The Phnom Penh Post Search

Search form

Logo of Phnom Penh Post newspaper Phnom Penh Post - ជនគំរាមសម្លាប់លោកនាយករដ្ឋមន្ត្រី ត្រូវតុលាការចោទ

ជនគំរាមសម្លាប់លោកនាយករដ្ឋមន្ត្រី ត្រូវតុលាការចោទ

Content image - Phnom Penh Post
ជន​ជាប់​ចោទឈ្មោះសាម ភាព​ដែល​គំរាម​សម្លាប់​លោកនាយក​រដ្ឋ​មន្ត្រី​​ ហ៊ុន​ សែន​​​​​។ រូបថត ហ្វេស​ប៊ុក

ជនគំរាមសម្លាប់លោកនាយករដ្ឋមន្ត្រី ត្រូវតុលាការចោទ

ភ្នំពេញៈ សាលាដំបូងរាជធានីកាលពីថ្ងៃសៅរ៍ បានសម្រេចធ្វើការចោទប្រកាន់យុវជនម្នាក់ពីរបទល្មើស ដែលបានបង្ហោះវីដេអូតាមបណ្តាញសង្គម ហ្វេសប៊ុក ដែលមានខ្លឹមសារ ជេរប្រមាថ ដល់អាយុជីវិតលោកនាយករដ្ឋមន្ត្រីហ៊ុន សែន។

ព្រះរាជអាជ្ញារងសាលាដំបូងរាជធានីភ្នំពេញ លោក គង់ សំសារ៉េត បានសម្រេចបើកការសាកសួរ ហើយបានធ្វើការចោទប្រកាន់លើឈ្មោះ វ៉ែន សុភាព ហៅ សាម ភាព ពីបទ គំរាមកំហែងថា នឹងសម្លាប់ និងបទញុះញង់ឲ្យមានការរើសអើង តាមមាត្រា ២៣៣ មាត្រា ៤៩៤ និងមាត្រា ៤៩៦ នៃក្រមព្រហ្មទណ្ឌហើយបញ្ជូនជននេះ និងសំណុំរឿងទៅចៅក្រមស៊ើបសួរ ដើម្បីចាត់ការបន្តតាមនីតិវិធី។ នេះបើតាមអ្នកនាំពាក្យសាលាដំបូងរាជធានី លោក លី សុផាណា ប្រាប់អ្នកសារព័ត៌មានតាមប្រព័ន្ធអេឡិចត្រូនិក Telegram។

ការឃាត់ខ្លួនយុវជននេះ ធ្វើឡើងបន្ទាប់ពីព្រះរាជអាជ្ញារងសាលាដំបូងរាជធានីភ្នំពេញ លោក សៀង សុខ កាលពីថ្ងៃទី ១៨ ខែ តុលាបានចេញដីកាបញ្ជាឱ្យនាំខ្លួនឈ្មោះសាម ភាព មកសាកសួរឱ្យបានមុនថ្ងៃទី ២១ ខែ វិច្ឆិកា។

ក្នុងដីកានោះមានខ្លឹមសារថា៖«បញ្ជាឱ្យនាំខ្លួន សាម ភាព អាយុ ២៧ ឆ្នាំ សញ្ជាតិខ្មែរ ទីកន្លែងកំណើតនៅភូមិបឹងជ័រឃុំព្រៃទទឹង ស្រុក ស៊ីធរកណ្តាល ខេត្តព្រៃវែង បច្ចុប្បន្នបម្រើការងារនៅប្រទេសថៃ ឱ្យបង្ហាញខ្លួននៅនាយកដ្ឋានប្រឆាំងបទល្មើសបច្ចេកវិទ្យា នៃក្រសួងមហាផ្ទៃ ដាក់បណ្តាសាប្រមាថអាយុជីវិតសម្តេចអគ្គមហាសេនាបតីតេជោហ៊ុន សែន»។

អធិការស្រុកស៊ីធរកណ្តាលលោក ឡុង ប៊ុនធឿន បានឲ្យដឹងកាលពីម្សិលមិញថា លោកបានដឹកនាំកម្លាំង និងធ្វើការឃាត់ខ្លួនយុវជននោះ កាលពីថ្ងៃទី២៧ ខែតុលា នៅចំណុចទីតាំងដែលជននេះរស់នៅ។

