The Phnom Penh Post Search

Search form




Logo of Phnom Penh Post newspaper Phnom Penh Post - ជនជាតិ​ដើម​ភាគតិច​កួយ​តវ៉ា​នៅ​ខាង​មុខ​សាលាដំបូង​ខេត្ត

ជនជាតិ​ដើម​ភាគតិច​កួយ​តវ៉ា​នៅ​ខាង​មុខ​សាលាដំបូង​ខេត្ត

ពលរដ្ឋ​នាំ​គ្នា​ឡើង​មក​តវ៉ា​នៅ​សាលា​ដំបូង​​។
ពលរដ្ឋ​នាំ​គ្នា​ឡើង​មក​តវ៉ា​នៅ​សាលា​ដំបូង​​។ រូបថត សហការី

ជនជាតិ​ដើម​ភាគតិច​កួយ​តវ៉ា​នៅ​ខាង​មុខ​សាលាដំបូង​ខេត្ត

ព្រះវិហារៈ ជនជាតិ​ដើម​ភាគតិច​កួយ​ជាង ១០០ នាក់ កាលពី​ម្សិលមិញ​នេះ បាន​ប្រមូលផ្តុំ​នៅ​មុខ​សាលាដំបូង​ខេត្ត​ខណៈ​ដែល​សមាជិក​របស់​ខ្លួន ៦ នាក់ ត្រូវ​បាន​អយ្យការ​អម​សាលាដំបូង​ខេត្ត​ហៅ​ចូល​បំភ្លឺ និង​ ២ នាក់​ទៀត គ្រោង​ចូល​បំភ្លឺ​នៅ​ព្រឹក​ថ្ងៃ​អង្គារ​នេះ ពាក់ព័ន្ធ​នឹង​ដំណើរ​រឿង​​នៃ​ការបង្ខាំង​មនុស្ស​ដោយ​ខុសច្បាប់ ​តាម​បណ្តឹង​របស់​ក្រុមហ៊ុន​ចិន ឡានហ្វេង និង​រ៉ូយហ្វេង​។

តាមរយៈ​ដីកា​កោះ​ដាច់​ដោយឡែក​​ដែល​ចុះហត្ថលេខា​ព្រះរាជអាជ្ញារង​អម​សាលាដំបូង​ខេត្ត​ព្រះវិហារ​កាលពី​ថ្ងៃ​ទី ៨ ខែ​មេសា សមាជិក​ប្រជាសហគមន៍ ៦ នាក់ ដែល​ចូល​បំភ្លឺ​ពី​ម្សិលមិញ​នេះ​មាន​ឈ្មោះ ភូ ភេន, ផុន រុំ, ណម ថុល, ស្រាល សឃី, យស សន, និង ថី ហឿន ហឿន ចំណែក​ថ្ងៃ​អង្គារ​នេះ មាន​ឈ្មោះ ហោ ធាន្នី និង​ ប៉ាវ សែវ។

អនុប្រធាន​ប្រជាសហគមន៍​ជនជាតិ​ដើម​ភាគតិច​កួយ អ្នកស្រី ខាន់ រឿង អាយុ ៥០ ​ឆ្នាំ​ បាន​​ឲ្យ​ដឹង​ថា ដោយសារ​តែ​ក្រុមហ៊ុន​ចិន ឡានហ្វេង និង​រ៉ូយហ្វេង បាន​ធ្វើ​សកម្មភាព​ឈូសឆាយ​ដី​ស្រែចម្ការ​ និង​ដើមជ័រទឹក​ឥត​ឈប់ឈរ​នោះ ​កាលពី​ថ្ងៃ​ទី​ ២៩ ខែ​ធ្នូ ឆ្នាំ​ ២០១៤​ ជនជាតិ​ដើម​ភាគតិច ដែល​ជា​អ្នក​កាន់កាប់​ដី​ជាង ១០០ ​នាក់​ មកពី​ ៣៦៧ ​គ្រួសារ​ក្នុង​ឃុំ​ប្រមេរុ ស្រុក​ត្បែងមានជ័យ ក៏​បាន​សម្រេច​នាំគ្នា​ទៅ​រារាំង​សកម្មភាព​ឈូសឆាយ​នោះ​ ដោយ​បាន​ឃាត់​គ្រឿងចក្រ​ពីរ​គ្រឿង និង​អ្នកបើកបរ​ពីរ​នាក់​ទុក​នៅ​ម៉ោង​ជាង​ ៥ ​ល្ងាច​​ថ្ងៃ​ដដែរ​។

