.jpg)
ជនជាប់ចោទ និងកាំបិតផ្គាក់ដែលប្រើកាប់សម្លាប់បុរសម្នាក់។ រូបថត នគរបាល
ត្បូងឃ្មុំៈ បុរសម្នាក់ដែលប្រើកាំបិតផ្គាក់កាប់គូទំនាស់ម្នាក់ស្លាប់ភ្លាមៗដោយសារតែគំនុំត្រូវបានសាលាដំបូងខេត្តត្បូងឃ្មុំសម្រេចធ្វើការចោទប្រកាន់ និងបញ្ជូនទៅឃុំខ្លួនបណ្តោះអាសន្ននៅពន្ធនាគារខេត្តកាលពីថ្ងៃទី ២៩ ខែ កញ្ញា ឆ្នាំ ២០១៩ បន្ទាប់ពីត្រូវបានពលរដ្ឋ និងសមត្ថកិច្ចចាប់ខ្លួនបានភ្លាមៗកាលពីថ្ងៃទី ២៧ ខែ កញ្ញា នៅភូមិតារាម ឃុំចុងជាច ស្រុកតំបែរ ខេត្តត្បូងឃ្មុំ។
លោក ថេង ជាង អ្នកនាំពាក្យសាលាដំបូងខេត្តត្បូងឃ្មុំបានប្រាប់ភ្នំពេញប៉ុស្តិ៍ កាលពីម្សិលមិញថា ជនម្នាក់ឈ្មោះ ផល សុផាន់ អាយុ ២៦ ឆ្នាំ ដែលជាប់ពាក់ព័ន្ធនឹងអំពើកាប់សម្លាប់មនុស្សហើយដែលសមត្ថកិច្ចបញ្ជូនទៅសាលាដំបូងខេត្តត្បូងឃុំកាលពីថ្ងៃទី ២៨ ខែ កញ្ញា នោះ ត្រូវបានចៅក្រមស៊ើបសួរសម្រេចចោទប្រកាន់ និងបញ្ជូនទៅឃុំខ្លួននៅពន្ធនាគារហើយ។
លោកបញ្ជាក់ថា៖ «ជនម្នាក់ឈ្មោះ ផល សុផាន់ នេះត្រូវចៅក្រមស៊ើបសួរចោទតាមបញ្ញត្តិមាត្រា ១៩៩ នៃក្រមព្រហ្មទណ្ឌ និងសម្រេចចេញដីកាឃុំខ្លួនបណ្តោះអាសន្ននៅពន្ធនាគារខេត្តតាមមាត្រា ១៩៩ នៃក្រមព្រហ្មទណ្ឌ»។
យោងតាមមាត្រា ១៩៩ នៃក្រមព្រហ្មទណ្ឌនេះប្រសិនបើតុលាការរកឃើញថា ជនត្រូវចោទម្នាក់នេះ ពិតជាបានប្រព្រឹត្តបទល្មើសមែននោះនឹងត្រូវផ្តន្ទាទោសដាក់ពន្ធនាគារពី ១០ ឆ្នាំទៅ ១៥ ឆ្នាំ។
បើតាមលោក ប៉េង អេងហាក់ អធិការស្រុកតំបែរ ជនល្មើសឈ្មោះ ផល សុផាន់ អាយុ ២៦ ឆ្នាំ រីឯជនរងគ្រោះឈ្មោះ ហ៊ុល គីមឡុង អាយុ ២៣ ឆ្នាំពួកគេរស់នៅភូមិ តារាម ឃុំចុងជាច ស្រុកតំបែរ ខេត្តត្បូងឃ្មុំ។
លោក អេងហាក់ រំឭកប្រាប់តាមចម្លើយសារភាពរបស់ជនត្រូវចោទថា រវាងរូបគេ និងជនរងគ្រោះគឺជាមនុស្សស្គាល់គ្នា និងរស់នៅក្នុងភូមិជាមួយគ្នា ហើយកន្លងមកពួកគេទាំង ២ នាក់ក៏មានទំនាស់ពាក្យសម្តីនឹងគ្នាដែរ។ ប៉ុន្តែបើទោះជាមានការរាប់អានគ្នាវិញហើយក្តីក៏រូបគេនៅតែចិញ្ចឹមចិត្តចងគំនុំជាមួយជនរងគ្រោះដែរ។
លោក បន្តថាលុះថ្ងៃទី ២៧ កញ្ញា ឆ្នាំ ២០១៩ វេលាម៉ោង ៣ កន្លះរសៀលជនរងគ្រោះរួមនឹងគ្នីគ្នាប្រមាណជាពី ៦ ទៅ ៧ នាក់បានជុំគ្នាផឹកស៊ីនៅផ្ទះមិត្តភក្តិដែលមានទីតាំងនៅក្នុងភូមិ-ឃុំ ខាងលើ។
នៅពេលនោះជនសង្ស័យបានជិះម៉ូតូ ១ គ្រឿងកាត់មុខផ្ទះដែលជាកន្លែងផឹកស៊ីនោះ ហើយគ្រានោះជនរងគ្រោះដោយនឹកឃើញថា ជាមនុស្សស្គាល់គ្នាក៏ហៅជនសង្ស័យឲ្យឈប់ម៉ូតូ ហើយបានដើរសំដៅទៅរកជនសង្ស័យ ដើម្បីបបួលផឹកស្រាជាមួយ ប៉ុន្តែជនសង្ស័យប្រកែកមិនចូលរួមផឹកស្រាទេ។ ពេលនោះជនរងគ្រោះបានដើរត្រឡប់មករកវង់ផឹកស៊ីវិញ ដែលគ្រាន់តែជនរងគ្រោះដើរបានប៉ុន្មានជំហាន ក៏ស្រាប់តែជនសង្ស័យទាញកាំបិតហាន់ដើមចេកដែលដាក់តាមម៉ូតូស្រាប់កាប់លើជនរងគ្រោះត្រូវផ្នែកចំហៀងខាងស្តាំកញ្ចឹង ក ១ កាំបិត បណ្តាលឲ្យប្រកាច់ដួលស្លាប់នៅលើដីភ្លាមៗតែម្តង។
លោកបញ្ជាក់ថាបន្ទាប់ពីមានហេតុការណ៍កើតឡើងដូច្នេះប្រជាពលរដ្ឋនៅក្បែរនោះបាននាំគ្នាចាប់ជនសង្ស័យហើយបានរាយការណ៍ប្រាប់នគរបាលប៉ុស្តិ៍ ឃុំចុងជាចចុះទៅនាំខ្លួនជនសង្ស័យមកប៉ុស្តិ៍នគរបាលដើម្បីសាកសួរ និងឃាត់ខ្លួនតែម្តង ក្រោយពីជនសង្ស័យសារភាពប្រាប់សមត្ថកិច្ចពីការសម្លាប់នេះ៕
