មណ្ឌលគិរី: ជនជាតិដើមភាគតិចព្នងជិត ២០ គ្រួសាររស់នៅភូមិពូឆប ឃុំដាក់ដាំ ស្រុកអូររាំង បានស្នើឱ្យអាជ្ញាធរជួយដោះស្រាយទំនាស់ដីធ្លី ដោយពួកគាត់អះអាងថា ដីទំហំ ៦០ ហិកតា ត្រូវបានគេលួចធ្វើបណ្ណកម្មសិទ្ធិរំលោភយក ខណៈដែលមន្ត្រីកំពុងស្រាវជ្រាវករណីនេះ។
អ្នកស្រី ញ៉ាញ បូរ៉ា តំណាងពលរដ្ឋទំនាស់ដីធ្លីចំនួន ១៧ គ្រួសារប្រាប់ ភ្នំពេញ ប៉ុស្ដិ៍ នៅថ្ងៃទី ៥ ខែមករា ថា ដីរបស់ជនជាតិដើមភាគតិចចំនួន ៦០ ហិកតា ត្រូវបានឈ្មួញខិលខូចលួចធ្វើបណ្ណកម្មសិទ្ធិរំលោភយកក្នុងអំឡុងចុងឆ្នាំ ២០២០។ ដីនេះពលរដ្ឋបានអាស្រ័យផលជាង ១០ ឆ្នាំមកហើយ ដោយមានការទទួលស្គាល់ពីអាជ្ញាធរមូលដ្ឋានត្រឹមត្រូវ។
អ្នកស្រីបន្តថា នៅអំឡុងខែធ្នូ ឆ្នាំ ២០២០ មានបុគ្គល ២ នាក់ ឈ្មោះ ឡុង សនសិត និងឈ្មោះ ចន្ថា បានដឹកនាំបក្ខពួកមកធ្វើរបងហ៊ុមព័ទ្ធដីស្រែចម្ការទាំងអស់នេះ ដោយអះអាងថា ខ្លួនបានទិញពីពលរដ្ឋម្នាក់ជាយូរឆ្នាំមកហើយ ព្រមទាំងមានការទទួលស្គាល់ពីអាជ្ញាធរត្រឹមត្រូវទៀតផង។
អ្នកស្រី ញ៉ាង បូរ៉ា បញ្ជាក់ថា៖ «កាលពីពេលថ្មីៗនេះ បុគ្គលឈ្មោះ ឡុង សនសិត បានដឹកនាំកម្លាំងគាត់មកធ្វើរបងព័ទ្ធយកដីហ្នឹងហើយប្រជាពលរដ្ឋបាននាំគ្នាតវ៉ា និងប្ដឹងទៅអាជ្ញាធរមូលដ្ឋាន ប៉ុន្ដែអាជ្ញាធរឆ្លើយថា គាត់មិនអាចជួយដោះស្រាយបានទេ គួរតែទៅរកអាជ្ញាធរស្រុកអូររាំងឱ្យជួយដោះស្រាយ»។
ពលរដ្ឋម្នាក់ទៀតដែលថ្លែងសុំមិនបញ្ចេញឈ្មោះឱ្យដឹងថា ពួកលោកបានប្ដឹងទៅអាជ្ញាធរមូលដ្ឋានហើយ ប៉ុន្ដែអាជ្ញាធរបានបង្វែរសំណុំរឿងនេះទៅឱ្យអាជ្ញាធរស្រុកអូររាំង ឱ្យជួយដោះស្រាយវិញ ព្រោះសំណុំរឿងនេះហួសពីដែនសមត្ថកិច្ចរបស់ពួកគាត់។ បុគ្គលទាំង ២ នាក់ ដែលដឹកនាំកម្លាំងមកធ្វើរបងវាតយកដីនេះជាពលរដ្ឋធម្មតា ប៉ុន្ដែពួកគាត់ប្រហែលជាអ្នកតំណាងឱ្យបុគ្គលមានអំណាច ហើយលោកមិនទាន់ស្គាល់បុគ្គលដែលនៅពីក្រោយខ្នងនៅឡើយ។
លោកបញ្ជាក់ថា៖ «ខ្ញុំសូមស្នើឱ្យអាជ្ញាធរពាក់ព័ន្ធជួយដោះស្រាយបញ្ហាទំនាស់ដីធ្លីរបស់ពួកខ្ញុំផង ព្រោះដីទាំងអស់នេះ ពួកខ្ញុំបានអាស្រ័យផលជាច្រើនឆ្នាំមកហើយ។ ប៉ុន្ដែឥឡូវនេះ ស្រាប់តែមានគេឈូសឆាយ ព័ទ្ធរបង និងឈូសធ្វើផ្លូវជាច្រើនកន្លែង»។
