.jpg)
ដីព្រៃមួយកន្លែងផ្សេងទៀតនៅក្នុងខេត្តមណ្ឌលគិរី ដែលត្រូវបានគេកាប់រានកាលពីខែមុន។ រូបថត ប្រជាសហគមន៍
លោក ស្រាំង សឿន ដែលជាតំណាងម្នាក់ នៅក្នុងសហគមន៍ពូទិល បានប្រាប់ភ្នំពេញប៉ុស្តិ៍ថា ព្រៃឈើនៅក្នុងសហគមន៍របស់ពួកគាត់ ស្ថិតនៅក្នុងភូមិ ៤ ឃុំប៊ូស្រា ត្រូវបានក្រុមជនខិលខូចមកពីបណ្ដាខេត្តផ្សេងៗ ដូចជាកំពង់ចាម ត្បូងឃ្មុំ ស្ទឹងត្រែង លួចកាប់រានយកដីធ្វើចំការអស់ជាច្រើនហិកតា។
ជាក់ស្ដែងនៅព្រឹកថ្ងៃទី ២៧ ខែកញ្ញា ដោយមានការគាំទ្រពីកម្លាំងអាជ្ញាធរស្រុកពេជ្រាដា ប្រជាសហគមន៍របស់ពួកគាត់ បាននាំគ្នាចុះល្បាតព្រៃហើយបានប្រទះឃើញបុរសពីរនាក់ ដែលម្នាក់ឈ្មោះ អ៊ុល កុសល អាយុ២៤ឆ្នាំ និង ម្នាក់ទៀតឈ្មោះ រាម ធី អាយុ២៧ឆ្នាំ កំពុងប្រើរណារយន្តនិងកាំបិតផ្គាក់ លួចកាប់ទន្ទ្រានយកដីព្រៃនៅក្នុងសហគមន៍របស់ពួកគាត់ អស់ជាច្រើនហិកតាថែមទៀត។
លោក សឿន បានបញ្ជាក់ថា៖«យើងបានចាប់ឃាត់ខ្លួនពួកគេទាំងពីរនាក់ និងបានរឹបអូសវត្ថុតាងមួយចំនួន រួមមាន រណារយន្តមួយគ្រឿង កាំបិតផ្គាក់ពីរដើម ខ្សែពួរមួយចង្វាយ និងម៉ូតូមួយគ្រឿង ប្រគល់ឲ្យអាជ្ញាធរស្រុក ដើម្បីចាត់វិធានការទៅតាមផ្លូវច្បាប់»។
បើតាមលោក សឿន បុរសសង្ស័យទាំងពីរនាក់ គឺជាជនចំណាកស្រុក មកពីខេត្តកំពង់ចាម និង ត្បូងឃ្មុំ ដែលកាលពីឆ្នាំមុន ពួកគេ ធ្លាប់បានចូលលួចកាប់រានដីព្រៃ នៅក្នុងសហគមន៍របស់ពួកគាត់ម្ដងរួចមកហើយ ប៉ុន្តែកាលនោះ ប្រជាសហគមន៍គ្រាន់តែរារាំង និង អប់រំឲ្យពួកគេបញ្ឈប់ការកាប់រានដីព្រៃរបស់សហគមន៍តទៅទៀត។
ពាក់ព័ន្ធករណីនេះ លោក អ៊ុល ធី ដែលជាបងប្រុសរបស់ជនសង្ស័យ ឈ្មោះ អ៊ុល កុសល បានប្រាប់ភ្នំពេញប៉ុស្តិ៍ថា មុនពេលចូលកាប់រានដីព្រៃនោះ ពួកគាត់បានស្នើសុំដីសង្គមកិច្ច ពីអាជ្ញាធរមូលដ្ឋានក្នុងភូមិ ៤ ឃុំប៊ូស្រា ដោយផ្ទាល់មាត់រួចហើយ ប៉ុន្តែ ពុំមានឯកសារផ្លូវច្បាប់នោះទេ។
