.jpg)
ក្រុមជនជាតិថៃ ត្រូវបានសមត្ថកិច្ចបញ្ជូនឲ្យទៅធ្វើចត្តាឡីស័ក ក្រោយពួកគេឆ្លងដែនចូលកម្ពុជាដោយខុសច្បាប់។ រូបថត ប៉ូលិស
បន្ទាយមានជ័យ៖ ជនជាតិថៃចំនួន ៧ នាក់ ដែលឆ្លងដែនចូលកម្ពុជាដោយខុសច្បាប់ ត្រូវបានសមត្ថកិច្ចនគរបាលចាប់បញ្ជូនឲ្យទៅធ្វើចត្តាឡីស័កនៅមណ្ឌលចត្តាឡីស័កវិទ្យាល័យម៉ាឡៃ មុនបន្តនីតិវិធីបញ្ជូនពួកគេទៅប្រទេសកំណើតពួកគេវិញ។
លោក បេន សំអាត អធិការស្រុកម៉ាឡៃបានឲ្យដឹងថា មកដល់រសៀលថ្ងៃទី ២៧ ខែមេសានេះ ជនជាតិថៃទាំង ៧ នាក់ ដែលឆ្លងដែនខុសច្បាប់ចូលមកកម្ពុជា ហើយត្រូវកម្លាំងសមត្ថកិច្ចចម្រុះរបស់កម្ពុជាចាប់បានកាលពីថ្ងៃទី ២៦ ខែមេសានោះ កំពុងធ្វើចត្តាឡីស័កនៅមណ្ឌលចត្តាឡីស័កវិទ្យាល័យម៉ាឡៃ។
លោកថ្លែងថា៖ «ពេលចប់ចត្តាឡីស័ក យើងនឹងធ្វើតាមនីតិវិធីរបស់យើង ដោយបញ្ជូនទៅខាងសមត្ថកិច្ចជំនាញអន្តោប្រវេសន៍របស់យើង ទាក់ទងទៅខាងសមត្ថកិច្ចជំនាញអន្តោប្រវេសន៍របស់ប្រទេសថៃ ដើម្បីបញ្ជូនពួកគាត់ទាំង ៧ នាក់ហ្នឹងត្រឡប់ទៅប្រទេសកំណើតវិញ» ។
តាមការផ្សាយរបស់អគ្គស្នងការដ្ឋាននគរបាលជាតិឲ្យដឹងថា កម្លាំងចម្រុះដែលមានកម្លាំងនគរបាលប៉ុស្ដិ៍សង្កែ បានសហការជាមួយកម្លាំងនគរបាលប៉ុស្តិ៍រដ្ឋបាលបឹងបេងកម្លាំងផ្នែកយោធាសឹករងខេត្តបន្ទាយមានជ័យ និងកម្លាំងយោធាវរៈ ៥១១ បានចុះប្រតិបត្តិការទប់ស្កាត់បានជនជាតិថៃចំនួន ៧ នាក់ ក្នុងនោះមានស្រី ២ នាក់ បម្រុងលួចឆ្លងដែនទៅប្រទេសថៃ វិញ។
លោកថ្លែងថា៖ «ជនជាតិថៃចំនួន ៧ នាក់ មកស្រុកខ្មែរគ្មានឯកសារគ្រប់គ្រាន់ហើយ បម្រុងលួចឆ្លងដែនទៅប្រទេសថៃ វិញ ត្រូវបានកម្លាំងសមត្ថកិច្ចចម្រុះឈរជើងតាមខ្សែបន្ទាត់ព្រំដែនកម្ពុជា-ថៃ ឃាត់ខ្លួនកាលពីវេលាម៉ោង ៧ ព្រឹក ថ្ងៃទី ២៦ ខែមេសា នៅចំណុចភូមិសង្កែ ឃុំបឹងបេង ស្រុកម៉ាឡៃ ខេត្តបន្ទាយមានជ័យ»។
ក្រោយពីសមត្ថកិច្ចសួរនាំ ជនជាតិថៃទាំង ៧ នាក់ បានប្រាប់ឲ្យដឹងថា ពួកគាត់មកពីខេត្តឈៀងរ៉ាយ ប្រទេសថៃ មកស្នាក់នៅក្រុងប៉ោយប៉ែតរយៈពេល ១ សប្តាហ៍ហើយ ដើម្បីធ្វើការងារបន្ទាប់មកពួកគេចង់ត្រឡប់ទៅប្រទេសថៃវិញ។ ក៏ប៉ុន្តែត្រូវសមត្ថកិច្ចឃាត់ខ្លួនតែម្តង។
ក្នុងថ្ងៃជាមួយគ្នានោះដែរ ក៏មានពលករខ្មែរប្រុស-ស្រី ៩ នាក់ មកពីខេត្តសៀមរាប បម្រុងលួចឆ្លងដែនទៅរកការងារធ្វើនៅប្រទេសថៃ ប៉ុន្តែត្រូវបានសមត្ថកិច្ចឃាត់បាននៅវេលាម៉ោង ៧ យប់ថ្ងៃទី ២៦ មេសា តាមបន្ទាត់ព្រំដែនក្នុងភូមិល្បើកស្វាយ ឃុំស្វាយចេក ស្រុកស្វាយចេក។
លោក ជា ឈ្លូញ អធិការនគរបាលស្រុកស្វាយចេកបានប្រាប់ថា កម្លាំងនគរបាលវរការពារព្រំដែនគោក បានសហការជាមួយកម្លាំងនគរបាលស្រុកស្វាយចេក បានឃាត់ខ្លួនពលករខ្មែរប្រុស-ស្រីចំនួន ៩ នាក់ និងម៉ូតូ ២ គ្រឿង ដែលអ្នកដឹកជញ្ជូនបានរត់គេចខ្លួនបន្សល់ទុកតែម៉ូតូ។
លោកបញ្ជាក់ថា៖ «ពលករចំណាកស្រុកទាំង ៩ នាក់ (ស្រី ៧ នាក់) មកពីខេត្តសៀមរាប ហើយបម្រុងឆ្លងដែនទៅរកការងារធ្វើនៅប្រទេសថៃ តាមរយៈមេខ្យល់ ប៉ុន្តែត្រូវបានកម្លាំងសមត្ថកិច្ចយើងឃាត់ខ្លួនបាន។ ឥឡូវបញ្ជូនទៅធ្វើចត្តាឡីស័កនៅស្រុកស្វាយចេក។ ចំណែកអ្នកដឹកជញ្ជូន ២ នាក់ រត់គេចខ្លួនបាត់យើងកំពុងស្រាវជ្រាវ។ ចំណែកម៉ូតូ ២ គ្រឿង យកទៅរក្សាទុកនៅអធិការដ្ឋាន»៕
