ភ្នំពេញៈ ជនជាតិ នីហ្សេរីយ៉ា ១៧ នាក់ ក្នុងចំណោម ៤៥ នាក់ ដែលប៉ូលិសអន្តោប្រវេសន៍ក្រសួងមហាផ្ទៃ បានឃាត់ខ្លួនកាលពីថ្ងៃ សៅរ៍ នឹងត្រូវបណ្តេញចេញពីកម្ពុជា ក្រោយរកឃើញថា បានស្នាក់នៅខុសច្បាប់ ចំណែកអ្នកសេសសល់ នឹងត្រូវផាកពិន័យ ហើយដោះលែងវិញ។
ជនជាតិនីហ្សេរីយ៉ា សរុប ៤៥ នាក់ ត្រូវបានសមត្ថកិច្ចចុះឡោមព័ទ្ធចាប់កាលពីថ្ងៃទី ៣១ ខែ តុលា ឆ្នាំ ២០១៥ ក្នុងទីជំនុំសាសនាមួយកន្លែង ក្នុងភូមិត្រពាំងថ្លឹង សង្កាត់ចោមចៅ ខណ្ឌ ពោធិ៍សែនជ័យ រាជធានីភ្នំពេញ។ នេះបើតាមប្រធាននាយកដ្ឋានស៊ើបអង្កេតនិងអនុវត្តនីតិវិធីនៃអគ្គនាយកដ្ឋានអន្តោប្រវេសន៍ លោក អ៊ុក ហៃសីឡា។
លោក អ៊ុក ហៃសីឡា បានឲ្យដឹងថា ជនជាតិ នីហ្សេរីយ៉ា ទាំង ៤៥ នាក់ គឺស្ថិតក្នុងចំណោម ៦០ នាក់ ដែលមន្ត្រីទទួលបន្ទុករៀបចំទិដ្ឋាការរបស់ជនជាតិ នីហ្សេរីយ៉ា បានស្នើសុំឲ្យសមត្ថកិច្ចនៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ ស្វែងរកឃាត់ខ្លួន បន្ទាប់ពីរកឃើញថា ពួកគេបានប្រើប្រាស់លិខិតឆ្លងដែន ទិដ្ឋាការក្លែងក្លាយ និងខ្លះមានលិខិតឆ្លងដែនគ្មានត្រាចេញចូលច្បាស់លាស់។
លោកថា៖«យើងបានស៊ើបយូរហើយ ទើបឃាត់បាន ៤៥ នាក់នេះ ហើយក្រោយបញ្ចប់ការពិនិត្យឯកសារនិងសួរនាំរួចឃើញថា មាន ២០ នាក់មានលិខិតឆ្លងដែននិងឯកសារត្រឹមត្រូវ ដែលនឹងត្រូវដោះលែងវិញនៅថ្ងៃចន្ទនេះ ចំណែក ៨ នាក់នឹងត្រូវផាកពិន័យដោយសារហួសទិដ្ឋាការនិងគ្មានត្រាចូល ចំណែក ១៧ នាក់ទៀតគឺត្រូវរៀបចំឯកសារបណ្តេញចេញ»។
បើតាមលោក អ៊ុក ហៃសីឡា ជនជាតិ នីហ្សេរីយ៉ា ដែលបានមកស្នាក់នៅកម្ពុជា ភាគច្រើន មានមុខរបរជាគ្រូបង្រៀនផ្នែកសាសនានិងភាសា ហើយបើគិតត្រឹមរយៈពេល ១០ ខែ ដើមឆ្នាំ ២០១៥ នេះ គឺមានជនជាតិនីហ្សេរីយ៉ាសរុបជាង ៦០ នាក់ដែលត្រូវសមត្ថកិច្ចឃាត់ខ្លួនបាន ក្នុងពេលចុះធ្វើជំរឿនអន្តោប្រវេសន៍ខុសច្បាប់។
លោក អ៊ុក ហៃសីឡា បានឲ្យដឹងទៀតថា បើគិតត្រឹម ១០ ខែ ឆ្នាំ ២០១៥ នេះ ជនអន្តោប្រវេសន៍ខុសច្បាប់ ដែលសមត្ថកិច្ច ចាប់បានមានទាំងអស់ ៤៦ សញ្ជាតិ សរុប ៣ ៩៦១ នាក់ត្រូវបានបណ្តេញចេញពីប្រទេសកម្ពុជាហើយ ចំណែក ២៣៣ នាក់ កំពុងរៀបចំឯកសារដើម្បីបណ្តេញចេញ ហើយក្នុងនោះមាន ៩០ ភាគរយ គឺជាជនជាតិវៀតណាម៕
