ភ្នំពេញៈ ជនជាប់ចោទជនជាតិនីហ្សេរីយ៉ា ៥ នាក់ ក្នុងចំណោម ៧ នាក់ កាលពីម្សិលមិញ បានស្នើសុំតុលាការកំពូល ឲ្យដោះលែងពួកគេវិញ ដោយលើកហេតុផលថា សមត្ថកិច្ចចាប់ខ្លួនពួកគេគ្មានវត្ថុតាងគ្រឿងញៀនជាក់ស្តែង ហើយសូម្បីតែក្នុងកំណត់ហេតុរបស់តុលាការ ក៏មិនឃើញបញ្ជាក់ពីចំនួនគ្រឿងញៀនដែរ ប៉ុន្តែត្រូវតុលាការផ្តន្ទាទោសម្នាក់ ១០ ឆ្នាំទៅវិញ។
តាមកំណត់ហេតុរបស់តុលាការបង្ហាញថា ជនជាប់ចោទទាំងនោះ មានឈ្មោះ ១- IME JHONUDOM ភេទ ប្រុស អាយុ ៥២ ឆ្នាំ, ២- ECHOWDO (SAMSON) អាយុ ៣២ ឆ្នាំ, ៣- FAVOUR IBEZIMAKO OBERTA អាយុ ៣២ ឆ្នាំ, ៤- ORAGWAN (DOMWIN) អាយុ ៣២ ឆ្នាំ, ៥- OKECHUKWU IKEFUAKU អាយុ ២៨ ឆ្នាំ, ៦- EZIGBOGABRIEL CHUKWUEOKA អាយុ ៤២ ឆ្នាំ (អវត្តមាន) និង៧- MIGAEL NWANKWO អាយុ ៣២ ឆ្នាំ។
បើតាមកំណត់ហេតុ កាលពីថ្ងៃទី ២៦ ខែ តុលា ឆ្នាំ ២០១៤ ឈ្មោះ IME JHONUDOM បានយួរស្បោងខ្មៅ ១ យកទៅប្រគល់ឲ្យបុរសម្នាក់ នៅផ្សារសូរិយាម៉ល ក្នុងសង្កាត់ផ្សារថ្មី ៣ ខណ្ឌដូនពេញ ហើយត្រូវបានសមត្ថកិច្ចចាប់ខ្លួន (ក្នុងកំណត់ហេតុមិនបានបញ្ជាក់ពីចំនួនគ្រឿងញៀននិងប្រភេទអ្វីទេ)។ បន្ទាប់មក សមត្ថកិច្ចបានឲ្យឈ្មោះ IME JHONUDOM នាំទៅបុរីពិភពថ្មីនៅក្នុងសង្កាត់ចោមចៅ ខណ្ឌពោធិ៍សែនជ័យ ហើយចាប់ខ្លួនបុរសជនជាតិនីហ្សេរីយ៉ាបាន ៦ នាក់ទៀត។ ក្នុងនោះចាប់បាន ៤ នាក់ នៅក្នុងហាងអាហាររបស់ឈ្មោះ EC-HOWDO (SAMSON) និង ២ នាក់ទៀត សមត្ថកិច្ចចាប់នៅតាមផ្លូវក្នុងសង្កាត់ចោមចៅដែរ។
សំណុំរឿងនេះ ត្រូវសាលាដំបូងរាជធានីភ្នំពេញ ប្រកាសសាលក្រមនៅថ្ងៃទី ១៨ ខែ កញ្ញា ឆ្នាំ ២០១៥ ដោយផ្តន្ទាទោស ម្នាក់ៗ ដាក់ពន្ធនាគារ ១០ ឆ្នាំ ចោទពីបទជួញដូរគ្រឿងញៀនខុសច្បាប់ តាមបញ្ញត្តមាត្រា ៤០ នៃច្បាប់ស្តីពីការត្រួតពិនិត្យគ្រឿងញៀន និងពិន័យប្រាក់ម្នាក់ៗ ២០ លានរៀល។ ប៉ុន្តែ ដោយមិនសុខចិត្តនឹងសាលក្រម នេះ ជនជាប់ចោទទាំង ៧ នាក់ បានប្តឹងទាស់ទៅសាលាឧទ្ធរណ៍ តែត្រូវសាលាឧទ្ធរណ៍ ប្រកាសសាលដីកា កាលពីថ្ងៃទី ១៣ ខែ សីហា ឆ្នាំ ២០១៦ សម្រេច តម្កល់សាលក្រម របស់សាលាដំបូងទុកជាបានការដដែល។
នៅក្នុងបន្ទប់សវនាការពីម្សិលមិញ ជនជាប់ចោទ ឈ្មោះ IME JHONUDOM បានឆ្លើយប្រាប់ចៅក្រមថា គាត់បានចូលមកប្រទេស កម្ពុជា ក្នុងឆ្នាំ ២០០៩ ដើម្បីធ្វើជំនួញ ប៉ុន្តែរបររកស៊ីរបស់គាត មិនសូវដំណើរការល្អទេ ហើយគាប់ជួនថ្ងៃ ១ មិត្តភ័ក្ដិរបស់គាត់ បានពឹងគាត់ឲ្យកាន់ស្បោង ១ ដោយប្រាប់លោកថា យកស្បោងនោះឲ្យបុរសម្នាក់ ដែលគេកំពុងរង់ចាំទទួលនៅផ្សារសូរីយាម៉ល។
