ភ្នំពេញៈ ក្នុងសវនាការរបស់តុលាការកំពូលពីម្សិលមិញ ជនជាប់ចោទ ៣ នាក់ក្នុងករណីប្លន់ សុំចៅក្រមបន្ថយទោសក្រោម ៧ ឆ្នាំពាក់ព័ន្ធនឹងការប្លន់លុយ ១៤ លានរៀល និង ២៣០០ ដុល្លារអាមេរិកនៅភូមិ ១២ សង្កាត់-ក្រុង-ខេត្តកំពង់ចាមកាលពីឆ្នាំ ២០១៧ បន្ទាប់ពីសាលាដំបូងខេត្តកំពង់ចាមផ្តន្ទាទោសដាក់ពន្ធនាគារម្នាក់ៗ ៨ ឆ្នាំ ហើយបន្ទាប់មកត្រូវសាលាឧទ្ធរណ៍បន្ថយទោសម្នាក់ៗ ៧ ឆ្នាំវិញនោះ។
ជនជាប់ចោទឈ្មោះ សួង អេង អាយុ ៤៦ ឆ្នាំប្រាប់ចៅក្រមក្នុងបន្ទប់សវនាការ ពីម្សិលមិញថាគាត់បានស្គាល់អ្នកបើករថយន្តតាក់ស៊ីម្នាក់ឈ្មោះ ពៅ សំអឿន អាយុ ៣៥ ឆ្នាំ។ គាត់តែងឲ្យឈ្មោះនេះដឹកគាត់ពីក្រុងកំពង់ចាមទៅកាស៊ីណូត្រពាំងផ្លុង ក្នុងស្រុកពញាក្រែក។ ពេលខ្លះក៏ត្រូវឈ្មោះ ពៅ សំអឿន ណែនាំឲ្យពូរបស់គេឈ្មោះ សុខ ស៊ីនួន អាយុ ៥៧ ឆ្នាំឲ្យបើករថយន្តជូនគាត់មករាជធានីភ្នំពេញ។
លុះដល់ថ្ងៃទី ៥ កុម្ភៈ ឆ្នាំ ២០១៧ សួង អេង និងបក្ខពួក ២ នាក់ទៀត ឈ្មោះ រស្មី និងឈ្មោះ ម៉ៅ បានជិះម៉ូតូ ១ គ្រឿងជាមួយកាំភ្លើងខ្លី ១ ដើមបានភ្ជង់ប្លន់យកថង់លុយពីស្ត្រីរងគ្រោះម្នាក់បានសម្រេច ខណៈជនរងគ្រោះកំពុងជិះម៉ូតូម្នាក់ឯងតាមផ្លូវក្នុងភូមិ-ឃុំកើតហេតុខាងលើរួចគេចខ្លួនចេញពីខេត្តកំពង់ចាម។
ជនជាប់ចោទបន្តថា បន្ទាប់ពីគេចខ្លួនបានប៉ុន្មានថ្ងៃមក គាត់បានយកលុយដែលប្លន់បាននោះចំនួន ២៣០០ ដុល្លារទៅឲ្យឈ្មោះ ពៅ សំអឿន ហើយគាត់ប្រាប់ឈ្មោះ ពៅ សំអឿន ឲ្យយកលុយចំនួន ១ ពាន់ដុល្លារក្នុងលុយ ២៣០០ ដុល្លារនោះឲ្យទៅឈ្មោះ សុខ ស៊ីនួន ដោយប្រាប់ថាជាថ្លៃដឹករូបគាត់ហើយកុំនិយាយប្រាប់អ្នកផ្សេង។
ជនជាប់ចោទ សួង អេង ប្រាប់ចៅក្រមថា៖ «ខ្ញុំពិតជាបានឲ្យលុយឈ្មោះ សុខ ស៊ីនួន និងឈ្មោះ ពៅ សំអឿន មែន។ ប៉ុន្តែខ្ញុំប្តឹងមកតុលាការកំពូលគឺសុំឲ្យតុលាការបន្ថយទោសដល់ខ្ញុំតិចជាង ៧ ឆ្នាំ»។
ដោយឡែកជនជាប់ចោទឈ្មោះ សុខ ស៊ីនួន ប្រាប់ចៅក្រមក្នុងបន្ទប់សវនាការនៅតុលាការកំពូលពីម្សិលមិញដែរថា គាត់ជាអ្នករត់តាក់ស៊ី ហើយគាត់ពិតជាបានទទួលលុយចំនួន ១ ពាន់ដុល្លារពីឈ្មោះ សួង អេង ពិតមែន។ តែគាត់មិនបានចូលរួមក្នុងអំពើប្លន់នោះទេ។
