ភ្នំពេញៈ បុរសជាប់ចោទពីបទសម្លាប់មិត្តភក្តិម្នាក់ក្នុងចំណោម ២ នាក់ ដែលត្រូវបានសាលាដំបូងខេត្តបាត់ដំបងផ្តន្ទាទោសឲ្យជាប់ពន្ធនាគារអស់មួយជីវិតកាលពីម្សិលមិញបានសារភាពពីទោសកំហុសរបស់ខ្លួននៅមុខចៅក្រមសាលាឧទ្ធរណ៍ និងបានស្នើសុំចៅក្រមឲ្យបន្ថយទោស។
ជនជាប់ចោទឈ្មោះ សន ពៅ អាយុ ២៩ ឆ្នាំ បានរៀបរាប់ប្រាប់ចៅក្រមក្នុងសវនាការពីម្សិលមិញថា រូបគេជាអ្នកប្រើប្រាស់គ្រឿងញៀនហើយកាលពីថ្ងៃទី ១១ ខែ មេសា ឆ្នាំ ២០១៤ មុនពេលកើតហេតុ គាត់ និងគូកនម្នាក់ទៀត ឈ្មោះ សុខ ចាន់ អាយុ ២៨ ឆ្នាំ បានជួបជុំគ្នាផឹកស្រានៅភូមិស្វាយ ឃុំបឹងរាំង ស្រុកកំរៀងកាលពីឆ្នាំ ២០១៤។ ខណៈកំពុងផឹកឈ្មោះ សុខ ចាន់ បាននិយាយប្រាប់គាត់ថា ឲ្យទូរស័ព្ទហៅជនរងគ្រោះឈ្មោះ លី សុវណ្ណារិទ្ធិ ដែលជាកូនថៅកែចងការប្រាក់ឲ្យមកជួបពួកគេ ដើម្បីទៅទិញថ្នាំញៀនយកមកជក់ជាមួយគ្នា។
បន្ទាប់ពីពិភាក្សាគ្នាហើយឈ្មោះ សុខ ចាន់ បានទូរស័ព្ទហៅជនរងគ្រោះមកជួប។ បន្ទាប់ពីជនរងគ្រោះមកតាមការណាត់ហើយនោះ ខ្លួននិង សុខ ចាន់ បានឲ្យជនរងគ្រោះឌុបពួកគេធ្វើជាទៅរកទិញថ្នាំញៀន ហើយពេលបើកម៉ូតូទៅដល់កន្លែងស្ងាត់ជិតផ្លូវលំមួយ និងក្បែរស្រះទឹកស្រាប់តែឈ្មោះ សុខចាន់ យកដុំថ្មដែលត្រៀមទុកវាយត្រង់កញ្ចឹងករបស់ជនរងគ្រោះ។ ប៉ុន្តែដោយជនរងគ្រោះនៅមានស្មារតីក៏ឈប់ម៉ូតូបម្រុងតដៃតែត្រូវខ្លួនស្ទុះទៅចាប់ដៃទាំង ២ របស់ជនរងគ្រោះទៅក្រោយហើយបណ្តោយឲ្យឈ្មោះ សុខ ចាន់ វាយរហូតស្លាប់។
ជនជាប់ចោទបន្តថា៖ «ពួកខ្ញុំសម្លាប់គេគ្រាន់តែចង់បានទ្រព្យសម្បត្តិប៉ុណ្ណោះហើយពួកខ្ញុំមានគម្រោងសម្លាប់ជនរងគ្រោះរួចហើយ»។
ជនជាប់ចោទបន្តថា បន្ទាប់ពីពួកគេសម្លាប់ជនរងគ្រោះហើយបានយកលុយមួយចំនួនខ្សែក ១ ខ្សែ និងចិញ្ចៀនមាស ១ វង់ រួចអូសជនរងគ្រោះទៅទម្លាក់ក្នុងស្រះទឹក ដើម្បីបង្វែងដានសមត្ថកិច្ចហើយណាមួយពួកគេ សម្លាប់ជនរងគ្រោះដើម្បីបំបិទមាត់ផង ព្រោះបើទុកឲ្យជនរងគ្រោះមានជីវិតគឺប្រាកដជាជនរងគ្រោះនឹងប្តឹងសមត្ថកិច្ចឲ្យចាប់ពួកគេជាមិនខាន។ ក្រោយពេលប្រជាពលរដ្ឋប្រទះឃើញសាកសពនៅក្នុងស្រះទឹកមក ក៏បានរាយការណ៍ទៅនគរបាលប៉ុស្តិ៍ឃុំបឹងរាំងដែលដំបូងឡើយសមត្ថកិច្ចយល់ថា ជនរងគ្រោះលង់ទឹកស្លាប់ តែក្រោយពីធ្វើកោសល្យវិច័យឃើញថា ជាការវាយសម្លាប់ហើយបានប៉ុន្មានថ្ងៃក្រោយមកសមត្ថកិច្ចស្រាវជ្រាវចាប់ខ្លួន រូបគេបាន ឯឈ្មោះ សុខ ចាន់ គេចខ្លួនបាត់។
