.jpg)
កប៉ាល់ទេសចរណ៍ Viking Cruise Journey។ រូបថត សហការី
កំពង់ចាមៈ ប្តី-ប្រពន្ធជនជាតិអាមេរិកាំង ២ នាក់ដែលធ្លាប់រិះគន់វិធានការដាក់ឲ្យនៅដាច់ដោយឡែកនៅសណ្ឋាគារមេគង្គ ខេត្តកំពង់ចាមគឺជាអ្នកដែលមានផ្ទុកកូវីដ ១៩ ថ្មី ដែលត្រូវបានរកឃើញកាលពីថ្ងៃ ២៤ ខែមីនា។
លោកនាយករដ្ឋមន្ត្រី ហ៊ុន សែន បញ្ជាក់កាលពីព្រឹកម្សិលមិញថា ជនជាតិអាមេរិកាំង ១ គូតាមកប៉ាល់ Viking Cruise Journey ដែលធ្លាប់រិះគន់ការដាក់ឲ្យនៅដាច់ដោយឡែកនៅខេត្តកំពង់ចាម គឺជាអ្នកដែលរកឃើញវិជ្ជមានកូវីដ១៩ ក្នុងចំណោមអ្នកផ្ទុក ៤ នាក់ថ្មី។
លោកនាយករដ្ឋមន្ត្រីថ្លែងយ៉ាងដូច្នេះថា៖ «ឥឡូវនាវានេះ ក្រៅពី ៣ នាក់ដែលបានឆ្លង ហើយម្នាក់បានជា ហើយជនជាតិអង់គ្លេសបានជាហើយនៅសល់អង់គ្លេស ២ នាក់ទៀតនៅពេទ្យរុស្ស៊ី ហើយនឹង ៤ នាក់ទើបតែឆ្លងថ្មី។ ៤ នាក់ឆ្លងថ្មីទៀត ២ គូ ប្ដីប្រពន្ធ»។
លោកបន្តថា៖ «ជនជាតិអាមេរិក ២ នាក់ជនជាតិអាមេរិកនោះហើយដែលនិយាយថា ជីងចក់ ដែលថាយើងយកទៅដាក់នៅកន្លែងជីងចក់នោះ ព្រោះអាងគាត់អ្នកមាន គាត់ចង់នៅអាសណ្ឋាគារផ្កាយ៥ គាត់ចង់មកសម្រាកនៅសណ្ឋាគារផ្កាយ៥។ ប៉ុន្តែប្រសិនបើយើងទៅតាមគាត់ ប្រហែលជាសណ្ឋាគារផ្កាយ ៥ ហ្នឹងរលាយហើយ។ ឥឡូវនេះជនជាតិអង់គ្លេស ២ នាក់ប្ដីប្រពន្ធ និងអាមេរិក ២ នាក់ប្ដីប្រពន្ធ ៤ នាក់ផ្សេងទៀត។ អាហ្នឹងជាការធ្លុះធ្លាយទី ២»។
កាលពីថ្ងៃចន្ទសប្ដាហ៍មុន គូស្រករជនជាតិអាមេរិក ២ នាក់បានរិះគន់ការដាក់ឲ្យនៅដាច់ដោយឡែកដោយចាត់ទុកវិធានការដែលឲ្យពួកគេស្នាក់នៅដាច់ដោយឡែក ១៤ ថ្ងៃនៅខេត្តកំពង់ចាមនោះថាជា «ការឃុំឃាំង»។ ពួកគេរិះគន់ថា នៅក្នុងសណ្ឋាគារនោះមានជីងចក់ ហើយបន្ទប់ទឹកលិចមានការធ្លាយទឹក។ នេះបើតាមការស្រង់សម្ដីដោយកាសែត The USA Today។
លោក អ៊ុន ចាន់ដា អភិបាលខេត្តកំពង់ចាមថ្លែងថា អ្នកផ្ទុកថ្មីចំនួន ៤ នាក់នោះកំពុងទទួលការព្យាបាលនៅមន្ទីរពេទ្យខេត្ត ប៉ុន្តែលោកសុំមិនបញ្ចេញអត្តសញ្ញាណ។
លោក គឹម សួរភិរុណ ប្រធានមន្ទីរសុខាភិបាលខេត្តកំពង់ចាមក៏បដិសេធបង្ហាញអត្តសញ្ញាណដែរដោយថ្លែងថា អ្នកដែលបានបញ្ចប់ការដាក់ឲ្យនៅដាច់ដោយឡែក ១៤ ថ្ងៃចំនួន ៥៣ នាក់ផ្សេងទៀតបានចាកចេញពីសណ្ឋាគារមេគង្គកាលពីថ្ងៃអង្គារដោយវិលត្រឡប់ចូលកប៉ាល់ Viking Cruise Journey វិញ៕