ជនជាប់ចោទប្រាប់ចៅក្រមថា៖ «ខ្ញុំប្តឹងសារទុក្ខមកតុលាការកំពូលពេលនេះគ្រាន់តែសុំឲ្យតុលាការបន្ថយទោសឲ្យនៅក្រោម ៧ ឆ្នាំទៀតព្រោះទណ្ឌកម្មទោស ៧ ឆ្នាំនេះច្រើនណាស់»។
ចំពោះឈ្មោះ ពៅ សំអឿន វិញក៏បាននិយាយក្នុងអង្គសវនាការពីម្សិលមិញដែរថា គាត់ជាអ្នករត់តាក់ស៊ីនៅខេត្តកំពង់ចាមហើយគាត់ធ្លាប់ដឹកឈ្មោះ សួង អេង ជាច្រើនលើកមកហើយ។ ឈ្មោះ សួង អេង រូបនេះបានឲ្យលុយគាត់ចំនួន ២៣០០ ដុល្លារ និងប្រាប់ឲ្យគាត់ដកលុយ ១ ពាន់ដុល្លារពីចំនួនលុយ ២៣០០ ដុល្លារនេះទៅឲ្យឈ្មោះ សុខ ស៊ីនួន ពិតប្រាកដមែន។
ពៅ សំអឿន ប្រាប់ចៅក្រមថា៖ «ខ្ញុំមិនបានចូលរួមប្រព្រឹត្តបទល្មើសទេ តែខ្ញុំសុំតុលាការកំពូលបន្ថយទោសដល់ខ្ញុំ ឬបង្វិលសំណុំរឿងខ្ញុំទៅសាលាឧទ្ធរណ៍វិញ»។
តាមកំណត់ហេតុតុលាការបង្ហាញថា ជនជាប់ចោទទាំង ៣ នាក់ត្រូវបានសមត្ថកិច្ចតាមចាប់ខ្លួនតាមដីកាហើយសាលាដំបូងខេត្តកំពង់ចាមប្រកាសសាលក្រមនៅថ្ងៃទី ១៣ ខែធ្នូ ឆ្នាំ ២០១៧ ផ្តន្ទាទោសម្នាក់ៗ ៨ ឆ្នាំ។ តែជនជាប់ចោទមិនសុខចិត្តប្តឹងទាស់មកសាលាឧទ្ធរណ៍ហើយត្រូវឧទ្ធរណ៍បន្ថយទោសពី ៨ ឆ្នាំមក ៧ ឆ្នាំក្នុងម្នាក់ៗវិញ។
លោក ជុំ សំបាន តំណាងមហាអយ្យការសន្និដ្ឋានថា យោងតាមអង្គហេតុ និងឆ្លងតាមការស្តាប់ចម្លើយរបស់ក្រុមជនជាប់ចោទលោកយល់ឃើញថា ជនជាប់ចោទកាលពីជំនុំជម្រះនៅសាលាឧទ្ធរណ៍បានសុំតុលាការឲ្យបន្ថយទោសដល់ពួកគេ។ ម្យ៉ាងជនជាប់ចោទទាំង ៣ នាក់ពិតជាមានទំនាក់ទំនងគ្នាក្នុងការប្រព្រឹត្តបទល្មើសមែន។
លោកថ្លែងថា៖ «សាលាឧទ្ធរណ៍បន្ថយទោសពី ៨ ឆ្នាំមក ៧ ឆ្នាំដល់ពួកគេជាការត្រឹមត្រូវហើយ។ ដូច្នេះខ្ញុំសូមតម្កល់សាលដីការបស់សាលាឧទ្ធរណ៍នៅដដែល»។
លោក កៅ សុភ័ក្ត្រា មេធាវីការពារសិទ្ធិឲ្យជនជាប់ចោទទាំង ៣ នាក់សន្និដ្ឋានថាកូនក្តីរបស់លោកឈ្មោះ ពៅ សំអឿន និង ឈ្មោះ សុខ ស៊ីនួន ទទួលស្គាល់ថា ពិតជាបានទទួលលុយពីឈ្មោះ សួង អេង មែន។ ចំណែកឈ្មោះ សួង អេង សារភាព ថាគាត់ពិតជាបានប្រព្រឹត្តបទល្មើស តែឈ្មោះ ពៅ សំអឿន និងឈ្មោះ សុខ ស៊ីនួន មិនបានចូលរួមប្លន់ទេ។
លោកថា៖ «ខ្ញុំសុំតុលាការបន្ថយទោស ឈ្មោះ សួង អេង ហើយ ២ នាក់ទៀតសូមតុលាការកែបទចោទពីលួចមានស្ថានទម្ងន់មកទទួលផលចោរកម្មវិញ»។
ក្រោយជម្រះលោក ឃឹម ប៉ុណ្ណ ប្រធានក្រុមប្រឹក្សាជំនុំជម្រះថ្លែងថា សាលដីកានេះនឹងប្រកាសនៅថ្ងៃទី ១ ខែមិថុនា៕