លោកថ្លែងថា៖«យើងគ្រាន់តែចង់បានដីសង់លំនៅឋានស្នាក់នៅ និងធ្វើចំការសម្រាប់ដោះស្រាយជីវភាព ប៉ុណ្ណោះ ព្រោះយើងក្រីក្រខ្លាំងណាស់ ពុំមានលទ្ធភាពទិញដីសង់ផ្ទះនៅនោះទេ»។
ជុំវិញករណីនេះ លោក តន់ យ៉េន អធិការស្រុកពេជ្រាដា បានប្រាប់ភ្នំពេញប៉ុស្តិ៍ថា បុរសសង្ស័យទាំងពីរនាក់ ត្រូវបានប្រជាសហគមន៍ពូទិល ចាប់ឃាត់ខ្លួន ដោយចោទថា បានលួចកាប់រានដីព្រៃសហគមន៍របស់ពួកគាត់ដោយខុសច្បាប់ ប៉ុន្តែ បើតាមការបំភ្លឺពីមេភូមិទី ៤ និងមេឃុំប៊ូស្រា ពួកគេបានស្នើសុំដី ដើម្បីសង់លំនៅឋាន និង ធ្វើចំការដើម្បីដោះស្រាយជីវភាព ដោយពួកគេ ជាជនក្រីក្រ ចំណាកស្រុកមកពីខេត្តកំពង់ចាម និង ត្បូងឃ្មុំ។
លោក យ៉េន បានបន្តថា៖«ទោះជាបែបណា ពួកគេត្រូវបានប្រជាសហគមន៍ចាប់ឃាត់ខ្លួនក្នុងបទល្មើសជាក់ស្ដែង គឺខណៈកំពុងកាប់រានដីព្រៃ ដោយប្រើឧបករណ៍រណារយន្តខុសច្បាប់»។
លោក យ៉េន បានបន្តថា ដោយមានការសម្របសម្រួល ពីរដ្ឋបាលស្រុកពេជ្រាដា និង យោងសំអាងរបស់លោក ចិត្រ ច្រិះ មេភូមិទី ៤ និង លោក យឺត សារីន មេឃុំប៊ូស្រា ជនសង្ស័យទាំងពីរ ត្រូវបានដោះលែងឲ្យត្រឡប់ទៅផ្ទះវិញ បន្ទាប់ពីពួកគេបានផ្ដិតមេដៃបញ្ឈប់ការកាប់រានដីព្រៃសហគមន៍ដោយគ្មានការអនុញ្ញាតពីអាជ្ញាធរស្រុក ពិសេសពីសហគមន៍ជនជាតិដើមភាគតិចនៅក្នុងតំបន់ខាងលើនេះ។
បើតាមលោកស៊្រឹ ឆើញ ប្រធានសហគមន៍ពូទិល អាជ្ញាធរភូមិ-ឃុំ ពុំមានសិទ្ធិនៅក្នុងការកាត់ដីព្រៃសហគមន៍របស់ពួកគាត់ ទៅឲ្យបុគ្គលណាម្នាក់នោះទេ ព្រោះវាជាដីបម្រុងទុករបស់សហគមន៍ សម្រាប់ផ្ដល់ជូនគ្រួសារជំនាន់ក្រោយរបស់ប្រជាសហគមន៍ជនជាតិដើមភាគតិចព្នង។
លោកឆើញបានថ្លែងថា៖«ជុំវិញការដោះលែងជនល្មើសទាំងពីរនាក់នៅពេលនេះ សហគមន៍យើងនឹងបន្តធ្វើការស្រាវជ្រាវបន្ថែមទៀត ថាតើជនសង្ស័យទាំងពីរនោះ ពិតជាក្រីក្រ គ្មានដីធ្លីនិងផ្ទះសំបែងពិតប្រាកដ ឬមួយយ៉ាងណា ហើយហេតុអ្វីបានជាពួកគេមិនស្នើសុំ ដីសម្បទានសង្គមកិច្ចពីអាជ្ញាធរ បែរជាមកលួចកាប់រានដីព្រៃរបស់សហគមន៍ជនជាតិភាគតិចរបស់យើងខ្ញុំទៅវិញ»៕
