.jpg)
ជនជាតិចិន ចំនួន ៦ នាក់ត្រូវបានម្ចាស់រថយន្តតាក់ស៊ីដឹកមកទម្លាក់ចោល នៅចំណុចខាងកើត វិទ្យាល័យហ៊ុនសែនប្រសូតិ ស្ថិតក្នុងភូមិប្រសូតិ២ ឃុំកណ្តៀងរាយ ស្រុកស្វាយទាប កាលពីថ្ងៃទី ៣ ខែឧសភា ឆ្នាំ២០២១ ។ រូបថត ប៉ូលីស
ស្វាយរៀងៈ បុរសជនជាតិចិន ចំនួន ៦ នាក់ ដែលលួចឆ្លងដែនមកពីប្រទេសវៀតណាមត្រូវបានសមត្ថកិច្ចចាប់ឃាត់ខ្លួនបញ្ជូនទៅមណ្ឌលចត្តាឡីស័កនៅក្រុងស្វាយរៀងកាលពីយប់ថ្ងៃទី ៣ ឧសភា ខណៈពលរដ្ឋប្រទះឃើញពួកគេកំពុងដើរកាត់ភូមិប្រសូត្រ ២ ឃុំ កណ្តៀងរាយ ស្រុកស្វាយទាប។
លោក កែវ សុភ័ណ្ណ អធិការនគរបាលស្រុកស្វាយទាប ឱ្យដឹងនៅថ្ងៃទី ៥ ឧសភា ដោយយោងរបាយការណ៍ថា ក្រុមបុរសជនជាតិចិនទាំងនោះទី ១-ឈ្មោះ លូន ឃុន អាយុ ១៨ ឆ្នាំ ទី ២- តាំង ឡាំង អាយុ ២២ ឆ្នាំ ទី ៣- ឆេង ជិនតាវ អាយុ ១៨ ឆ្នាំ ទី ៤- ទូ ជាអូ អាយុ ១៨ ឆ្នាំ ទី ៥ ហ្វាង ចូអ៊ី អាយុ ២១ ឆ្នាំ និងទី ៦- ចាង អ៊ីឆឹង អាយុ ១៨ ឆ្នាំ ។ ពួកគេរស់នៅក្នុងប្រទេសចិន។
លោកប្រាប់ថា៖ «ក្រោយពីយើងឃាត់ខ្លួន និងសួរនាំមក យើងបានបញ្ជូនពួកគេទៅមណ្ឌលចត្តាឡីស័កនៅក្រុងស្វាយរៀង។ ចំពោះកិច្ចការបន្តយ៉ាងណាទៀតនោះ ខ្ញុំក៏មិនទាន់ដឹងថា ថ្នាក់លើនឹងចាត់វិធានការណ៍យ៉ាងម៉េចទេ»។
លោករៀបរាប់តាមសម្តីអ្នកភូមិថា កាលពីវេលាម៉ោងជាង ៨ យប់ ថ្ងៃទី ៣ ឧសភា ប្រជាពលរដ្ឋដែលរស់នៅក្នុងភូមិប្រសូត្រ ២ ឃុំកណ្តៀងរាយបានប្រទះឃើញជនជាតិចិនទាំងនោះនាំគ្នាដើរកាត់ភូមិ។
ដោយសារពលរដ្ឋមានការយល់ដឹងច្បាស់អំពីបទបញ្ជាបិទខ្ទប់ និង វិធានការណ៍របស់ក្រសួងសុខាភិបាលផងនោះ ក៏បានរាយការណ៍ប្រាប់នគរបាលប៉ុស្តិ៍រដ្ឋបាលឃុំកណ្តៀងរាយ ហើយសមត្ថកិច្ចបានចុះអន្តរាគមន៍ភ្លាមៗតែម្តង។
នៅពេលនោះក៏មានកម្លាំងនគរបាលការិយាល័យ អន្តោប្រវេសន៍ ខេត្តស្វាយរៀងបានចុះទៅសហការជាមួយនគរបាលប៉ុស្តិ៍ផងដែរ។
លោក កែវ សុភ័ណ្ណ ថ្លែងថា៖ «ពួកគេទាំងនោះគ្មានលិខិតឆ្លងដែនជាប់ខ្លួនទេ ហើយដោយសារបង្ការខ្លាចមានការឆ្លងជំងឺកូវីដផង សមត្ថកិច្ចសម្រេចយកទៅមណ្ឌលចត្តាឡីស័កសិន ចាំសួរនាំក្រោយទៀត»។
លោក ស កែវ នាយការិយាល័យ នគរបាលអន្តោប្រវេសន៍ ខេត្តស្វាយរៀង ឱ្យដឹងនៅថ្ងៃទី ៥ ឧសភា ថា បញ្ហានេះលោកមិនទាន់អាចផ្តល់ព័ត៌មានលម្អិតបានទេ ដោយសារតែក្រុមជនជាតិចិនទាំង ៦ នាក់នោះជាប់ធ្វើចត្តាឡីស័ក។ ប៉ុន្តែបន្ទាប់ពីធ្វើចត្តាឡីស័កចប់ទើបមានចំណាត់ការបន្ត។
លោក បញ្ជាក់ថា៖ «ពួកគេអត់មានលិខិតឆ្លងដែនអីទេ ហើយបើអត់មានគឺខុសច្បាប់ហើយ។ ប៉ុន្តែខ្ញុំក៏មិនទាន់ហ៊ានចូលទៅក្បែរពួកគេដែរ។ ចំពោះនីតិវិធីយ៉ាងណាទៀតនោះ ចាំពួកគាត់ធ្វើចត្តាឡីស័ករួច»។
តែទោះយ៉ាងណា បើតាមមន្ត្រីនគរបាលស្រុកស្វាយទាបមួយរូប សុំមិនឱ្យបញ្ចេញឈ្មោះ ប្រាប់ថា បើតាមការសន្និដ្ឋានបឋមរបស់សមត្ថកិច្ចគឺក្រុមជនជាតិចិនទាំងនោះលួចឆ្លងដែនពីប្រទេសវៀតណាមហើយត្រូវបានគេដឹកតាមរថយន្តពីព្រំដែនបាវិត ឆ្ពោះមកក្រុងស្វាយរៀង ប៉ុន្តែដោយសារស្ថានភាពមិអំណោយផល ព្រោះអ្នកបើកបររថយន្តខ្លាចសមត្ថកិច្ចយាមបិទខ្ទប់នៅតាមគោលដៅចាប់ទើបទម្លាក់ជនជាតិចិនទាំងនោះចោល៕
