.jpg)
ដីព្រៃដែលជនជាតិភាគតិចអះអាងថា ត្រូវបានគេកាប់ឆ្ការ និងលក់ឲ្យពលរដ្ឋផ្សេងទៀត។ រូបថត សហគមន៍
រតនគិរី: ប្រជាសហគមន៍ជនជាតិដើមភាគតិច ចារាយជាង ២០០ នាក់ រស់នៅភូមិតាំងជិ ឃុំញ៉ាង ស្រុកអណ្ដូងមាសបានចោទប្រកាន់មេភូមិម្នាក់ឈ្មោះ រចំ ផៀង និងប្រធានសហគមន៍ម្នាក់ឈ្មោះ សល់ តក់ ថាបានឃុបឃិតគ្នាលក់ដីព្រៃសហគមន៍ជាង ៣០០ ហិកតា ទៅឲ្យប្រជាពលរដ្ឋផ្សេងទៀតប៉ុន្ដែចុងចោទបានបដិសេធការចោទប្រកាន់នេះ។
លោក សល់ បឿន ប្រជាសហគមន៍ជនជាតិដើមភាគតិច ចារាយរស់នៅភូមិតាំងជិ ឃុំញ៉ាង ស្រុកអណ្ដូងមាសបានថ្លែងថា លោកមេភូមិតាំងជិឈ្មោះ រចំ ផៀង និងប្រធានសហគមន៍ឈ្មោះ សល់ តក់ បានឃុបឃិតគ្នាលួចលក់ដីព្រៃសហគមន៍ជាង ៣០០ ហិកតា ទៅឲ្យប្រជាពលរដ្ឋចំនួន ៦ នាក់ដែលរស់នៅក្នុងតំបន់នោះ។ លោកបន្តថា ពួកលោកកើតទុក្ខមិនសុខចិត្តដែលមេភូមិលួចលក់ដីព្រៃសហគមន៍បម្រុងទុក និងជាដីចម្ការវិលជុំតាមប្រពៃណីរបស់ជនជាតិដើមភាគតិចតែងតែអាស្រ័យផល។
លោកបញ្ជាក់ថា៖ «ដីព្រៃនេះពួកខ្ញុំបានឃើញមានគេចូលមកកាប់ព្រៃ ហើយពួកខ្ញុំទៅហាមឃាត់ស្រាប់តែអ្នកកាប់ព្រៃឈើនោះប្រាប់មកពួកខ្ញុំវិញថា គាត់បានទិញគេរួចហើយ ហើយដីនេះជាដីរបស់គាត់។ ពួកខ្ញុំឆ្ងល់ខ្លាំងណាស់ថា តើនរណាជាអ្នកលក់ដីនោះ? ក្រោយមកអ្នកកាប់ព្រៃប្រាប់ថា មេភូមិ និងប្រធានសហគមន៍ជាអ្នកលក់ឲ្យគាត់។ អ្នកកាប់ព្រៃហ្នឹងថា គាត់បានកក់លុយជិត ១ លានរៀលរួចហើយ ហើយប៉ុន្មានថ្ងៃទៀតគាត់នឹងយកលុយមកបង់បង្គ្រប់»។
ពលរដ្ឋជនជាតិដើមភាគតិចម្នាក់ទៀតសុំមិនបញ្ចេញឈ្មោះបានស្នើឲ្យអាជ្ញាធរជួយរឹបអូសដីទាំងនោះមករក្សាទុកជាសម្បត្តិរដ្ឋវិញ ហើយអនុញ្ញាតឲ្យជនជាតិដើមភាគតិចអាស្រ័យផលដូចកាលពីមុនទៀត។ ដីព្រៃនេះត្រូវបានប្រជាពលរដ្ឋធ្លាប់អាស្រ័យផលបេះបន្លែ បោចវល្លិ៍ ដកផ្សិត និងរើសអុសតាំងពីដូនតាមក។
លោកបញ្ជាក់ថា៖ «ពួកខ្ញុំបានស៊ើបសួររួចហើយ ខាងអាជ្ញាធរឃុំ គាត់អត់បានពាក់ព័ន្ធរឿងលក់ដីនេះគឺមានតែមេភូមិតាំងជិ និងប្រធានសហគមន៍ពួកខ្ញុំហ្នឹងទេដែលជាអ្នកលក់។ បើឈ្មួញមិនប្រគល់ដីនោះទុកជាដីរដ្ឋវិញទេ គឺយើងនឹងតវ៉ាដល់អាជ្ញាធរស្រុកអណ្ដូងមាសតែម្ដង»។
