មណ្ឌលគិរីៈ ជនជាតិដើមភាគតិចនៅខេត្តមណ្ឌលគិរីបាននាំប៉ូលិសប៉ុស្ដិ៍ និងមន្ត្រីបរិស្ថានចុះទៅដល់ទីតាំងដែលមានការលួចអារឈើនៅក្នុងដែនជម្រកសត្វព្រៃភ្នំព្រេច ក្រោយពីពួកគាត់បានរាយការណ៍ទៅអាជ្ញាធរភូមិ និងឃុំអំពីករណីនេះអស់ជាច្រើនខែ តែមិនឃើញមានការចុះបង្ក្រាប។
លោក លីវ ខែម លេខាធិការ សហគមន៍ព្រៃឈើភូមិពូញ៉ាវបានថ្លែងថា កាលពីថ្ងៃទី ៦ កក្កដាខាងសហគមន៍ជនជាតិដើមចំនួន ១០ នាក់ បាននាំមន្ត្រីបរិស្ថាន ៣ នាក់ និងមន្ត្រីប៉ូលិស ៣ នាក់ចុះទៅដល់ទីតាំងដែលមានការលួចអារឈើ ដែលក្រុមសហគមន៍បានចុះល្បាតប្រទះឃើញតាំងពីខែឧសភា ស្ថិតនៅក្នុងដែនជម្រកសត្វព្រៃភ្នំព្រេច ឃុំមេម៉ង ស្រុកកែវសីមា។
លោកថា ការនាំមន្ត្រីជំនាញចុះទៅបង្ក្រាបនេះ គឺដើម្បីកុំឱ្យមានការចោទប្រកាន់មកលើសហគមន៍ថា ចេះតែលើកឡើងខុសពីការពិត ឬចុះថតផ្ដេសផ្ដាសថា មានបទល្មើសព្រៃឈើនៅក្នុងតំបន់ការពារ ម្យ៉ាងវិញទៀត បន្ទាប់ពីមិនបានឃើញមានសកម្មភាពចុះបង្ក្រាប ក្រោយពីខាងសហគមន៍បានរាយការណ៍ទៅមន្ត្រីឃុំអស់រយៈពេលរាប់ខែតាំងពីបានចុះល្បាតរកឃើញករណីបទល្មើសភ្លាម។
លោកថា៖ «យើងរកឃើញបទល្មើសហ្នឹងច្រើនខែមកហើយ ប៉ុន្តែយើងអត់ឃើញមានអាជ្ញាធរសមត្ថកិច្ចចុះបង្ក្រាប។ យើងបានរាយការណ៍ទៅឃុំ គាត់ថារវល់ និងទុកឱ្យភូមិដោះស្រាយ។ យើងនាំមន្ត្រី (មន្ត្រីបរិស្ថាន និងប៉ូលិស) ចុះទៅផ្ទាល់នេះ គឺដើម្បីកុំឱ្យពួកគាត់ថា យើងកុហក ហើយនៅពេលចុះផ្ទាល់គឺឃើញអ៊ីចឹងមែន»។
លោកអះអាងថា ដើមឈើធំៗជាច្រើនដើម ដែលមិនអាចរាប់អស់ ជាពិសេសប្រភេទសុក្រំដែលមានមុខកាត់ប្រហែលពី ២០ សង់ទីម៉ែត្រទៅដល់ ៤០ សង់ទីម៉េត្រត្រូវបានក្រុមជនល្មើសអារផ្ដួលរំលំ ហើយបានអារច្រៀកដើម្បីដឹកចេញពីព្រៃនៅក្នុងដែនជម្រកសត្វព្រៃ។
មន្ត្រីបរិស្ថានម្នាក់ដែលចុះបង្ក្រាបនេះបានបដិសេធធ្វើអត្ថាធិប្បាយ ចំណែកលោក កប ធុន នាយប៉ុស្ដិ៍ ឃុំមេម៉ងថា មិនទាន់ទទួលបានព័ត៌មានពីមន្ត្រីរបស់លោកដែលបានចុះទៅដល់ទីតាំងអារឈើនេះនៅឡើយទេ។
ប៉ុន្តែលោក ចាន់ សាមេន មេឃុំមេម៉ង បានបដិសេធចំពោះការចោទប្រកាន់ពីខាងសហគមន៍ដែលថា ឃុំមិនបានចុះបង្ក្រាបបទល្មើសព្រៃឈើនៅភូមិមេម៉ងក្នុងដែនជម្រកសត្វព្រៃភ្នំព្រេចនេះ។ លោកថា លោកតែងនាំកម្លាំងនគរបាលថ្នាក់ឃុំ ចុះបង្ក្រាបបទល្មើសព្រៃឈើជាបន្តបន្ទាប់នៅពេលទទួលបានការរាយការណ៍ពីខាងសហគមន៍។
លោកថា៖ «ពួកគាត់អត់ដែលរាយការណ៍បទល្មើសព្រៃឈើ (ក្នុងភូមិមេម៉ង) ឯណា ចេះតែថា! អ៊ីចឹង ខ្ញុំមិនចូលចិត្តទេ អត់បានរាយការណ៍ផង តែថាបានរាយការណ៍។ ប្រសិនបើពួកគាត់រាយការណ៍មក គឺខ្ញុំមានកម្លាំងសមត្ថកិច្ចនៅឃុំហ្នឹងចុះបង្ក្រាបទៅតាមបទបញ្ជាពីថ្នាក់ជាតិមក»។
ភ្នំពេញប៉ុស្ដិ៍មិនអាចសុំការបញ្ជាក់ពីលោក កែវ សុភ័ក្រ ប្រធានមន្ទីរបរិស្ថានខេត្តមណ្ឌលគិរីបានទេដោយសារទូរស័ព្ទរបស់លោកមិនអាចទាក់ទងបាន។
លោក អ៊ាង ម៉េងលី អ្នកសម្របសម្រួលសមាគមអាដហុកប្រចាំខេត្តមណ្ឌលគិរីបានលើកឡើងថា មន្ត្រីមូលដ្ឋានគឺត្រូវតែដាក់បណ្ដឹងបរិហារ ឬរាយការណ៍ទៅតុលាការ នៅពេលដឹងថា មានបទល្មើសព្រៃឈើកើតឡើង ប៉ុន្តែប្រសិនបើធ្វើមិនដឹងមិនឮ ហើយមិនដាក់បណ្ដឹងបរិហារចំពោះបទល្មើសកើតឡើង នោះមានន័យថា មន្ត្រីទាំងនោះត្រូវប្រឈមមុខច្បាប់។
លោកថា៖ «យើងដឹងថា មាត្រា ៥២៨ នៃក្រមព្រហ្មទណ្ឌប្រសិនបើអាជ្ញាធរដឹងហើយ ហើយមិនបានចាត់វិធានការជាបន្ទាន់ គឺត្រូវទទួលទោសដាក់ពន្ធនាគារពី ១ ឆ្នាំទៅ ៣ ឆ្នាំ និងពិន័យជាប្រាក់ពី ២ លានរៀលទៅ ៦ លានរៀល»៕
វីដេអូ៖