.jpg)
គ្រឿងចក្រក្នុងតំបន់ដែនជម្រកសត្វនៅខេត្តមណ្ឌលគិរីដែលជនជាតិដើមបារម្ភពីការទន្ទ្រានដីព្រៃ។ រូប Bunong's voice page
មណ្ឌលគិរីៈ ជនជាតិដើមភាគតិចព្នងនៅខេត្តមណ្ឌលគិរីព្រួយបារម្ភពីការទន្ទ្រានដីព្រៃក្នុងដែនជម្រកសត្វព្រៃភ្នំណាមលៀ បន្ទាប់ពីសហគមន៍បានប្រទះឃើញគ្រឿងចក្រចល័តនៅក្នុងតំបន់ហាមឃាត់នេះ និងបានឃើញមានការបោះបង្គោលដើម្បីហ៊ុមព័ទ្ធយកដី ប៉ុន្តែមន្ត្រីបានអះអាងថា ការចល័តគ្រឿងចក្រនោះគឺដើម្បីជួសជុលផ្លូវតែប៉ុណ្ណោះ។
លោក យុន ឡូរ៉ង់ លេខាធិការសម្ព័ន្ធជនជាតិដើមភាគតិចព្នងនៅខេត្តមណ្ឌលគិរីបានប្រាប់ភ្នំពេញប៉ុស្ដិ៍កាលពីថ្ងៃទី ៨ ខែមេសា ថា ការព្រួយបារម្ភនេះក្រោយពីសហគមន៍បានប្រទះឃើញគ្រឿងចក្រ ១ គ្រឿងបានចល័តចូលទៅក្នុងដែនជម្រកសត្វព្រៃស្ថិតនៅចំណុចទួលស្វាយនៃភូមិពូលេះ ឃុំដាក់ដាំ។ ទីតាំងនោះមានការបោះបង្គោល និងការលួចកាប់ឆ្ការ។
លោកបានអះអាងថា៖ «សហគមន៍សង្កេតសកម្មភាព ២ គឺក្រៅពីសកម្មភាពអេស្កាទ័រ គឺមានការបោះបង្គោលដែលត្រូវបានបោះបង្គោលនៅលើដីទំហំធំហើយវែងដែលអាចមានទំហំរាប់រយហិកតាដែរ។ ការបោះបង្គោលហ្នឹងបើនិយាយទៅស្ថិតមិនឆ្ងាយពីស្នាក់ការបរិស្ថានប៉ុន្មានដែរគឺមើលទៅប្រហែល ១ គីឡូម៉ែត្រ»។
លោក ឡូរ៉ង់ បានបញ្ជាក់ថា លោកបានផ្ញើរូបនៃការចល័តគ្រឿងចក្រ ១ គ្រឿងនេះទៅខាងលោក នេត្រ ភក្ត្រា អ្នកនាំពាក្យក្រសួងបរិស្ថានរួចហើយ។ លោក ភក្ត្រា ក៏បានផ្ញើបន្តមកឲ្យមន្ត្រីបរិស្ថាននៅក្នុងខេត្តមណ្ឌលគិរីវិញ ដោយបានឆ្លើយតបថា ការចល័តគ្រឿងចក្រនោះ គឺដើម្បីជួសជុលផ្លូវ។ ប៉ុន្តែលោកថា ចំពោះការបោះបង្គោលក្នុងដែនជម្រក គឺមិនទាន់មានការបកស្រាយពីមន្ត្រីបរិស្ថាននៅឡើយទេ។
លោកបាននិយាយទៀតថា ក្រុមសហគមន៍កំពុងចុះស្រាវជ្រាវបន្ថែមទៀតនៅទីតាំងដែលកំពុងមានការសង្ស័យរំលោភយកដីក្នុងដែនជម្រកសត្វព្រៃនេះ។
ជាមួយគ្នានេះទំព័រហ្វេសប៊ុកដែលមានឈ្មោះថាសំឡេងជនជាតិដើមភាគតិចព្នងបានចុះផ្សាយនៅថ្ងៃទី ៣ មេសាថា ទីនោះមានការបោះបង្គោលព្រំដីច្រើនប្រភេទមានច្រើនកន្លែង ហើយរាប់រយហិកតា។ កន្លែងខ្លះមានការលួចឆ្ការព្រៃខាងក្នុងដែលមានការបោះបង្គោលនោះ ដែលសហគមន៍សង្ស័យថា បង្គោលឈើមានលាបថ្នាំក្រហម និងលឿងចុងដែលបោះក្នុងដែនជម្រកនោះគឺជារបស់ឧកញ៉ាមានអំណាចម្នាក់ដែលពូកែញុះញង់ និងគំរាមទិញដីសហគមន៍ និងតំបន់អភិរក្ស។
