.jpg)
ជនសង្ស័យជនជាតិវៀតណាមត្រូវបានចាប់ខ្លួននៅថ្ងៃទី ២២ ខែកុម្ភៈឆ្នាំ ២០២០ ពាក់ព័ន្ធបទល្មើសសត្វព្រៃ។ រូបថត ក្រសួងបរិស្ថាន
មណ្ឌលគិរីៈ បុរសជនជាតិវៀតណាមម្នាក់ក្នុងចំណោមបក្ខពួក ៣ នាក់ទៀត ដែលបានរត់គេចខ្លួនត្រូវបានតុលាការចោទប្រកាន់ និងឃុំខ្លួនពាក់ព័ន្ធករណីបរបាញ់សត្វព្រៃនៅភូមិកោះម្យើលលើ ឃុំណងឃីលឹក ស្រុកកោះញែកក្នុងដែនជម្រកសត្វព្រៃស្រែពក ក្រោយពីមន្ត្រីឧទ្យានុរក្សឃាត់ខ្លួនក្នុងអំឡុងពេលពួកគេកំពុងធ្វើសកម្មភាពបរបាញ់ និងដាក់អន្ទាក់បានសត្វក្ងោក ១ ក្បាល។
លោក មាស ប្រុស អ្នកនាំពាក្យសាលាដំបូងខេត្តមណ្ឌលគិរីប្រាប់ពីម្សិលមិញថា ចៅក្រមស៊ើបសួរលោក ស៊ុន ពិសិដ្ឋ បានសម្រេចចោទប្រកាន់ និងឃុំខ្លួនជនសង្ស័យជាជនជាតិវៀតណាមឈ្មោះ ង្វៀង វ៉ាន់ស៊ី ភេទប្រុស អាយុ ៥០ ឆ្នាំរស់នៅឃុំហ្វាំងលីវ ស្រុកហ្វាំងហ្វា ខេត្តដាក់ឡាក់ ពាក់ព័ន្ធករណីបរបាញ់សត្វព្រៃនៅក្នុងដែនជម្រកសត្វព្រៃស្រែពក។ ការចោទនេះចូលក្នុងបទល្មើសធនធានធម្មជាតិថ្នាក់ទី ៣ នៃច្បាប់ស្តីពីតំបន់ការពារធម្មជាតិ។
លោកបញ្ជាក់ថា៖ «ចៅក្រមស៊ើបសួរគាត់បានសម្រេចឃុំខ្លួនបុរសម្នាក់ហ្នឹងហើយកាលពីរសៀលថ្ងៃទី ២៤ កុម្ភៈនេះតាមមាត្រា ៦១ និងមាត្រា ៥៦ តាមច្បាប់ស្ដីពីតំបន់ការពារធម្មជាតិ។ ចំពោះរឿងបើកសវនាការនៅពេលណាទៀត ខ្ញុំអត់ទាន់ដឹងទេ»។
លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរីថ្លែងពីម្សិលមិញថា ជនសង្ស័យត្រូវមន្ត្រីជំនាញនៃមន្ទីរបរិស្ថានបញ្ជូនទៅសាលដំបូងខេត្តមណ្ឌលគិរីកាលពីថ្ងៃទី ២៣ កុម្ភៈ បន្ទាប់ពីសមត្ថកិច្ចឃាត់ខ្លួនកាលពីថ្ងៃទី ២២ ខែកុម្ភៈនៅចំណុចពាមអូរឡាវ ក្នុងភូមិកោះម្យើលលើ ឃុំណងឃីលឹក ស្រុកកោះញែកក្នុងដែនជម្រកសត្វព្រៃស្រែពក។
លោកបន្តថា ជនជាតិវៀតណាម ង្វៀង វ៉ាន់ស៊ី គឺជាជនសង្ស័យម្នាក់ក្នុងចំណោមជនសង្ស័យជាបក្ខពួកចំនួន ៣ នាក់ផ្សេងទៀតដែលពួកគេបានរត់គេចខ្លួន។ សមត្ថកិច្ចបានរឹបអូសយកម៉ូតូ ២ គ្រឿង អន្ទាក់មួយចំនួន កាំភ្លើងកែច្នៃ ២ ដើម និងសត្វក្ងោក ១ ក្បាល (ងាប់)។
លោកបញ្ជាក់ថា៖ «ជនសង្ស័យទាំង ៤ នាក់នេះធ្លាប់ចូលមកបរបាញ់សត្វព្រៃ និងដាក់អន្ទាក់នៅក្នុងដែនជម្រកសត្វព្រៃស្រែពកជាច្រើនលើកមកហើយ ប៉ុន្ដែពួកគេតែងតែដឹងខ្លួនទាន់ពេល ហើយរត់គេចខ្លួនរហូត។ ឥឡូវនេះយើងចាប់បានបក្ខពួកម្នាក់ហើយគឺយើងនៅតែបន្តតាមចាប់អ្នកផ្សេងៗទៀតដែលពាក់ព័ន្ធបទល្មើសច្បាប់នេះ»។
លោក ប្រង់ ណុប ដែលជាប្រជាសហគមន៍រស់នៅក្បែរតំបន់ដែនជម្រកសត្វព្រៃស្រែពកថ្លែងថា ករណីបរបាញ់សត្វព្រៃ និងការដាក់អន្ទាក់សត្វព្រៃនៅក្នុងតំបន់ដែនជម្រកសត្វ ព្រៃស្រែពកនៅតែមានអ្នកលួចប្រព្រឹត្តបទល្មើសជាហូរហែរាល់ថ្ងៃ ប៉ុន្ដែសមត្ថកិច្ចបង្ក្រាបបានតិចតួចប៉ុណ្ណោះ។
លោកបន្ថែមថា រាល់ពេលដែលក្រុមសហគមន៍របស់លោកចុះល្បាតម្ដងៗ ពួកលោកបានប្រមូលយកអន្ទាក់ដែលជនល្មើសបានដាក់ពង្រាយនៅក្នុងព្រៃ ដើម្បីចាប់សត្វព្រៃ។ សត្វព្រៃនៅក្នុងតំបន់នោះភាគច្រើនសម្បូរសត្វប្រភេទដូចជាឈ្លូស ទន្សោង ក្ងោក មាន់ព្រៃ ទន្សាយ និងសត្វព្រៃច្រើនប្រភេទទៀត។
លោក ណុប បញ្ជាក់ថា៖ «រឿងសត្វព្រៃនេះគឺមានគេចូលដាក់អន្ទាក់ស្ទើររាល់យប់ ហើយឥឡូវនេះជនល្មើសមិនសូវដាក់ពេលថ្ងៃទេគឺដាក់តែពេលយប់ ព្រោះពេលយប់ស្ងាត់ ហើយងាយស្រួល គ្មានអ្នកមើលឃើញ។ ដូច្នេះពួកខ្ញុំស្នើឲ្យអាជ្ញាធរបង្កើនការទប់ស្កាត់បទល្មើសបរបាញ់សត្វព្រៃនេះ ព្រោះបើមិនទប់ស្កាត់ពេលនេះទេ គឺជិតផុតពូជសត្វព្រៃនៅស្រុកយើងហើយ»៕
