.jpg)
ពលរដ្ឋមានជម្លោះដីធ្លីអង្គុយចាំនៅមុខសាលាដំបូងខេត្តព្រះវិហារ។ ឡូត សាំង
ព្រះវិហារៈ សមាជិកសហគមន៍ជនជាតិដើមភាគតិចកួយចំនួន៤នាក់បានចូលទៅបំភ្លឺក្នុងសាលាដំបូងខេត្តព្រះវិហារកាលពីថ្ងៃម្សិលមិញ ជុំវិញបទចោទប្រកាន់ពីបទចាប់ឃុំឃាំង និងបង្ខាំងដោយខុសច្បាប់ ក្រោយពីពលរដ្ឋមួយចំនួនបាននាំគ្នាចុះទៅរារាំងគ្រឿងចក្ររបស់ក្រុមហ៊ុនចិនចំនួន ២ គ្រឿង ដែលធ្វើសកម្មភាពឈូសដីស្រែរបស់ពួកគាត់។ អ្នកទាំង ៤ នាក់ មានឈ្មោះ ផូ ភេទ, ណម ថុល, ផុន រុំ និងឈ្មោះ ប៉ាវ សែវ។
នៅក្នុងដីកាបញ្ជាឱ្យចូលខ្លួនរបស់ចៅក្រមស៊ើបសួររបស់តុលាការខេត្តព្រះវិហារឈ្មោះជៀន ស្រស់ ចុះកាលពីថ្ងៃទី ២៦ ខែ កុម្ភៈ ឆ្នាំ ២០១៩ គឺបានដាក់មនុស្សចំនួន ៨ នាក់ ឱ្យស្ថិតនៅក្រោមការពិនិត្យពីបទល្មើសព្រហ្មទណ្ឌជុំវិញការចាប់ឃុំឃាំង និងការបង្ខាំងដោយខុសច្បាប់ និងម្នាក់ទៀតជាបុគ្គលិកអង្គការពន្លកខ្មែរ ពីបទសមគំនិត ដែលប្រព្រឹត្តឡើងនៅភូមិបុស្សធំ ឃុំប្រមេរុ ស្រុកត្បែងមានជ័យ កាលពីឆ្នាំ ២០១៤ កន្លងទៅ។ ក្នុងចំណោមមនុស្សទាំង ៩ នាក់នេះ គឺមាន ៤ នាក់ ត្រូវចូលបំភ្លឺនៅថ្ងៃទី ២៧ ខែ មីនា ម្សិលមិញ និង ៣ នាក់នៅថ្ងៃទី ២៨ មីនានេះ ហើយ ២ នាក់ទៀត នឹងត្រូវចូលបំភ្លឺ នៅថ្ងៃទី ២៩ មីនា។
លោក ឡូត សាំង សមាជិកសហគមន៍ជនជាតិដើមបានប្រាប់កាសែតភ្នំពេញ ប៉ុស្ដិ៍ម្សិលមិញថា ពលរដ្ឋប្រហែល ៦០ នាក់មកពីឃុំប្រមេរុ ស្រុកត្បែងមានជ័យ បាននាំគ្នាធ្វើដំណើរមកកាន់តុលាការខេត្តព្រះវិហារផងដែរ ដើម្បីបង្ហាញការគាំទ្រនិងលើកទឹកចិត្តទៅដល់យុវជនទាំង ៤ នាក់ ដែលត្រូវចូលទៅបំភ្លឺក្នុងតុលាការនោះ។
លោក សាំង បានអះអាងថា មូលហេតុដែលចៅក្រមស៊ើបសួរឈ្មោះ ជៀន ស្រស់ ចេញដីកាបញ្ជាឱ្យយុវជនទាំង ៤ នាក់ ចូលបំភ្លឺក្នុងតុលាការ គឺដោយសារកាលពីឆ្នាំ ២០១៤ កន្លងទៅ ប្រជាពលរដ្ឋរាប់រយគ្រួសារនៅឃុំប្រមេរ បានលើកគ្នាទៅឃាត់សកម្មភាពឈូសឆាយដីស្រែចម្ការពីសំណាក់ក្រុមហ៊ុនដាំស្ករអំពៅរបស់ជនជាតិចិនឈ្មោះ ហេង ហ្វ៊ូ និងបានយកគ្រឿងចក្រនោះទៅទុកនៅសាលាឃុំប៉ុន្តែមិនបានធ្វើឲ្យប៉ះពាល់ឬបំផ្លាញគ្រឿងចក្រនោះឡើយ ក្រោយមកខាងក្រុមហ៊ុនក៏បានយកគ្រឿងចក្ររបស់ខ្លួនទៅវិញដែរកាលពីឆ្នាំ២០១៤។
