.jpg)
ភ្នំពេញៈ បុរសជាជនត្រូវចោទម្នាក់នៅថ្ងៃ ២ មិថុនានេះ បានទទូចសុំចៅក្រមតុលាការកំពូលឲ្យដោះលែងខ្លួននៅក្រៅឃុំបណ្តោះអាសន្ន ជុំវិញការចោទប្រកាន់ថាបានយកលុយពីធនាគារកាណាឌីយ៉ា ៦ លានដុល្លារ កាលពីខែមករា ឆ្នាំ ២០២០ ខណៈមេធាវីរបស់គាត់អះអាងថា លុយទាំងនោះបានសងគ្រប់ចំនួនទៅធនាគារវិញអស់ហើយ។
នៅក្នុងបន្ទប់សវនាការរបស់តុលាការកំពូលជនត្រូវចោទ ឈ្មោះ ចាន់ ស៊ីមន្ថា អាយុ ៣៩ ឆ្នាំ បានរៀបរាប់ប្រាប់ចៅក្រមថានៅថ្ងៃទី ១៨ ខែ មករា ឆ្នាំ ២០២០ គាត់ត្រូវបានប្រពន្ធឈ្មោះ ទៀង វឌ្ឍននារីរតន៍ ដែលជាបុគ្គលិកធនាគារកាណាឌីយ៉ាហៅឲ្យទៅធនាគារដើម្បីយកអីវ៉ាន់។ ពេលទៅដល់ធនាគារគាត់បានយកថង់ពណ៌ខ្មៅដាក់ចូលក្នុងរថយន្តហើយបើកទៅផ្ទះតែគាត់មិនបានដឹងថាក្នុងថង់នោះជាលុយដុល្លារទេ។
លោក ចាន់ ស៊ីមន្ថា បន្តថា លុះស្អែកឡើងគាត់និងប្រពន្ធបានចេញទៅកម្សាន្តនៅក្រៅប្រទេសប្រមាណជា ១០ ថ្ងៃ ទើបត្រឡប់មកកម្ពុជាវិញ ក៏ត្រូវសមត្ថកិច្ចឃាត់ខ្លួនទាំង ២ នាក់ បញ្ជូនទៅសាលាដំបូងរាជធានីភ្នំពេញ។
ជនត្រូវចោទបន្តថាសំណុំរឿងនេះត្រូវបានតំណាងអយ្យការចោទប្រកាន់គាត់ពីបទសមគំនិតក្នុងអំពើរំលោភលើទំនុកចិត្ត ខណៈប្រពន្ធរបស់គាត់ក៏ត្រូវតុលាការចោទដែរហើយបានបង្គាប់ឲ្យសមត្ថកិច្ចបញ្ជូនទៅឃុំនៅពន្ធនាគារព្រៃស។ ដោយមិនសុខចិត្តនឹងការឃុំខ្លួននេះ ពួកគាត់បានប្តឹងទាស់មកសាលាឧទ្ធរណ៍តែត្រូវសាលាឧទ្ធរណ៍ប្រកាសសាលដីកានៅថ្ងៃទី ២១ ខែ មេសា ឆ្នាំ ២០២០ ដោយសម្រេចតម្កល់សាលក្រមសាលាដំបូងរាជធានីភ្នំពេញមិនឲ្យនៅក្រៅឃុំដដែល។
លោក ចាន់ ស៊ីមន្ថា សំណូមពរចៅក្រមតុលាការកំពូលថា៖ «ខ្ញុំសូមតុលាការអនុញ្ញាតឲ្យខ្ញុំបាននៅក្រៅឃុំផង ដើម្បីបានចេញទៅមើលថែឪពុកចាស់ជរាហើយខ្ញុំមានកូនតូចៗម្នាក់អាយុ ៣ ឆ្នាំ និងអាយុ ៥ ឆ្នាំ គ្មានអ្នកថែទាំពួកគេទេ»។
