងៃទី ១៤ ខែកក្កដា នេះលោក និងលោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញបានចុះត្រួតពិនិត្យស្ថានភាពស៊ីផាយប្រឡាយបឹងត្របែកដែលទ្រេតនេះភ្លាមៗដែរ ដើម្បីសិក្សារកដំណោះស្រាយ និងចាត់វិធានការ បុកស៊ីផាយឡើងវិញ។
លោកថ្លែងថា៖ «ខ្ញុំគិតថា ប្រហែលក្រុមហ៊ុនគាត់ធ្វើខុសលក្ខណៈបច្ចេកទេសហើយទើបបានបង្កឲ្យមានការទ្រេតជញ្ជាំងប្រឡាយក្នុងអំឡុងពេលសាងសង់បែបនេះ។ សំណង់នេះមិនទាន់បានសាងសង់រួចរាល់ទាំងស្រុងទេ ដោយទើបតែរួចរាល់មួយចំនួនធំ។ ចំពោះការចំណាយថវិកាសាងសង់នេះ ខ្ញុំមិនសូវដឹងច្បាស់ទេ សួរទៅមន្ត្រីជំនាញយើងបានគាត់ដឹង»។
ប្រធានមន្ទីរសាធារណការ និងដឹកជញ្ជូនរាជធានីភ្នំពេញលោក សាំ ពិសិដ្ឋ ពីម្សិលមិញបានបដិសេធការធ្វើអត្ថាធិប្បាយជុំវិញករណីនេះ។
លោក សេក ស្រេង មេការក្រុមហ៊ុនលីប្រាឌឺ (Ly Brothers Limited) ដែលទទួលខុសត្រូវបុកស៊ីផាយប្រឡាយបឹងត្របែកថ្លែងពីម្សិលមិញថា លោកមិនចង់អធិប្បាយ អ្វីច្រើនទេដោយគ្រាន់តែអះអាងថា ក្រុមហ៊ុនបាននិងកំពុងរៀបចំពិសោធដី និងចាប់ផ្ដើមសាងសង់បុកស៊ីផាយឡើងវិញ។
លោកប្រាប់ថាក្រុមហ៊ុនលោកបានទទួលម៉ៅការសាងសង់ជញ្ជាំងប្រឡាយបឹងត្របែកទាំងសងខាងប្រវែង ១៧០០ ម៉ែត្រដោយចាប់ផ្ដើមសាងសង់ជាច្រើនដំណាក់កាលព្រោះអាជ្ញាធរនៅបន្តដោះស្រាយផលប៉ះពាល់ជាមួយប្រជាពលរដ្ឋ។ មានកន្លែងខ្លះមានការលំបាកក្នុងការដោះស្រាយជាមួយប្រជាពលរដ្ឋដែរ ទើបត្រូវការពេលវេលាច្រើនដើម្បីសាងសង់។
លោកបានបន្ថែមថា៖ «ការសាងសង់នេះ យើងនៅមានបញ្ហា និងដំណោះស្រាយខ្លះជាមួយប្រជាពលរដ្ឋ ដោយកន្លែងខ្លះគាត់សហការជាមួយអាជ្ញាធរ ហើយកន្លែងខ្លះគាត់នៅទាមទារសំណងផ្សេងៗពីអាជ្ញាធរ អ៊ីចឹងនៅត្រូវការពេលវេលាទៀត។ ក្រុមហ៊ុនខ្ញុំគ្រាន់តែជាអ្នកសាងសង់ទេ។ បើអាជ្ញាធរដោះស្រាយបានត្រឹមណា គឺយើងធ្វើត្រឹមហ្នឹងសិន ហើយបើអាជ្ញាធរដោះស្រាយបានលឿន យើងក៏ធ្វើបានលឿនដែរ»៕
វីដេអូ៖