អ្នកស្រី​បន្ត​ថា ក្រោយមក​មួយ​ថ្ងៃ នៅ​ថ្ងៃ​ទី ៣០ ខែ​ធ្នូ ឆ្នាំ​ ២០១៤ ប្រជាសហគមន៍​បាន​សម្រេច​បង្គាប់​ឲ្យ​អ្នកបើកបរ​ទាំង​ពីរ​នាក់​នោះ បើក​គ្រឿងចក្រ​ទាំង ២ នោះ ទៅ​រក្សា​ទុក​នៅ​សាលាឃុំ​ប្រមេរុ​តែ​ប៉ុណ្ណោះ ដើម្បី​ជា​ភ័ស្តុតាង​បង្ហាញ​ថា ក្រុមហ៊ុន​ចិន​នេះ បាន​រុករាន​ដី​ជម្លោះ​ក្នុង​ប្រព័ន្ធ​តុលាការ។

អ្នកស្រី​ថា៖ «ពួកយើង​មិនបាន​បង្ខាំង​មនុស្ស​នោះ​ទេ គ្រាន់តែ​រារាំង​អ្នក​បើក​អាប៊ុល ឈូសដី​ហើយ​បញ្ជូន​ទៅ​សាលាឃុំ​ចាត់ការ​​ប៉ុណ្ណោះ។ សហគមន៍​យើង​មាន​គ្នា ៥០០ ទៅ ៦០០ នាក់ បើ​ថា​ការរារាំង​នោះ ជា​ការបង្ខាំង​មនុស្ស​មែន អ៊ីចឹង​ម៉េច​មិន​ចាប់​ពលរដ្ឋ​ទាំងអស់​តែ​ម្តង​ទៅ!»។

លោក អ៊ឹង ធីងគង់ អ្នក​បកប្រែ​របស់​ក្រុមហ៊ុន​ចិន ឡានហ្វេង និង​រ៉ូយ ហ្វេង បាន​ឲ្យ​ដឹង​ថា បណ្តឹង​របស់​ក្រុមហ៊ុន បាន​ធ្វើ​ឡើង​​ដោយសារ​តែ​អ្នកបើកបរ​ស៊ីឈ្នួល​ទាំង​ពីរ​នាក់ រង​ការគំរាម​​ពី​ប្រជាសហគមន៍​ជនជាតិ​ដើម​​ទាំងនោះ។

លោក​ថា៖ «អ្នកបើកបរ​ពីរ​នាក់​នោះ ថា ពួកគេ​​ត្រូវ​បាន​សហគមន៍​គំរាម​ដោយ​​ពូថៅ និង​កាំបិត ឲ្យ​បញ្ឈប់​សកម្មភាព​ឈូសឆាយ រឿង​នេះ​ធ្វើឲ្យ​គ្រួសារ​ពួកគេ​ព្រួយបារម្ភ និង​បាន​លាឈប់​ពី​ការងារ​ទៀត​ផង អ៊ីចឹង​ហើយ​បានជា​ក្រុមហ៊ុន ចាំបាច់​ត្រូវតែ​ដាក់​ពាក្យប្តឹង​នេះ​ឡើង»។

