.jpg)
ជនជាតិចិនដែលសមត្ថកិច្ចចាប់បាននៅខេត្តកំពតពីម្សិលមិញសង្ស័យចាប់ជំរិតតាមអនឡាញ។ រូបថត សហការី
កំពតៈ កម្លាំងសមត្ថកិច្ចនគរបាលនៃស្នងការដ្ឋាននគរបាល ខេត្តកំពតបានបង្ក្រាបចាប់ជនជាតិចិនចំនួន ១៧ នាក់ ក្នុងនោះមានស្ត្រីចិន ២ នាក់ផងដែរ នៅផ្ទះជួលដែលមានទីតាំងក្នុងភូមិកំពង់បាយខាងត្បូង សង្កាត់កំពង់បាយ ក្រុង-ខេត្តកំពតកាលពីថ្ងៃម្សិលមិញពាក់ព័ន្ធនឹងការសង្ស័យជំរិតទារប្រាក់តាមអនឡាញ។
លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពតប្រាប់ភ្នំពេញប៉ុស្តិ៍ពីម្សិលមិញថា កម្លាំងសមត្ថកិច្ចនរគបាលនៃស្នងការដ្ឋាននគរបាល ខេត្តកំពតបានចុះប្រតិបត្តិការបង្ក្រាប និងចាប់ក្រុមជនជាតិចិនបានចំនួន ១៧ នាក់ដែលពួកគេបានបើកកន្លែងធ្វើអាជីវកម្មខុសច្បាប់តាមអនឡាញ។ លោកបន្ថែមថាសមត្ថកិច្ចរបស់លោកនៅមិនទាន់បញ្ចប់ការសាកសួរពួកគេនៅឡើយទេ។
លោកស្នងការបានប្រាប់ថា៖ «ករណីនេះ ខ្ញុំកំពុងបន្តនីតិវិធី ស៊ើបសួរពួកគេដើម្បីរកមូលហេតុពិត»។
លោកបានបន្តថា ក្នុងប្រតិបត្តិការនេះ ក្រៅពីឃាត់ខ្លួនក្រុមជនសង្ស័យមក សមត្ថកិច្ចរបស់លោកបានឆែកឆេរនៅក្នុងផ្ទះជួលនោះដោយបានរកឃើញទូរស័ព្ទចំនួន ១៤៤ គ្រឿង រួមទាំងកុំព្យូទ័រយួរដៃ ១ គ្រឿងទៀតផង។ ក្រោយពីបញ្ចប់ប្រតិបត្តិការបង្ក្រាប ក្រុមជនសង្ស័យទាំងនោះត្រូវបានបញ្ជូនទៅសមត្ថកិច្ចជំនាញចាត់ការតាមនីតិវិធីដើម្បីបញ្ជូនពួកគេទៅតុលាការ។
មន្ត្រីនគរបាលនៃអធិការដ្ឋាននគរបាលក្រុងកំពតមួយរូបសុំមិនបញ្ចេញឈ្មោះបានប្រាប់ពីម្សិលមិញដែរថា ករណីក្រុមជនជាតិចិនដែលសមត្ថកិច្ចចាប់ខ្លួនខាងលើនេះទើបតែបានជួលផ្ទះនោះក្នុងអំឡុងខែ សីហា ឆ្នាំ ២០១៩ នេះទេ ហើយទើបតែម្តងនេះទេដែលសមត្ថកិច្ចចាប់ក្រុមជនជាតិចិនមានចំនួនច្រើនបែបនេះ។
លោកបញ្ជាក់ថា៖ «នៅខេត្តកំពតមិនដែលកើតមានបទល្មើសធំតូចដែលបង្កឡើងដោយជនជាតិចិនទេ»។
មន្ត្រីរូបនោះបន្តថា ក្រុមជនជាតិចិនទាំង ១៧ នាក់នោះ កំពុងតែឃុំខ្លួននៅអធិការដ្ឋាននគរបាលក្រុងកំពតដើម្បីធ្វើកំណត់ហេតុ ដែលទាក់ទងនឹងបទល្មើសដែលសមត្ថកិច្ចសង្ស័យ ថាជំរិតទារប្រាក់តាមអ៊ីនធឺណិត ព្រោះសមត្ថកិច្ចបានរកឃើញវត្ថុតាងពាក់ព័ន្ធនឹងបទល្មើស។
ទាក់ទិននឹងបញ្ហាជនជាតិចិននេះដែរលោក អ៊ុប សុវណ្ណចាន់ថង មន្ត្រីសម្របសម្រួលនៃសមាគមការពារសិទ្ធិមនុស្ស លីកាដូ បានថ្លែងកាលពីម្សិលមិញថា ទាក់ទងនឹងជនជាតិចិនដែលមករស់នៅក្នុងខេត្តកំពតហាក់ដូចជាមិនសូវមានចំនួនច្រើនដូចខេត្តព្រះសីហនុទេ ព្រោះនៅទីរួមខេត្តកំពតក៏មិនទាន់មានកាស៊ីណូដែលបង្កើតដោយជនជាតិចិនដែរ។ ប៉ុន្តែពួកគេច្រើនតែឡើងទៅលេងល្បែងនៅឯកាស៊ីណូនៅលើភ្នំបូកគោ។
លោកបញ្ជាក់ថា៖ «បទល្មើស ឧក្រិដ្ឋ ឃាតកម្ម ឬបទល្មើសផ្សេងៗ គឺមិនដែលកើតមានទេនៅខេត្តកំពតគឺទើបតែមានម្តងនេះទេ»៕
