មណ្ឌលគិរីៈ ជនជាតិដើមភាគតិច ១៤ គ្រួសាររស់នៅឃុំដាក់ដាំ ស្រុកអូររាំង ខេត្តមណ្ឌលគិរីបានមកសុំកិច្ចអន្តរាគមន៍ពីអាជ្ញាធរមូលដ្ឋាន និងមន្ត្រីសិទ្ធិមនុស្សករណីមានឈ្មួញយកគ្រឿងចក្រឈូសឆាយផលដំណាំពួកគាត់លើផ្ទៃដីប្រមាណ ១០ ហិកតា ខណៈអាជ្ញាធរថាពេលនេះបានផ្អាកការឈូសឆាយបណ្ដោះអាសន្នហើយ។
លោក យ៉ាត តាយ តំណាងជនជាតិដើមភាគតិចព្នង (ពូនង) ទាំង ១៤ គ្រួសារ បានឲ្យដឹងនៅថ្ងៃទី ១៧ ខែធ្នូថាដីចម្ការរបស់ពួកគាត់ប្រមាណ ១០ ហិកតាដែលបានអាស្រ័យផលតាំងពីឆ្នាំ ១៩៨០ ជាងមកមានដាំដំណាំ ស្វាយ ខ្នុរ និង ផ្លែប៊័រ ម្នាស់ ជាដើម ត្រូវបានគេយកគ្រឿងចក្រឈូសឆាយអស់ទាំងស្រុង និងបានដុតខ្ទមយាមចម្ការអស់ ២ ផងដែរ។
លោកអះអាងថា៖ «មានមេការម្នាក់បានយកគ្រឿងចក្រមកឈូសឆាយតាំងពីថ្ងៃទី ១៥-១៦ ខែធ្នូនេះរហូតមកពេលនេះគេឈូសឆាយដំណាំរបស់ពួកខ្ញុំអស់ទាំងស្រុងហើយ។ ពួកខ្ញុំមិនអាចហាមឃាត់គេបានទេ គេមានគ្នា ៥ នាក់ទើបខ្ញុំដាក់លិខិតទៅមេឃុំ និងអង្គការ អាដហុក ដើម្បីសុំជួយដោះស្រាយ និងផ្អាកការឈូសឆាយសិន»។
លោក តាយ បានបន្ដថា៖ «ដីកសិកម្មរបស់ពលរដ្ឋ ១៤ គ្រួសារមានទំហំជិត ១០ ហិកតា។ ពួកយើងធ្វើចម្ការចិញ្ចឹមជីវិតលក្ខណៈគ្រួសាររៀងៗខ្លួនជាង ៣០ ឆ្នាំមកហើយ»។
ភ្នំពេញប៉ុស្ដិ៍មិនទាន់សុំការបកស្រាយពីមេការគ្រប់គ្រងគ្រឿងចក្រ ដើម្បីសុំការបំភ្លឺពីការឈូសឆាយដីពលរដ្ឋបាននៅឡើយទេនៅថ្ងៃទី ១៧ ខែធ្នូ។
ចំណែកមេឃុំដាក់ដាំលោក ចាន់ ណា បានឲ្យដឹងថា អាជ្ញាធរឃុំបានទទួលពាក្យបណ្ដឹងរឿងនេះហើយនឹងបានសរសេរលិខិតប្រាប់ឲ្យមេការគ្រប់គ្រងគ្រឿងចក្រផ្អាកសកម្មភាពឈូសឆាយជាបន្ទាន់រង់ចាំអាជ្ញាធរដោះស្រាយរួចរាល់សិន។
លោកបានបន្ដថា៖ «យើងបានបញ្ជាឲ្យផ្អាកដំណើរការឈូសឆាយបណ្ដោះអាសន្នសិន ដើម្បីស្វែងរកដំណោះស្រាយ ប៉ុន្ដែការឈូសឆាយនោះមិនមានប៉ះពាល់ដល់ផ្ទះប្រជាពលរដ្ឋទេ ប៉ះពាល់តែចម្ការដំឡូងចម្ការអីតិចតួចទេមើលទៅប្រហែលជាង ៤ ហិកតាអីហ្នឹង»។
លោក នង ស៊ុនណារី អភិបាលស្រុកអូររាំងថ្លែងថាការឈូសឆាយនោះមិនដល់ថ្នាក់ឈូសឆាយផ្ទះប្រជាពលរដ្ឋទេ មានប៉ះពាល់ដល់ចម្ការប្រជាពលរដ្ឋខ្លះដែរ។
លោកបន្ដថា៖ «រឿងនេះខ្ញុំបានចាត់ឲ្យខាងឃុំគេចុះទៅមើល ទិដ្ឋភាពជាក់ស្ដែងហើយពាក់ព័ន្ធដីចម្ការប្រជាពលរដ្ឋអីយ៉ាងម៉េចៗនោះ។ បើតាមខ្ញុំដឹងរឿងនេះគ្រាន់តែដីបងប្អូនគាត់ដដែលៗទេ គ្រាន់តែយើងត្រូវពិនិត្យមើលតាមលិខិតស្នាម អ្នកណាកាន់កាប់យ៉ាងម៉េចៗអី»។
លោក អ៊ាង ម៉េងលី មន្ត្រីសម្របសម្រួលសមាគមអាដហុក (Adhoc) ខេត្តមណ្ឌលគិរីចាត់ទុកការឈូសឆាយផលដំណាំរបស់ពលរដ្ឋគឺជាទង្វើល្មើសច្បាប់ដែលទាមទារឲ្យអាជ្ញាធរពាក់ព័ន្ធត្រូវដោះស្រាយរកយុត្តិធម៌ជូនពលរដ្ឋជាបន្ទាន់ និងជំរុញឲ្យមានការទទួលខុសត្រូវតាមផ្លូវច្បាប់។
លោកបន្តថា៖ «បើសិនជាភាគីខាងរំលោភយកដែលគាត់អះអាងថាមានកម្មសិទ្ធិលើដី អ៊ីចឹងវិវាទតាមផ្លូវច្បាប់ត្រូវតែដោះស្រាយតាមនីតិវិធីជូនពួកគាត់ព្រោះតាមច្បាប់របស់ប្រទេសកម្ពុជាយើង គឺបានផ្ដល់អាទិភាពទៅដល់បងប្អូនជនជាតិភាគតិច»៕