.jpg)
ជនជាតិឡាវដែលត្រូវបានចាប់ខ្លួនថ្ងៃទី ៦ កក្កដាពីបទជួញដូរគ្រឿងញៀន នៅខេត្តស្ទឹងត្រែង។ រូប ប៉ូលិស
ស្ទឹងត្រែងៈ បុរសជនជាតិឡាវម្នាក់ត្រូវបានតុលាការបង្គាប់ឲ្យសមត្ថកិច្ចបញ្ជូនទៅឃុំខ្លួននៅពន្ធនាគារខេត្តស្ទឹងត្រែងកាលពីម្សិលមិញ ក្រោយពីបានបញ្ចប់ការសាកសួរចម្លើយពាក់ព័ន្ធនឹងការជួញដូរគ្រឿងញៀនជាង ៧ គីឡូក្រាម ដែលត្រូវបានចាប់ខ្លួនកាលពីថ្ងៃទី ៦ កក្កដានៅចំណុចកំពង់ចម្លងមួយស្ថិតក្នុងភូមិអន្លង់ស្វាយ ឃុំព្រះរំកិល ស្រុក បុរីអូរស្វាយសែនជ័យ ខេត្តស្ទឹងត្រែង។
លោក ឈុំ ស៊ាងហាក់ អនុប្រធានលេខាធិការដ្ឋានរដ្ឋបាលសាលាដំបូងខេត្តស្ទឹងត្រែងប្រាប់ភ្នំពេញប៉ុស្តិ៍ពីថ្ងៃពុធថាជនជាប់ចោទត្រូវបានលោក អ៊ួង វុទ្ធា ចៅក្រមស៊ើបសួរសាលាដំបូងខេត្តស្ទឹងត្រែងបង្គាប់ឲ្យនគរបាលយុត្តិធម៌នាំយកទៅឃុំខ្លួនជាបណ្ដោះអាសន្ននៅពន្ធនាគារខេត្តស្ទឹងត្រែង ដើម្បីរង់ចាំការជំនុំជម្រះនៅពេលក្រោយ។
លោកថ្លែងថា៖ «ក្រោយបញ្ចប់ការស៊ើបសួរ ជនត្រូវចោទត្រូវបានតុលាការ បង្គាប់ឲ្យនាំទៅឃុំខ្លួនជាបណ្ដោះអាសន្ននៅពន្ធនាគារខេត្ត ដោយចោទប្រកាន់ពីបទជួញដូរសារធាតុញៀនតាមមាត្រា ៤០ នៃច្បាប់គ្រឿងញៀន»។
បើតាមមន្ត្រីនគរបាលដែលបានដឹកនាំកម្លាំងចុះប្រតិបត្តិការបង្ក្រាបបានឲ្យដឹងថា សារធាតុញៀនដែលរកឃើញ និងរឹបអូសពីបុរសជនជាតិឡាវនោះជាប្រភេទអៃស៍មេតំហ្វេតាមីន។ លោក យិន បញ្ញារិទ្ធ នាយករងមន្ទីរប្រឆាំងគ្រឿងញៀននៃក្រសួងមហាផ្ទៃដែលដឹកនាំកម្លាំងការិយាល័យប្រឆាំងគ្រឿងញៀន (ក៩) ចុះប្រតិបត្តិការស្រាវជ្រាវ និងបង្ក្រាបបទល្មើសគ្រឿងញៀនក្នុងតំបន់ខាងលើបានប្រាប់ភ្នំពេញប៉ុស្តិ៍កាលពីថ្ងៃទី ៧ ខែកក្កដា ថា បុរសជនជាតិឡាវដែលត្រូវបានចាប់ខ្លួនក្នុងបទល្មើសនេះ ឈ្មោះ ភិត ងិន [Phit Ngin] អាយុ ៣៣ ឆ្នាំមានលំនៅក្នុងស្រុក Khong Champasak ប្រទេសឡាវ។
លោកថា៖ «ជនសង្ស័យបានលួចឆ្លងដែនចូលមកក្នុងប្រទេសកម្ពុជាយើងតាមទូកដោយបន្លំខ្លួនជាអ្នកនេសាទ ប៉ុន្តែក្រោយមានការសង្ស័យ សមត្ថកិច្ចយើងបានធ្វើការឃាត់ខ្លួន និងឆែកឆេររកឃើញគ្រឿងញៀនសរុបជាង ៧ គីឡូក្រាម»។
មន្ត្រីនគរបាលរូបនេះបន្ថែមថា៖ «ជនសង្ស័យខាងលើនេះគឺជាក្រុមថ្មីមួយទៀតដែលទំនងជាក្រុមឧក្រិដ្ឋជនគ្រឿងញៀនក្នុងប្រទេសឡាវ ទើបបង្កើតឡើង»។
ជុំវិញករណីនេះលោក ចែម ផានិត ប្រធានការិយាល័យបង្ក្រាបគ្រឿងញៀនខេត្តស្ទឹងត្រែងបានប្រាប់ភ្នំពេញប៉ុស្តិ៍ថា ក្រោយពីបញ្ចប់ការសាកសួរនៅរសៀលថ្ងៃអង្គារ ក្រុមមន្ត្រីជំនាញបានកសាងសំណុំរឿងបញ្ជូនជនសង្ស័យ ទៅកាន់តុលាការខេត្តស្ទឹងត្រែងដើម្បីមានចំណាត់ការបន្តតាមនីតិវិធី។
លោក ផានិត បានថ្លែងថា៖ «មន្ត្រីជំនាញយើងបានបញ្ជូនជនសង្ស័យទៅតុលាការហើយ ប៉ុន្តែតុលាការសម្រេចចោទប្រកាន់បែបណានោះ ខ្ញុំមិនទាន់ដឹងទេ ព្រោះវាកំពុងស្ថិតក្រោមនីតិវិធីរបស់តុលាការនៅឡើយ»។
លោក គឹម ហុងសាន អ្នកនាំពាក្យអយ្យការអមសាលាដំបូងខេត្តស្ទឹងត្រែង ប្រាប់ភ្នំពេញប៉ុស្តិ៍នៅថ្ងៃអង្គារថា ជនសង្ស័យត្រូវបានលោក ស៊ីន រក្សា ព្រះរាជអាជ្ញារងអមសាលាដំបូងខេត្តស្ទឹងត្រែងចោទប្រកាន់ពីបទជួញដូរគ្រឿងញៀនតាមមាត្រា ៤០ នៃច្បាប់គ្រឿងញៀន។
លោកបញ្ជាក់ថា៖ «ខាងតំណាងអយ្យការយើងបានសម្រេចចោទប្រកាន់ជនសង្ស័យពីបទជួញដូរគ្រឿងញៀនតាមមាត្រា ៤០ នៃច្បាប់គ្រឿងញៀន និងបានបញ្ជូនទៅកាន់ចៅក្រមស៊ើបសួរ ដើម្បីចាត់ការបន្តតាមនីតិវិធី»៕