លោក សាំង ថ្លែងថា៖ «ខ្ញុំយល់ឃើញថាគឺជារឿងអយុត្តិធម៌ ជាពិសេសសម្រាប់សហគមន៍ជនជាតិដើមភាគតិច និងបុគ្គលិកអង្គការផ្នែកសិទ្ធិមនុស្ស ដែលពួកគាត់ការពារដីធ្លីរបស់ខ្លួនឯង តែបែរជាជាប់ពាក្យបណ្ដឹងពីក្រុមហ៊ុន ក្នុងការឃាត់អាត្រាក់របស់ពួកគេនៅលើដីខ្លួនឯងទៅវិញ។ ប៉ុន្តែកន្លងមក សហគមន៍ធ្លាប់ដាក់ពាក្យបណ្ដឹងក្រុមហ៊ុនពីការឈូសឆាយ តែតុលាការអត់ចាត់វិធានការដោះស្រាយទេ ប៉ុន្តែបើក្រុមហ៊ុនឬអាជ្ញាធរប្ដឹងសហគមន៍ គឺតុលាការដោះស្រាយលឿន»។
លោកស្រី រឿង ខាន់ អនុប្រធានសហគមន៍ជនជាតិដើមភាគតិចនៅឃុំប្រមេរុ បានសំណូមពរឱ្យតុលាការទម្លាក់ចោលបទចោទប្រកាន់មកលើសមាជិករបស់សហគមន៍៨នាក់និងមន្ត្រីអង្គការម្នាក់ ព្រោះដីក៏គេយកអស់ ហើយខ្លួនក៏ជាប់ចោទយ៉ាងហ្នឹងទៀត គឺវាមិនសមហេតុផលអីបន្តិច។
លោកស្រី ជុំ កន្និយ៉ា អ្នកនាំពាក្យតុលាការខេត្តព្រះវិហារបានឆ្លើយតបដោយមិនអាចបកស្រាយយ៉ាងណាឡើយ ដោយសារមិនបានដឹងរឿងនេះស៊ីជម្រៅ។
លោកឡូត សាំង អះអាងថា បន្ទាប់ពីរដ្ឋាភិបាលបានសម្រេចផ្ដល់ដីសម្បទានសេដ្ឋកិច្ចជាង ៤ ម៉ឺនហិកតាស្ថិតក្នុងស្រុកចំនួន ៣ គឺស្រុកឆែប ស្រុកជ័យសែន និងត្បែងមានជ័យ ដែលមានរយៈពេល ៩៩ ឆ្នាំ ទៅឱ្យក្រុមហ៊ុនចិនឈ្មោះ ហេង ហ្វ៊ូ ដើម្បីវិនិយោគដាំស្ករអំពៅមក គឺក្រុមហ៊ុននេះតែងឈូសឆាយរំលោភលើដីស្រែរបស់ពលរដ្ឋ និងជាមូលហេតុនាំពលរដ្ឋជាជនជាតិដើមនៅក្នុងឃុំប្រមេរុប្រហែល ៥០០ គ្រួសារ លើកគ្នាតវ៉ាជាបន្តបន្ទាប់តាំងពីឆ្នាំ ២០១១ មក រួមទាំងការចុះទៅរារាំងសកម្មភាពឈូសឆាយផ្ទាល់ជាដើម។
កត្តាធ្វើឱ្យក្រុមហ៊ុនចិននេះ ឈូសឆាយលើដីស្រែពលរដ្ឋ គឺដោយសារមុនមានការផ្ដល់ដីសម្បទានសេដ្ឋកិច្ច គឺអាជ្ញាធរខេត្តព្រះវិហារមិនបានចុះសិក្សាជាមុននោះទេ។
លោកបញ្ជាក់ថា៖ «គឺជាកំហុសរបស់អាជ្ញាធរខេត្តព្រះវិហារ ដោយសារតែដំបូងឡើយ អាជ្ញាធរខេត្តមិនបានធ្វើការសិក្សាមុនសម្រេចផ្ដល់ដីសម្បទានទាំងនោះទៅក្រុមហ៊ុនចិនឡើយ»។
លោក គង់ សោភ័ណ្ឌ អភិបាលស្រុកត្បែងមានជ័យបញ្ជាក់ថាពលរដ្ឋដែលមានបញ្ហាដីធ្លីជាមួយក្រុមហ៊ុនស្ករអំពៅចិន គឺលោកបានជួយដោះស្រាយជូនពលរដ្ឋទាំងនោះស្ទើរតែគ្រប់គ្រួសារអស់ទៅហើយ។
លោកថា៖ «ខ្ញុំដោះស្រាយជូនពលរដ្ឋមានបញ្ហាដីធ្លីជាមួយក្រុមហ៊ុនចិនចប់រួចអស់ហើយ»៕