លោក ធុយ សុគន្ធ ជាមេធាវីការពារសិទ្ធិក្នុងចំណោមមេធាវីម្នាក់ទៀតគឺលោក គិន វិបុល បានថ្លែងថា កូនក្តីរបស់លោក ឈ្មោះ ចាន់ ស៊ីមន្ថា ដែលជាអនុប្រធាននាយកដ្ឋាននៃក្រសួងមុខងារសាធារណៈកាលពីថ្ងៃទី ១៨ ខែ មករាឆ្នាំ ២០២០ ត្រូវបានប្រពន្ធរបស់គាត់ប្រាប់ឲ្យទៅធនាគារកាណាឌីយ៉ាដើម្បីយកថង់ខ្មៅចំនួន៣ហើយកូនក្ដីលោកបានយកថង់នោះទៅដាក់ក្នុងរថយន្តនិងបើកទៅផ្ទះ។ពេលដល់ផ្ទះកូនក្តីលោកបានចតរថយន្តចោលដោយមិនបានយកថង់នោះចេញពីរថយន្តទេ។
នៅក្នុងថង់នោះមានលុយ ៦ លានដុល្លារ ដែលអតិថិជនយកទៅផ្ញើនៅធនាគារហើយបន្ទាប់មកប្រពន្ធរបស់គាត់បានផ្ញើសារទៅខាងអគ្គនាយកដ្ឋានពន្ធដារ ដើម្បីបញ្ជាក់ប្រាប់ពីចំនួនទឹកប្រាក់ដែលត្រូវបង់ពន្ធ។ ប៉ុន្តែបន្ទាប់ពីផ្ញើសារមក ប្រពន្ធរបស់គាត់មិនបានទូទាត់បង់ពន្ធទេ មុនពេលចេញទៅក្រៅប្រទេស។
លោកបន្តថា លុះប៉ុន្មានថ្ងៃក្រោយមកខាងពន្ធដារបានទាក់ទងមកធនាគារកាណាឌីយ៉ា ព្រោះឃើញតែសារមិនឃើញលុយបង់ពន្ធ។ លុះបន្ទាប់មកខាងធនាគារស្រាវជ្រាវទៅទើបដឹងថាប្រពន្ធរបស់កូនក្តីលោកយកប៉ុន្តែលុយទាំងនោះកូនក្តីលោកបានបង្វិលសងទៅធនាគារគ្រប់ចំនួនអស់ហើយ។ ប្រពន្ធរបស់កូនក្តីលោកយកលុយចេញពីធនាគារនេះ គឺបំណងដូរយកលុយខ្មែរដើម្បីបានចំណេញក្បាលកាក់តែប៉ុណ្ណោះគ្មានបំណងលួចលុយនោះទេ។
លោកមេធាវីបញ្ជាក់ថា៖ «ខ្ញុំស្នើសុំតុលាការពិចារណាដោះលែងកូនក្តីនៅក្រៅឃុំខ្ញុំផង ព្រោះគាត់សន្យាថានឹងអនុវត្តតាមតុលាការព្រោះគាត់មានកូនតូចៗគ្មានអ្នកថែរក្សា»។
ដោយឡែកលោកមេធាវីមួយរូបតំណាងឲ្យភាគីធនាគារកាណាឌីយ៉ាបានថ្លែងថា ប្រាក់ទាំងអស់លោកទទួលស្គាល់ថាជនត្រូវចោទបានបង្វិលសងទៅធានាគារហើយ។ ក៏ប៉ុន្តែលោកបានស្នើឲ្យតម្កល់សាលដីការបស់សាលាឧទ្ធរណ៍នៅដដែល។
លោក អ៊ុក គឹមសិទ្ធិ តំណាងមហាអយ្យការសន្និដ្ឋានថា ជនត្រូវចោទបានសងលុយគ្រប់ចំនួនទៅខាងធនាគារវិញអស់ហើយ ដូច្នេះគ្មានការខូចខាតអ្វីចំពោះធនាគារទេ។ យ៉ាងណាក្ដីលោកទុកសិទ្ធិដល់ក្រុមប្រឹក្សាជំនុំជម្រះ ដើម្បីពិចារណាពីករណីនេះ។
ក្រោយជំនុំជម្រះមក លោក យូ យុត្ថារ៉ា ប្រធានក្រុមប្រឹក្សាជំនុំជម្រះថ្លែងថាសាលដីកានៃសំណុំរឿងនេះនឹងប្រកាសនៅថ្ងៃទី ៤ ខែមិថុនា ៕
