ស្ទឹងត្រែងៈ បុរសជនជាតិឡាវម្នាក់ត្រូវនគរបាលប្រឆាំងគ្រឿងញៀនខេត្តស្ទឹងត្រែង បញ្ជូនទៅសាលាដំបូងខេត្តនៅថ្ងៃទី ២ មេសា ក្រោយពីចាប់ខ្លួនបាន ១ ថ្ងៃជាមួយគ្រឿងញៀនមេតំហ្វេតាមីនជិត ៣ គីឡូក្រាមនៅភូមិ-ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង បន្ទាប់ពីបង្ក្រាបគ្រឿងញៀនក្នុងឆ្នាំ ២០២០ បានជាង ៣ តោននៅទូទាំងប្រទេស។
លោក អូត ស៊ីវុត្ថា ស្នងការនគរបាលខេត្តស្ទឹងត្រែងប្រាប់ ភ្នំពេញ ប៉ុស្តិ៍ ពីម្សិលមិញថា ជនសង្ស័យឈ្មោះ ផិត សាម៉នណយ ភេទប្រុស អាយុ ២៩ ឆ្នាំ ជាជនជាតិឡាវរស់នៅក្នុងភូមិហាតសាឃូន ស្រុកខូង ខេត្តចំប៉ាសាក់ ប្រទេសឡាវ។ ជនសង្ស័យត្រូវមន្ត្រីជំនាញរបស់លោកបញ្ជូនបន្តទៅសាលាដំបូងខេត្តស្ទឹងត្រែងនៅថ្ងៃទី ២ ខែមេសា ព្រោះកំណត់ហេតុបានបញ្ចប់អស់ហើយ បន្ទាប់ពីសាកសួរជនសង្ស័យដែលមានការចូលរួមពីព្រះរាជអាជ្ញាក្នុងការបើកមើលកញ្ចប់គ្រឿងញៀន។
លោកថ្លែងថា៖ «ជានីតិវិធី គឺកាលណាធ្វើកំណត់ហេតុចប់ យើងរៀបចំទាំងវត្ថុតាងទាំងមនុស្សទៅតុលាការដើម្បីចាត់ការតាមច្បាប់ទៀត។ ចំពោះវត្ថុតាងគ្រឿងញៀនវិញ នៅពេលដែលយើងដកហូតពីជនសង្ស័យបាន យើងក៏មិនអាចមានសិទ្ធិបើកកញ្ចប់គ្រឿងញៀន ទាល់តែព្រះរាជអាជ្ញា»។
បើតាមលោក ស៊ីវុត្ថា មុនមានការបង្ក្រាបបទល្មើសគ្រឿងញៀននេះគឺកម្លាំងសមត្ថកិច្ចរបស់លោកបានល្បាតនៅតាមគោលដៅ។ លុះនៅវេលាម៉ោងប្រហែលជា ១០ កន្លះព្រឹកថ្ងៃទី ៣១ មីនា ឆ្នាំ ២០២១ កម្លាំងសមត្ថកិច្ចបានប្រទះឃើញបុរសម្នាក់ឆ្លងដែនពីប្រទេសឡាវចូលមកចំណុចក្បែរស្ពានទី ២ ផ្លូវក្រវាត់ព្រំដែនកម្ពុជា-ឡាវ ស្ថិតក្នុងភូមិសាស្ត្រភូមិអូរស្វាយ ឃុំអូរស្វាយ ស្រុកបុរីអូរស្វាយសែនជ័យដោយមានអីវ៉ាន់ជាប់ខ្លួនផង។ ខណៈនោះកម្លាំងសមត្ថកិច្ចបានសុំការសម្របសម្រួលនីតិវិធីផ្លូវច្បាប់ពីលោក ជេត ខេមរា ព្រះរាជអាជ្ញាអមសាលាដំបូងខេត្តស្ទឹងត្រែងឈានទៅចាប់ជនសង្ស័យតែម្តង។
ខណៈកំពុងចាប់ខ្លួនសមត្ថកិច្ចបានឆែកឆេរ ឃើញវត្ថុរុំវេចខ្ចប់ប្លាស្ទិកចំនួន ៣ ដុំធំដែលនៅក្នុងនោះជាម្សៅគ្រឿងញៀនមានទម្ងន់ជិត ៣ គីឡូក្រាមជាប្រភេទមេតំហ្វេតាមីន។
ពាក់ព័ន្ធបញ្ហាគ្រឿងញៀននេះដែរពីម្សិលមិញ ភ្នំពេញ ប៉ុស្តិ៍ បានទូរស័ព្ទទៅលោក មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន ប៉ុន្តែមិនអាចទាក់ទងបាន។ ទោះយ៉ាងណាលោកធ្លាប់ប្រាប់ភ្នំពេញប៉ុស្តិ៍ថា ករណីគ្រឿងញៀនក្នុង ១ ឆ្នាំ ២០២០ សមត្ថកិច្ចបង្ក្រាបមនុស្សជាង ២ ម៉ឺននាក់។ ក្នុងនោះរួមមានទាំងជនបរទេសផងដែរ ត្រូវបានសមត្ថកិច្ចចាប់ឃាត់ខ្លួន និងគ្រឿងញៀនជាង ៣ តោន គឺមានការកើនឡើងលើសឆ្នាំ ២០១៩ ជាង ៦ ភាគរយ។
បើតាមលោក មាស វិរិទ្ធ ការកើនឡើងនូវការបង្ក្រាបបានគ្រឿងញៀននេះ ដោយសារតែមានការខិតខំប្រឹងប្រែងរបស់សមត្ថកិច្ចក្នុងការស្រាវជ្រាវបង្ក្រាបដល់ឫសគល់ពួកឧក្រិដ្ឋជនធំៗ។ តែទោះជាយ៉ាងណា សមត្ថកិច្ចក៏នៅតែបង្ក្រាបមិនអស់ និងបានតែមួយចំនួនក្នុងចំណោមក្រុមឧក្រិដ្ឋជនជាច្រើនទៀត។
លោកបន្តថា ដោយឡែកនៅកម្ពុជាគ្រឿងញៀនដែលសមត្ថកិច្ចចាប់បានគឺភាគច្រើនសុទ្ធតែគ្រឿងញៀនសំយោគដែលផលិតចេញពីសារធាតុគីមីផ្សំ។ លោកថា ក្រុមឧក្រិដ្ឋជនមិនចំណាយពេលយូរទេក្នុងការផលិតហើយក៏មិនចាំបាច់ជ្រើសរើសទីកន្លែងផលិតដែរ។ កន្លែងណាដែលអំណោយផលដល់សកម្មភាពលួចលាក់ផលិតគ្រឿងញៀនបាន គឺពួកឧក្រិដ្ឋជនរៀបចំផលិតហើយ។
លោកថ្លែងថា៖ «ឥឡូវពួកគេផលិត (មើលការណែនាំ) តាមអនឡាញដោយគ្រាន់តែគេណែនាំតាមវីដេអូតាមប្រព័ន្ធអ៊ីនធឺណិតឱ្យដាក់សារធាតុផ្សំស្អីៗទៅក៏អាចធ្វើបានហើយ ព្រោះឥឡូវនេះមានបច្ចេកវិទ្យាទំនើប។ រីឯការវិវឌ្ឍរបស់ក្រុមឧក្រិដ្ឋជន ក៏វាមានការប្រើប្រាស់បច្ចេកវិទ្យាទំនើបដែរ»៕