លោក ប៊ុនធឿន បន្តថា៖«យើងបានទទួលដីកាឱ្យនាំខ្លួនមុខសញ្ញានោះ ហើយយើងទៅដល់ជួបគាត់នៅភូមិព្រៃទទឹង នៅវេលាម៉ោង ២ រសៀល ហើយចាប់បញ្ជូនមកក្រសួងមហាផ្ទៃតែម្តង»។ បើតាមលោកអធិការយុវជនរូបនេះជាជនចំណាកស្រុកចេញទៅចូលមកប្រទេសថៃ។

កាលពីថ្ងៃអាទិត្យម្សិលមិញក្រោយពីសួរចម្លើយ ពិនិត្យឯកសារសំណុំរឿង និងពិភាក្សាដេញដោលចំពោះមុខរួចមក លោក កោ វណ្ឌី ជាចៅក្រមស៊ើបសួរ បានសម្រេចឃុំខ្លួនបណ្តោះអាសន្នជនត្រូវចោទឈ្មោះ វ៉ែន សុភាព ហៅ សាម ភាព ពីបទ គំរាមកំហែងថានឹងសម្លាប់ និងបទ ញុះញង់ឲ្យមានការរើសអើង តាមមាត្រា ២៣៣ មាត្រា ៤៩៤ និងមាត្រា ៤៩៦ ក្រមព្រហ្មទណ្ឌ ហើយបញ្ជូនជននេះទៅឃុំខ្លួននៅពន្ធនាគារព្រៃសតាមនីតិវិធី។

តាមមាត្រា ២៣៣ នៃក្រមព្រហ្មទណ្ឌចែងថា ការគំរាមកំហែងថា នឹងសម្លាប់ កាលបើការគំរាមកំហែងនេះធ្វើឡើងម្តងហើយ ម្តងទៀត ឬសម្តែងចេញតាមលិខិត រូបភាព ឬវត្ថុអ្វីមួយ ជននោះ ត្រូវផ្តន្ទាទោសដាក់ពន្ធនាគារពី ៦ ខែទៅ ២ ឆ្នាំ និងពិន័យជាប្រាក់ពី ១ លានរៀលទៅ ៤ លានរៀល។

ចំណែកមាត្រា ៤៩៦ ចែងថា ការញុះញង់ឲ្យមានការរើសអើង ត្រូវផ្តន្ទាទោសពី ១ ឆ្នាំទៅ ៣ ឆ្នាំ និងពិន័យជាប្រាក់ពី ២ លានរៀលទៅ ៦ លានរៀល។

ចំណាត់ការរបស់អាជ្ញាធរ ក្នុងការឃាត់ខ្លួន ឬតុលាការធ្វើការចោទប្រកាន់លើអ្នកដែលបង្ហោះខ្លឹមសារឬវីដេអូជេរប្រមាថដែលប៉ះពាល់ដល់កិត្តិយសអ្នកដទៃ ត្រូវបានអ្នកតាមដានព្រឹត្តិការណ៍សង្គម និងគណបក្សប្រឆាំងមើលឃើញថា អនុវត្តមិនស្មើភាពគ្នា ចំពោះមុខច្បាប់ ខណៈដែលអ្នកគំរាមដល់អាយុជីវិតប្រធានស្តីទីគណបក្សសង្គ្រោះជាតិលោក កឹម សុខា មិនត្រូវបានឃាត់ខ្លួននាំមកសាកសួរ ឬចោទប្រកាន់ នោះទេ ប៉ុន្តែ អ្នកដែលបរិហារកេរ្តិ៍ប៉ះពាល់ដល់មន្ត្រីបក្សកាន់អំណាច តែងតែត្រូវសមត្ថកិច្ចចាប់ខ្លួននិងបញ្ជូនទៅតុលាការធ្វើការចោទប្រកាន់៕

អត្ថបទគួរចាប់អារម្មណ៍