លោក រចំ ផៀង មេភូមិតាំងជិ ដែលរងការចោទប្រកាន់ពីពលរដ្ឋបានប្រាប់ភ្នំពេញប៉ុស្ដិ៍ពីម្សិលមិញថា លោកមិនបានពាក់ព័ន្ធនឹងការលក់ដីព្រៃសហគមន៍នេះទេ។ ការចោទប្រកាន់មកលើរូបលោកនេះពិតជាគ្មានមូលដ្ឋានច្បាស់លាស់ ហើយក៏មិនមែនជាការពិតដែរ។
លោកបន្តថានៅតំបន់នេះមិនមានដីព្រៃបម្រុងទុករបស់សហគមន៍អ្វីទេ គឺមានតែរបស់ក្រុមហ៊ុនផារី ៧ មករា ដែលកំពុងធ្វើអាជីវកម្មដាំដំណាំកៅស៊ូ ប៉ុន្ដែក្រុមហ៊ុនមិនបានកាប់ទន្ទ្រានដីព្រៃរបស់រដ្ឋបន្ថែមទៀតទេ។ លោកបញ្ជាក់ថា៖ «ពលរដ្ឋទាំងនេះតែងតែចោទខ្ញុំថា លក់ដីលក់ធ្លី ប៉ុន្ដែជាក់ស្ដែងគាត់មានដីពីណាឲ្យខ្ញុំលក់ ដីសហគមន៍គេបានបែងចែកឲ្យគាត់អស់ហើយ អ៊ីចឹងអត់មានដីសហគមន៍អីទៀតទេ»។
លោក រណាម ហ៊ិន មេឃុំញ៉ាងថ្លែងថា លោកធ្លាប់ទទួលបានព័ត៌មាននេះពីពលរដ្ឋដោយលោកបានកោះហៅលោកមេភូមិមកសាកសួររួចហើយកាលពីខែមុន ប៉ុន្ដែលោកមេភូមិរូបនេះបានអះអាងថា លោកមិនបានជាប់ពាក់ព័ន្ធការលក់ដីព្រៃទាំងនេះទេ។
លោកបន្តថា នៅតំបន់នេះមានតែដីរបស់ក្រុមហ៊ុនផារី ៧ មករាដែលកំពុងដាំដំណាំកៅស៊ូ ដោយក្រុមហ៊ុនមិនបានធ្វើការឈូសឆាយដីព្រៃ ឬរំលោភដីព្រៃបន្តទៀតទេ។ ក្រៅពីដីក្រុមហ៊ុននេះក៏មានដីសេសសល់ពីក្រុមហ៊ុនចំនួនជិត ៣០០ ហិកតាដែរ ប៉ុន្ដែវាជាដីព្រៃដោយមិនអាចនរណាម្នាក់ហ៊ានទិញ ឬលក់ដីនេះទេ ព្រោះជាសម្បត្តិរដ្ឋដែលបម្រើឲ្យផលប្រយោជន៍ពលរដ្ឋរួមគ្នា។ លោកបញ្ជាក់ថា៖ «អ៊ីចឹងបើសិនរឿងនេះនៅបន្តបែបនេះខ្ញុំនឹងកោះហៅភាគីទាំងអស់មកសាកសួរឲ្យដឹងរឿង កុំឲ្យដើរចោទគ្នាអ៊ីចឹង ព្រោះដីព្រៃនេះមិនអាចមាននរណាលក់ដូរបានទេ»។
លោក ឃេន សានិត អភិបាលស្រុកអណ្ដូងមាសប្រាប់ភ្នំពេញ-ប៉ុស្ដិ៍ពីម្សិលមិញថា កាលពីប៉ុន្មានខែមុនមានការរាយការណ៍មកថា មានគេលួចលក់ព្រៃចំនួនជិត ៣០០ ហិកតាប៉ុន្ដែភ្លាមៗនោះ លោកបានបញ្ជាឲ្យមេឃុំប្រញាប់ដោះស្រាយបន្ទាន់។ លោកបន្តថា ក្រោយពីមេឃុំចុះអន្តរាគមន៍ក៏ស្ងាត់ហើយ ប៉ុន្ដែខណៈនេះស្រាប់តែទទួលព័ត៌មានម្ដងទៀត។ យ៉ាងណាលោកសន្យាថា នឹងចុះទៅដោះស្រាយផ្ទាល់ ដើម្បីបញ្ចប់ទំនាស់ដីធ្លីរបស់អ្នកភូមិនៅតំបន់នោះ៕