ប៉ុន្តែលោក វុធ សារុំ ប្រធានដែនជម្រកសត្វព្រៃភ្នំណាមលៀបានបញ្ជាក់ថា ការចល័តអេស្កា ១ គ្រឿងនោះគឺដោយសារខាងរដ្ឋបាលខេត្ត និងស្រុកមានគម្រោងជួសជុលផ្លូវនៅក្នុងតំបន់នោះ ដើម្បីបង្កភាពងាយស្រួលឱ្យពលរដ្ឋធ្វើដំណើរ និងការដឹកជញ្ជូនទំនិញ។ មិនមែនប្រើសម្រាប់ទន្ទ្រានដីព្រៃដូចការអះអាងរបស់សហគមន៍ឡើយ។
លោកបានបន្តថាខាងរដ្ឋបាលខេត្ត និងស្រុកបានដាក់លិខិតស្នើសុំជួសជុលផ្លូវនេះមកខាងដែនជម្រក។ លោកបញ្ជាក់ថា ចំពោះការប្រទះឃើញមានការបោះបង្គោលនោះគឺមិនមានឧកញ៉ាអ្នកមានអំណាចណាឡើយ ប៉ុន្តែគឺជាពលរដ្ឋនៅក្នុងសហគមន៍ទៅវិញទេ។ លោកថាជារៀងរាល់ថ្ងៃ មន្ត្រីខាងដែនជម្រកតែងតែចុះទៅដក [បង្គោល] ចោលជាបន្តបន្ទាប់។
លោកថ្លែងថា៖ «ភាគច្រើនក្រុមពួកគាត់ហ្នឹងជាអ្នកបោះបង្គោលហ្នឹង ហើយខាងខ្ញុំបានដើរដករួចហើយ ១ ថ្ងៃដកបាន ៣០ ទៅ ៤០ បង្គោលក៏មានដែរ ហើយតាមការកំណត់អត្តសញ្ញាណខ្លះគឺគ្មានប្រជាពលរដ្ឋមកពីខាងណាក្រៅពីពួកគាត់ទេ»។
លោក សៀក មុន្នី អភិបាលស្រុកអូររាំងឲ្យដឹងដែរថា ខាងរដ្ឋបាលខេត្ត និងស្រុកពិតជាបានជួសជុលដើម្បីពង្រីកផ្លូវចាស់ ១ ខ្សែប្រវែងជាង ៤០ គីឡូម៉ែត្រនៅក្នុងចំណុចដែលមានការចល័តគ្រឿងចក្រនោះមែន។ លោកបញ្ជាក់ថា ផ្លូវនេះគឺជួសជុលពង្រីកឱ្យធំតាមការស្នើសុំដែលមានការផ្ដិតមេដៃពីប្រជាពលរដ្ឋនៅក្នុងឃុំដាក់ដាំប្រហែល ២០០ គ្រួសារ។
លោកបន្តថាគ្រឿងចក្រដែលសហគមន៍ឃើញនោះ ក្រៅពីការត្រាយជួសជុលផ្លូវគឺពេលខ្លះក៏ត្រូវបានប្រជាពលរដ្ឋជួលឱ្យជួយកាយជីកធ្វើស្រះដើម្បីស្ដុកទឹកសម្រាប់ប្រើប្រាស់ស្រោចស្រពដំណាំដែរ ស្របពេលកំពុងជួបប្រទះគ្រោះរាំងស្ងួត។
លោកថា៖ «ពួកហ្នឹងចេះតែប្រឆាំងរហូត ពួកមួយក្រុមហ្នឹងមិនមែនជាពលរដ្ឋនៅឃុំដាក់ដាំហ្នឹងទេ គឺនៅស្រុកផ្សេងគឺស្រុកពេជ្រាដា។ កាលមុន ខ្ញុំចាប់ម្ដង ការចាប់ដីនៅក្នុងដែនអភិរក្សគឺក្រុមហ្នឹង ហើយពួកក្រុមហ្នឹងតែងតែបង្កឱ្យមានបញ្ហាកន្លងមករហូតនាំគ្នាចុះព័ត៌មានថា ខ្ញុំមានដីនៅហ្នឹង (រំលោភយកដីព្រៃរដ្ឋ) រាប់រយហិកតា ប៉ុន្តែពួកហ្នឹងអ្នកយកគ្មានពីណាទេ»៕