ជនជាប់ចោទថា ៖ «ពេលនោះ ខ្ញុំប្រកែកដែរ ប៉ុន្តែដោយជំនួញរបស់ខ្ញុំរកលុយមិនបាន ខ្ញុំក៏សម្រេចចិត្តយកស្បោងនោះ ទៅឲ្យគេព្រោះមិត្តខ្ញុំឲ្យសេវា ២០០ ដុល្លារ។ ប៉ុន្តែ ពេលខ្ញុំទៅដល់ កន្លែងណាត់ ក៏ត្រូវប៉ូលិសចាប់។ ខ្ញុំសូមឲ្យតុលាការបន្ថយទោសដល់ខ្ញុំផង»។
ចំណែក FAVOUR IBEZIMAKO OBERTA, ឈ្មោះ ORAGWAN (DOMWIN), OKECHUKWU IKEFUAKU បាននិយាយដូចគ្នាថា ពួកគេមិនបានស្គាល់គ្នាពីមុនមកទេ ប៉ុន្តែដោយមានហាងអាហារ ១ ដែលម្ចាស់ហាងឈ្មោះ ECHOWDO (SAMSON) ជាជនជាតិនីហ្សេរីយ៉ា ដូចគ្នានោះ ពួកគេតែងមកទិញអាហារនៅទីនោះ។ នៅល្ងាចមុនសមត្ថកិច្ចចាប់ ពួកគេកំពុងអង្គុយហូបអាហារក្នុងហាងនោះរៀងៗខ្លួន ហើយក៏មានសមត្ថកិច្ចនគរបាល ចូលចាប់តែម្តង។
ជនជាប់ចោទ FAVOUR IB-EZIMAKO OBERTA ប្រាប់ចៅក្រមថា ខ្លួនមិនបានជាប់ពាក់ព័ន្ធដូចការចោទប្រកាន់របស់សមត្ថកិច្ចទេ ព្រោះពេលនោះខ្លួនទៅទិញអាហារហូបតែប៉ុណ្ណោះ។
រីឯឈ្មោះ ORAGWAN (DOMWIN) និយាយថា ពេលសមត្ថកិច្ចចាប់ខ្លួនគឺគាត់កំពុងជិះម៉ូតូក្នុងបុរីពិភពថ្មី (ចោមចៅ) ហើយសមត្ថកិច្ចបានហៅឲ្យឈប់ម៉ូតូ និងចាប់ខ្លួនតែម្តង ឯមិត្តស្រីរបស់ខ្លួនជានារីខ្មែរត្រូវដោះលែងវិញ។
រីឯឈ្មោះ OKECHUKWU IKEFUAKU, EZIGBOGABRIEL CHUKWUEOKA ពួកគេសុទ្ធតែមិនបានស្គាល់គ្នាពីមុនមកទេ ប៉ុន្តែបានទៅទិញអាហារក្នុងហាងនោះ ហើយក៏មិនបានធ្វើសកម្មភាពជួញដូរគ្រឿងញៀនអីដែរ សមត្ថកិច្ចចាប់ពួកគេគ្មានភ័ស្តុតាងជាប់ខ្លួនទេ។ ជនទាំងនេះបានសុំឲ្យតុលាការរកយុត្តិធម៌ឲ្យពួកគេ។
លោក វ៉េង ប៊ុនធឿន តំណាងមហាអយ្យការសន្និដ្ឋានថា ក្នុងសំណុំរឿងនេះមានជនជាប់ចោទ ៥ នាក់ បានបដិសេធ ហើយមានម្នាក់ទទួលស្គាល់កំហុស។ ប៉ុន្តែបើផ្អែកតាមអង្គហេតុគឺមុនមានការចាប់ខ្លួនពួកគេ សមត្ថកិច្ចបានស្រាវជ្រាវច្បាស់ហើយ ទើបចាប់ពួកគេ។
លោកថា៖ «ផ្អែកតាមភ័ស្តុតាងនិងចម្លើយសារភាពរបស់បក្ខពួកគេម្នាក់ ខ្ញុំសូមតម្កល់សាលដីកា របស់សាលាឧទ្ធរណ៍ទុកជាបានការដដែល»។
លោក ស៊ិន វ៉ាន់នី មេធាវីការពារសិទ្ធិឲ្យជនជាប់ចោទទាំង ៦ នាក់ បានសន្និដ្ឋានថា កូនក្តីរបស់លោក មានម្នាក់សារភាព ប៉ុន្តែ ៥ នាក់ទៀតបដិសេធ ហើយម្យ៉ាងសមត្ថកិច្ចចាប់ខ្លួនពួកគេគ្មានវត្ថុតាងជាក់ស្តែងទេ «ខ្ញុំសូមតុលាការដោះលែងកូនក្តីខ្ញុំ ៥ នាក់ និងម្នាក់ទៀតសុំបន្ថយទោសដល់គាត់ផង»។
ក្រោយជំនុំជម្រះ លោក ស៊ឹង បញ្ញាវុឌ្ឍ ប្រធានក្រុមប្រឹក្សាជំនុំជម្រះ ថ្លែងថា សាលដីកានេះ នឹងប្រកាសនៅថ្ងៃទី ១០ ខែ កក្កដា ខាងមុខ៕