លោក ចាស ណា មេឃុំដាក់ដាំថ្លែងពីថ្ងៃទី ៥ មករាថា លោកបានទទួលពាក្យបណ្ដឹងប្រជាពលរដ្ឋទាំងនោះហើយ ដោយលោកកំពុងស្រាវជ្រាវជុំវិញទំនាស់ និងគ្រោងកោះហៅភាគីទាំង ២ មកដោះស្រាយគ្នាតាមនីតិវិធីច្បាប់ ដើម្បីបញ្ចប់ការតវ៉ារបស់ពលរដ្ឋ។ លោកនឹងស្នើសុំឱ្យមានសមាសភាពអាជ្ញាធរស្រុកចូលរួមដោះស្រាយជាមួយពលរដ្ឋផងដែរ។
លោកបញ្ជាក់ថា៖ «ខ្ញុំកំពុងសើរើឯកសារពីមុនៗទាក់ទងដីហ្នឹងមកមើលម្ដងទៀត ហើយកោះហៅពួកគាត់ទាំងពីរភាគីមកប្រជុំគ្នាដោះស្រាយ។ ដីហ្នឹងភាគីពលរដ្ឋមានប្លង់ទន់ពីខាងអាជ្ញាធរមូលដ្ឋាន ហើយភាគីម្ខាងទៀត ក៏គេអះអាងថា គេមានប្លង់ហ្នឹងដែរ តែបើតាមខ្ញុំចាំបាន គឺខ្ញុំមិនដែលបានចេញលិខិតអ្វីឱ្យភាគីអ្នករងការចោទប្រកាន់ទេ»។
លោក សៀក មុន្នីអភិបាលស្រុកអូររាំងមិនអាចទាក់ទងសុំការបញ្ជាក់ជុំវិញករណីនេះបានទេដោយលោកបានបិទទូរស័ព្ទ។
ចំណែកលោក ឡុង សនសិត និងបក្ខពួកឈ្មោះ ចន្ថា ដែលរងរចោទប្រកាន់ពាក់ព័ន្ធករណីវិវាទដីធ្លីនេះមិនអាចស្វែងរកប្រភពទាក់ទង ដើម្បីសុំការបញ្ជាក់បានទេ។
លោក ប៉ែន ប៊ុណ្ណារ៍ មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាននៃសមាគមអាដហុកបានថ្លែងថា បើទោះជាមានការឃាត់ខ្លួនឈ្មួញ និងដកតំណែងមន្ត្រីជាន់ខ្ពស់ជាហូរហែពាក់ព័ន្ធនឹងករណីវិវាទដីធ្លីក៏ដោយ ក៏នៅខេត្តមណ្ឌលគិរីករណីវិវាទដីធ្លីនៅតែបន្តកើតឡើង តាមរយៈការលួចបន្លំធ្វើបណ្ណកម្មសិទ្ធិ និងការរំលោភយកដីរដ្ឋ។
លោកបញ្ជាក់ថា៖ «ករណីទាំងអស់នេះ គឺជាបន្ទុករបស់អាជ្ញាធរមូលដ្ឋាន ព្រោះពួកគាត់ជាអ្នកទទួលខុសត្រូវខ្ពស់ក្នុងការគ្រប់គ្រងទ្រព្យសម្បត្តិទាំងរដ្ឋ និងឯកជនរបស់ពលរដ្ឋ។ ដូច្នេះពួកគាត់ត្រូវតែដឹងរឿងទាំងអស់នេះច្បាស់ជាងនរណាៗទាំងអស់។ អ៊ីចឹងកាតព្វកិច្ចដោះស្រាយទំនាស់គួរតែពួកគាត់ជាអាជ្ញាធរមូលដ្ឋានអាចដោះស្រាយជូនពលរដ្ឋបានដោយប្រើនីតិវិធីច្បាប់ត្រឹមត្រូវ»៕