សំណុំរឿងនេះត្រូវបានសាលាដំបូងខេត្តបាត់ដំបងបានប្រកាសសាលក្រមនៅថ្ងៃទី ២៩ ខែមិថុនាឆ្នាំ ២០១៦ សម្រេចផ្តន្ទាទោសក្នុងម្នាក់ៗឲ្យជាប់ពន្ធនាគារ ១ ជីវិត ក្រោមការចោទប្រកាន់ពីបទឃាតកម្មគិតទុកជាមុនតាមមាត្រា ២០០ នៃក្រមព្រហ្មទណ្ឌ និងបង្គាប់ឲ្យសមត្ថកិច្ចស្វែងរកចាប់ខ្លួនឈ្មោះ សុខ ចាន់ យកមកដាក់ពន្ធនាគារ។
សន ពៅ ប្រាប់ចៅក្រមទៀតថា៖ «ខ្ញុំប្តឹងមកសាលាឧទ្ធរណ៍នេះព្រោះខ្ញុំមិនសុខចិត្តដោយសារតុលាការខេត្តដាក់ទោសខ្ញុំ ១ ជីវិត។ ខ្ញុំសូមតុលាការបន្ថយទោសដល់ខ្ញុំផង»។
លោក ប៉ែន សារ៉ាត តំណាងមហាអយ្យការសន្និដ្ឋានថា ជនជាប់ចោទបានសារភាពទទួលស្គាល់កំហុសហើយហើយតាមអង្គហេតុ ដែលជាកំណត់ហេតុសមត្ថកិច្ចគឺស៊ីចង្វាក់គ្នានឹងចម្លើយសារភាពរបស់ជនជាប់ចោទ។ ប៉ុន្តែជនជាប់ចោទស្នើសុំបន្ថយទោសដូច្នេះសូមក្រុមប្រឹក្សាពិចារណា។
លោកថ្លែងថា៖ «តុលាការខេត្តផ្តន្ទាទោសជនជាប់ចោទត្រឹមត្រូវតាមច្បាប់ហើយ ហើយខ្ញុំសូមក្រុមប្រឹក្សាពិនិត្យ និងពិចារណា»។
លោក នូ ចន្ថា មេធាវី ការពារសិទ្ធិឲ្យជនជាប់ចោទសន្និដ្ឋានថា កូនក្តីរបស់លោកបានទទួលស្គាល់ថា គាត់ពិតជាពាក់ព័ន្ធការស្លាប់របស់ជនរងគ្រោះមែន តែគាត់មិនមែនជាអ្នកដៃដល់ទេ។ ឈ្មោះ សុខ ចាន់ ជាជនដៃដល់ហើយកូនក្តីរបស់លោក បើពិនិត្យមើលលក្ខណសម្បត្តិឃើញថា ទើបរៀនថ្នាក់ទី ២ ប៉ុណ្ណោះ និងពុំមានភ័ស្តុតាងណាច្បាស់លាស់ ដែលថាកូនក្តីលោកសម្លាប់ជនរងគ្រោះទេ។
លោកបន្ថែមថា៖ «បើគាត់មានគំនុំជាមួយជនរងគ្រោះ គាត់មិនមែនយកទ្រព្យសម្បត្តិទេ។ ខ្ញុំសូមក្រុមប្រឹក្សាជំនុំជម្រះកែបទចោទមកជាបទលួចមានស្ថានទម្ងន់ទោសធ្វើឲ្យមរណភាពជនរងគ្រោះវិញ»។
ក្រោយជំនុំជម្រះលោកចៅក្រម ស៊ិន វិសាល ប្រធានក្រុមប្រឹក្សាជំនុំជម្រះ ថ្លែងថា សាលដីកានេះប្រកាសនៅថ្ងៃទី ២៩ ខែមីនា៕