ភ្នំពេញៈ ស្នងការនគរបាលរាជធានីភ្នំពេញ លោក ស ថេត បញ្ជាក់ថា សមត្ថកិច្ចកំពុងតាមស្រាវជ្រាវចាប់ខ្លួនជនជាប់ចោទចំនួន ២ នាក់ ក្នុងចំណោម ៣ នាក់ ដែលបានធាក់ទ្វារឡានសមត្ថកិច្ចរត់គេចខ្លួននៅត្រង់ចំណុចស្ពានអាកាសស្ទឹងមានជ័យ ខណៈសមត្ថកិច្ចកំពុងដឹកយកទៅឃុំខ្លួននៅពន្ធនាគារព្រៃសពីម្សិលមិញ។ ប៉ុន្តែសមត្ថកិច្ចមូលដ្ឋានអះអាងថា ជនជាប់ចោទនោះត្រូវបានចាប់ខ្លួនបានវិញហើយ។
លោក ស ថេត ថ្លែងពីម្សិលមិញថាជនជាប់ចោទ ៣ នាក់ ត្រូវបានតុលាការរាជធានីភ្នំពេញសម្រេចចេញដីកាឲ្យបញ្ជូនទៅឃុំខ្លួននៅពន្ធនាគារព្រៃស ពាក់ព័ន្ធករណីប្រើប្រាស់អំពើហិង្សានៅមូលដ្ឋានខណ្ឌ ៧ មករា កាលពីថ្ងៃម្សិលមិញនោះដែរ។ ប៉ុន្ដែនៅពេលសមត្ថកិច្ចដឹកទៅដល់ត្រង់ចំណុចស្ពានអាកាសស្ទឹងមានជ័យ ជនជាប់ចោទទាំង ៣ នាក់នេះ បានធាក់ទ្វារឡានសមត្ថកិច្ចដែលកំពុងដឹកពួកគេនោះរត់គេចខ្លួនបាត់ចំនួន ២ នាក់តែម្ដង។
លោកស្នងការថ្លែងថា៖ «ឥឡូវសមត្ថកិច្ចយើងតាមចាប់មកវិញបានម្នាក់ហើយ ចំណែកអ្នកផ្សេងទៀតសមត្ថកិច្ចយើងកំពុងតែតាមរក។ ជនជាប់ចោទដែលរត់គេចខ្លួន ២ នាក់នោះ គឺជាប់ខ្នោះដៃម្ខាងម្នាក់បានធាក់ទ្វារឡានសមត្ថកិច្ចហើយរត់។ ជនជាប់ចោទទាំង ៣ នាក់នេះ គឺជាប់ចោទពីបទប្រើប្រាស់អំពើហិង្សា (កាប់ចាក់គ្នា) នៅក្នុងមូលដ្ឋានខណ្ឌ៧មករា ហើយតុលាការចេញដីកាឲ្យបញ្ជូនទៅឃុំខ្លួននៅពន្ធនាគារព្រៃស។ ជនទាំង ៣ នេះគឺសុទ្ធតែជាយុវជនទេ»។
លោក នេត ស៊ីថុន អធិការនគរបាលខណ្ឌ៧មករា មិនអាចសុំការបកស្រាយលើករណីនេះបានទេពីម្សិលមិញ ដោយប្រាប់ភ្នំពេញប៉ុស្ដិ៍តាមទូរស័ព្ទថា កំពុងជាប់រវល់។ លោក ក្រេត សការីន អធិការរងនគរបាលខណ្ឌ៧មករា បញ្ជាក់ថា ជនជាប់ចោទដែលធាក់ទ្វារឡានរត់នោះសមត្ថកិច្ចបានតាមឃាត់ខ្លួនបានមកវិញអស់ហើយ។
លោក សការីន ថ្លែងថា៖ «យើងបានស្រាវជ្រាវយកមកវិញបានភ្លាមៗអស់ហើយ។ យកបានទាំង ២ នាក់វិញហើយ។ នៅព្រឹកមិញនេះ (ព្រឹកថ្ងៃអាទិត្យម្សិលមិញ) យើងបានបញ្ជូនទៅពន្ធនាគារព្រៃសវិញអស់ហើយ»។
ម្សិលមិញលោកមិនទាន់អាចបង្ហាញឈ្មោះជនជាប់ចោទដែលរត់គេចខ្លួនខាងលើបានទេ ដោយបញ្ជាក់ថា កំពុងជាប់រវល់។
តាមវីដេអូដែលបណ្ដាញព័ត៌មានក្នុងស្រុកថតផ្សាយផ្ទាល់ក្នុងអំឡុងពេលជនជាប់ចោទរត់គេចខ្លួនកាលពីម្សិលមិញបានបង្ហាញថា ជនជាប់ចោទទាំង ៣ នាក់បានធាក់ទ្វារឡានសមត្ថកិច្ច ហើយលោតចុះពីលើឡាននៅត្រង់គល់ស្ពានអាកាសស្ទឹងមានជ័យរួចលោតចុះពីលើស្ពានគេចខ្លួនបាត់តែម្ដង។
វីដេអូដដែលបានបង្ហាញថា៖ «ពួកគាត់បានធាក់ទ្វាររថយន្តរត់ទាំងដៃជាប់ខ្នោះ លោតពីលើគល់ស្ពានស្ទឹងមានជ័យមានកម្ពស់ប្រហែល ៧ ម៉ែត្របើមើលពីលើស្ពានទៅក្រោម។ រថយន្តសមត្ថកិច្ចដែលដឹកជនជាប់ចោទនេះ គឺជារថយន្តម៉ាក Dx Toyota Camry ជារថយន្តរបស់អធិការដ្ឋាននគរបាលខណ្ឌ៧មករា»៕