.jpg)
ស្នាមបាញ់ថ្នាំក្រហមលើថ្មដើម្បីចំណាំដី។ រូបថត ហ្វេសប៊ុក គ្រើង តុលា
មណ្ឌលគិរីៈ ក្រុមជនជាតិដើមភាគតិចព្នង និងមន្ត្រីសង្គមស៊ីវិលបានដាក់បណ្ដឹងបរិហារប្រធានដែនជម្រកសត្វព្រៃកែវសីមាទៅកាន់តុលាការខេត្តមណ្ឌលគិរី ដោយចោទពីបទមិនទប់ស្កាត់ការចូលកាន់កាប់ដោយខុសច្បាប់ដីព្រៃក្នុងដែនជម្រកសត្វព្រៃ និងមានការទិញលក់ដីទីនោះ ប៉ុន្តែករណីនេះត្រូវបានមន្ត្រីបដិសេធ។
លោក គ្រើង តុលា សកម្មជនព្រៃឈើបានថ្លែងថា ការដាក់ពាក្យប្ដឹងលោក ព្រហ្ម វិបុលរតនៈ ប្រធានដែនជម្រកសត្វព្រៃកែវសីមាពីថ្ងៃទី ២៦ ឧសភា គឺដោយសារបានឃើញលិខិតផ្ទេរសិទ្ធិកាន់កាប់រវាងអ្នកទិញ និងអ្នកលក់ដីទំហំ ៥១ ហិកតានៅចំណុចភ្នំព្រឹក ភូមិអណ្ដូងក្រឡឹង ឃុំសែនមនោរម្យ ស្រុកអូររាំងដែលជាដីស្ថិតក្នុងតំបន់ដែនជម្រកសត្វព្រៃកែវសីមា។
លោកបន្តថា នៅទីតាំងនោះគឺមានការបាញ់ថ្នាំនៅតាមដើមឈើដើម្បីកំណត់ទីតាំងដី ហើយកន្លងមកពលរដ្ឋធ្លាប់បានរាយការណ៍ពីករណីរំលោភដីរដ្ឋនេះទៅលោក ព្រហ្ម វិបុលរតនៈ ដែរ ប៉ុន្តែលោកបែរជាព្រងើយកន្ដើយមិនព្រមចុះទប់ស្កាត់ទេ។ លោកថា ទីតាំងនោះជាចំណុចព្រៃស្រោងដែលគេហៅថា ជាជម្រកសត្វដំរីដោយពុំសូវមានពលរដ្ឋណាហ៊ានដើរឆ្លងកាត់ ទីតាំងនោះម្នាក់ឯងទេ។
លោកថា៖ «អ្វីដែលយើងប្ដឹងហ្នឹងគឺដើម្បីឱ្យមន្ត្រីយុត្តិធម៌ដែលកំពុងការពារនៅដែនជម្រកហ្នឹងឱ្យគាត់ដាក់ពាក្យបណ្ដឹង ឬរាយការណ៍ជាផ្លូវការដើម្បីឱ្យតុលាការហ្នឹងវែកមុខថា តើអ្នកណាខ្លះលក់ដីហ្នឹង ហើយអ្នកណាខ្លះដែលអនុញ្ញាតឱ្យលក់ដីហ្នឹង? ដំណាក់កាលហ្នឹងគឺយើងប្ដឹងលោក ព្រហ្ម វិបុលរតនៈ ដើម្បីឱ្យគាត់ទទួលខុសត្រូវហើយត្រូវឆ្លើយបំភ្លឺថា តើដីហ្នឹងជារបស់អ្នកណា?»។