ក្រោយ​ចូលបំភ្លឺ​នៅ​សាលាដំបូង​ខេត្ត សមាជិក​សហគមន៍ លោក ផុន រុំ អាយុ ២២ ឆ្នាំ បាន​ឲ្យ​ដឹង​ថា ក្រោយពី​លោក​បាន​រៀបរាប់​ដំណើរ​រឿង​ចប់​សព្វគ្រប់ ព្រះរាជអាជ្ញារង​ខេត្ត លោក ឡុង ស៊ីថា ក៏​បាន​ផ្តាំ​ថា៖ «គាត់​ថា ពេល​ក្រោយ​បើ​មាន​រឿង​ដាក់បណ្តឹង​មក​កាន់​សាលាដំបូង​ខេត្ត​មក កុំ​ទៅ​រារាំង​គេ​នៅ​កន្លែង​កើតហេតុ​​នោះ ដែល​នាំឲ្យ​មាន​រឿង ខ្ញុំ​ក៏​បាន​ប្រាប់​គាត់​ដដែលៗ​ថា ពួកយើង​រារាំង​មិន​បាន​ប្រើ​អាវុធ​អី​នោះ​ទេ»។

លោក ឡុង ស៊ីថា ព្រះរាជអាជ្ញារង​ខេត្ត​បាន​ឲ្យ​ដឹង​ថា ការសួរនាំ​នេះ គឺ​ដើម្បី​រក​មុខ​អ្នកស្រវឹង ប្រើ​ពូថៅ និង​កាំបិត​ទៅ​គំរាម​អ្នកបើកបរ​គ្រឿងចក្រ​ពីរ​នាក់​នោះ។

លោក​ថា៖ «ក្នុង​ថ្ងៃ​កើតហេតុ​នោះ សហគមន៍​បាន​បង្ខាំង​អ្នកបើកបរ​នោះ ១ ​ថ្ងៃ​ ១ ​យប់ គឺ​ខុស ហើយ​ថែម​ទាំង​ប្រើ​​កាំបិត ពូថៅ​ទៀត រឿង​នេះ យើង​នឹង​កោះ​ហៅ​មក​សួរ​ច្រើន​នាក់​ទៀត»។

ចំពោះ​ការចោទប្រកាន់​នេះ មន្ត្រី​សម្របសម្រួល​គម្រោង​ដី​សហគមន៍​នៃ​អង្គការ​ពន្លក​ខ្មែរ លោក លូត សាំង បាន​អះអាង​ថា៖ «ពលរដ្ឋ​ទាំងនោះ មិន​បាន​បង្ខាំង​មនុស្ស ឬ​ប្រើប្រាស់​អាវុធ​គំរាម​នោះ​ទេ ព្រោះ​ខ្ញុំ ក៏​មាន​វត្តមាន​អង្កេតហេតុការណ៍​នៅ​ថ្ងៃ​កើតហេតុ​ដូច​គ្នា​នោះ»។

លោក សូ សេរី អភិបាលរង​ខេត្ត​ព្រះវិហារ ដែល​ទទួល​បន្ទុក​ដោះស្រាយ​បញ្ហា​នេះ បាន​ឲ្យ​ដឹង​ថា ជម្លោះ​ដីធ្លី​របស់​សហគមន៍​ជនជាតិ​ដើម​ភាគតិច​ក្នុង​ឃុំ​ប្រមេរុ​នេះ គឺ​ពិបាក​ក្នុង​ការដោះស្រាយ​ដោយ​ហេតុថា​សហគមន៍​ពិបាក​ក្នុង​ការ​ទំនាក់ទំនង។

លោក​ថា៖ «រឿង​នេះ​គឺ​មិន​ចប់​មិន​ហើយ​ទេ បងប្អូន​ជនជាតិ​គឺ​គាត់​គិត​តែ​ពី​ទាមទារ ដែល​នាំឲ្យ​យើង​ពិបាក​សម្របសម្រួល ខ្ញុំ​គិត​ថា ឆាប់ៗ​នេះ ខ្ញុំ​នឹង​ស្នើ​ទៅ​គណៈអភិបាល​ខេត្ត បង្កើត​ក្រុម​ការងារ​ចម្រុះ​ដើម្បី​ដោះស្រាយ​បញ្ហា​នេះ»៕

អត្ថបទគួរចាប់អារម្មណ៍