The Phnom Penh Post Search

Search form

Logo of Phnom Penh Post newspaper Phnom Penh Post - ជនជាតិ​កម្ពុជា​ ៩ ​នាក់​ត្រូវ​បញ្ជូន​ពី​អាមេរិក​ ម្សិលមិញ




ជនជាតិ​កម្ពុជា​ ៩ ​នាក់​ត្រូវ​បញ្ជូន​ពី​អាមេរិក​ ម្សិលមិញ

Content image - Phnom Penh Post
ពលរដ្ឋ​នៅ​អាមេរិក​តវ៉ា​ចំពោះ​ការ​បញ្ជូន​ជន​ជាតិ​ខ្មែរ-អាមេរិក ត្រលប់​មក​វិញ កាល​ពី​ឆ្នាំ​មុន។ រូបថត IKARE

ជនជាតិ​កម្ពុជា​ ៩ ​នាក់​ត្រូវ​បញ្ជូន​ពី​អាមេរិក​ ម្សិលមិញ

ភ្នំពេញៈ ​ជនជាតិ​កម្ពុជា​ ៩ ​នាក់​ដែល​ត្រូវ​បាន​និរទេស​ពី​អាមេរិក​​បាន​មក​ដល់​រាជធានី​ភ្នំពេញ​​កាល​ពី​ម្សិលមិញ ប៉ុន្មាន​ថ្ងៃ​បន្ទាប់ពី​ចៅក្រម​អាមេរិក​ម្នាក់​បាន​ផ្អាក​បណ្តោះអាសន្ន​ចំពោះ​ជើង​ហោះហើរ​​មួយ​ដែល​គ្រោង​ដឹក​អ្នក​និរទេស​​ជនជាតិ​កម្ពុជា​ជាង​ ៥០ ​នាក់​មក​ប្រទេស​កម្ពុជា​។

លោក Bill Herod ស្ថាបនិក​នៃ​មណ្ឌល​ទ្រទ្រង់​ជន​មាតុភូមិនិវត្តន៍​សមាហរណកម្ម​បាន​ថ្លែង​ថា​ការ​​មក​ដល់​ថ្មី​នៃ​អ្នក​ទាំង​នេះ​គឺ​មិន​ស្ថិត​នៅ​ក្រោម​សំណុំ​រឿង​តុលាការ​អាមេរិក​ដែល​ផ្តោត​លើ​ជនជាតិ​កម្ពុជា​ដែល​ត្រូវ​បាន​ឃុំ​ខ្លួន​ប៉ុន្តែ​ត្រូវ​បាន​ដោះលែង​នោះ​ទេ​។

កម្មវិធី​និរទេស​នេះ​បាន​ក្លាយ​ជា​ចំណុច​ក្តៅ​គគុក​រវាង​អាមេរិក​នឹង​កម្ពុជា​បន្ទាប់​ពី​កម្ពុជា​បាន​ផ្អាក​ឈប់​ទទួល​យក​អ្នក​ដែល​ត្រូវ​និរទេស​ថ្មី​​ កាលពី​ឆ្នាំ​មុន​ ដោយសារ​បារម្ភ​ពី​ការ​ប៉ះពាល់​ដល់​សិទ្ធិ​មនុស្ស​។

ភាគច្រើន​នៃ​អ្នក​ទាំងនោះ​បាន​ទៅ​ដល់​អាមេរិក​ជា​ជន​ភៀសខ្លួន និង​មិន​ដែល​មក​កម្ពុជា​ ឬ​មិន​ចេះ​ខ្មែរ​ទេ​។ ពួកគេ​ភាគច្រើន​មិន​បាន​ដឹង​ថា​ពួកគេ​មិន​​មែន​ជនជាតិ​អាមេរិក​ទេ​។

មន្ត្រី​អន្តោប្រវេសន៍​នៃ​ក្រសួង​មហាផ្ទៃ​លោក ឌឹម រ៉ា បាន​ថ្លែង​​ថា​អ្នក​ដែល​ត្រូវ​និរទេស​ទាំង​ ៩ ​នាក់​នោះ​គឺ​ស្ថិត​ក្នុង​ក្រុម​ដែល​ត្រូវ​គ្រោង​និរទេស​នា​សប្តាហ៍​នេះ ប៉ុន្តែ​មិន​បាន​គេចផុត​ពី​ការ​និរទេស​ដោយសារ​ពួកគេ​មិន​ស្ថិត​នៅ​ក្នុង​ពាក្យ​បណ្តឹង​។

បើ​តាម​លោក រ៉ា អ្នក​ដែល​ត្រូវ​និរទេស​ទាំងនេះ​ត្រូវ​បាន​កាត់ទោស​ពី​បទល្មើស​ជាច្រើន​រួមមាន​បទល្មើស​គ្រឿងញៀន និង​ឃាតកម្ម​។

លោក​បន្ត​ថា​៖ «​អ្នក​ទាំង​ ៩ ​នាក់​នេះ​បាន​ប្រាប់​យើង​ថា​ពួកគេ​មិន​មាន​សាច់ញាតិ​នៅ​កម្ពុជា​ទេ ដូច្នេះ​យើង​បញ្ជូន​ពួកគេ​ទៅ​ទូត​អាមេរិក និង​មណ្ឌល​ទ្រទ្រង់​ជន​មាតុភូមិនិវត្តន៍​សមាហរណកម្ម​ដើម្បី​ឧបត្ថម្ភ និង​ទ្រទ្រង់​ដល់​​ពួកគេ​»៕ PS

អត្ថបទគួរចាប់អារម្មណ៍