នៅក្នុងពាក្យបណ្ដឹងនោះគឺមានឈ្មោះជនជាតិដើម ៤ នាក់ និងមន្ត្រីអាដហុកម្នាក់ដោយបានសរសេរថា ដី ៥១ ហិកតានោះ គឺត្រូវគេផ្ទេរសិទ្ធិឱ្យឈ្មោះ សេង អរិយា អាយុ ៣៣ ឆ្នាំ រស់នៅក្នុងភូមិទី ១៣ សង្កាត់បឹងកក់២ ខណ្ឌទួលគោក រាជធានីភ្នំពេញ។
ពាក្យបណ្ដឹងបន្តថា ពលរដ្ឋជនជាតិដើមព្នង ២ នាក់ ដែលមានឈ្មោះ ណាវ៉ាន់ ពូម និង ក្រើត រស់នៅភូមិអណ្ដូងក្រឡឹងដែលត្រូវបានលោក ព្រហ្ម វិបុលរតនៈ កោះហៅឱ្យផ្ដិតមេដៃលើកិច្ចសន្យា និងយកអត្តសញ្ញាណប័ណ្ណ ដោយសារពួកគាត់ទាំង ២ នាក់បានដាំដុះលើដីរដ្ឋ និងដើម្បីដកហូតដីវិញ។ ប៉ុន្តែក្រោយមកពលរដ្ឋទាំង ២ នេះបែរជាមានឈ្មោះក្នុងលិខិតផ្ទេរសិទ្ធិកាន់កាប់ដីទៅឱ្យឈ្មោះ សេងអរិយា ទៅវិញ។
ពាក្យបណ្ដឹងនោះបញ្ជាក់ថា៖ «ដោយសារគាត់ទាំង ២ មិនចេះអក្សរ ភ័យខ្លាច ក៏បានផ្ដិតមេដៃទៅ ស្រាប់តែស្នាមមេដៃមាននៅក្នុងលិខិតផ្ទេរសិទ្ធិកាន់កាប់អចលនទ្រព្យដែលមិនទាន់ចុះបញ្ជីចំនួន ២ លិខិតទៅវិញ ចំពោះលិខិត ២ ទៀតអ្នកលក់មិនរស់នៅក្នុងភូមិអណ្ដូក្រឡឹងទេ»។
លោក ព្រហ្ម វិបុលរតនៈ បានលើកឡើងថា លោកនឹងចូលទៅឆ្លើយបំភ្លឺតាមនីតិវិធីតុលាការនាពេលខាងមុខ។ លោកបានទទួលស្គាល់ថា ពិតមានអ្នកដើរបាញ់ថ្នាំនៅតាមដើមឈើដើម្បីរំលោភយកដីដែនជម្រកសត្វព្រៃមែន ប៉ុន្តែត្រូវបានមន្ត្រីចុះបង្ក្រាបជាបន្តបន្ទាប់ហើយពេលខ្លះស្លាកដែលមន្ត្រីបរិស្ថានដាក់ហាមទន្ទ្រានយកដីព្រៃក៏ត្រូវបានគេដកចោលទៀត។
លោកថា៖ «ពួកយើងខិតខំបង្ក្រាបហើយស្លាកដែលយើងខំទៅដាក់ថែមទាំងត្រូវបានដកចោលដល់អ៊ីចឹងទៅហត់ណាស់។
គេចេះតែថា (យើងព្រងើយកន្ដើយមិនបង្ក្រាប) ដោយសារតំបន់ដែនជម្រកយើងគឺស្ថិតក្នុង ៣ ស្រុក និង ១ ក្រុង ហើយមន្ត្រីឧទ្យានុរក្សយើងមានតែ ១៨ នាក់ទេ»។
លោក រតនៈ បានបន្តថា ខាងលោកមិនស្គាល់ឈ្មោះអ្នកបាញ់ថ្នាំដើម្បីរំលោភយកដីទាំងនោះទេ ហើយប្រសិនដឹងច្បាស់នោះនឹងត្រូវដាក់ពាក្យប្ដឹងទៅតុលាការដូចដែលធ្លាប់បានធ្វើនាពេលកន្លងមក៕
