.jpg)
សុវណ្ណ រិទ្ធី អគ្គនាយកព័ត៌មាន TVFB ដែលបានផ្សព្វផ្សាយព័ត៌មានរិះគន់ ជុំវិញវិធានការរបស់រាជរដ្ឋាភិបាលក្នុងការទប់ស្កាត់ជំងឺ COVID-19។ រូបថត នគរបាល
សៀមរាប/ភ្នំពេញៈ ជនបង្ហោះសារគំរាមសម្លាប់ថ្នាក់ដឹកនាំ និងជេរប្រមាថអង្គព្រះមហាក្សត្រតាមបណ្ដាញសង្គមត្រូវបានតុលាការខេត្តសៀមរាបសម្រេចឃុំខ្លួន ខណៈលោក សុវណ្ណ រិទ្ធី អគ្គនាយកព័ត៌មាន TVFB ដែលបានផ្សព្វផ្សាយព័ត៌មានរិះគន់ ជុំវិញវិធានការរបស់រាជរដ្ឋាភិបាលក្នុងការទប់ស្កាត់ជំងឺ COVID-19 ក៏ត្រូវបានតុលាការសម្រេចឃុំខ្លួនផងដែរកាលពីម្សិលមិញ។
លោក យិន ស្រាង អ្នកនាំពាក្យសាលាដំបូងខេត្តសៀមរាបបានប្រាប់ភ្នំពេញប៉ុស្តិ៍ ថាជនសង្ស័យឈ្មោះ អាត់ អេង អាយុ ៣៦ ឆ្នាំ មានមុខរបរជាងភ្លើងត្រូវបានកម្លាំងសមត្ថកិច្ចចាប់ខ្លួនកាលពីថ្ងៃទី ៧ ខែ មេសា ឆ្នាំ ២០២០ បន្ទាប់ពីបានបង្ហោះសារ និងរូបភាព «គំរាមសម្លាប់ថ្នាក់ដឹកនាំ និង ជេរប្រមាថអង្គព្រះមហាក្សត្រ» ។
លោកថា៖ «ក្រោយបញ្ចប់ការសាកសួរ លោក ស៊ាង ណារ៉ា ចៅក្រមស៊ើបសួរបានបញ្ជាឲ្យកម្លាំងនគរបាលយុត្តិធម៌នាំយកជនសង្ស័យទៅឃុំខ្លួនក្នុងពន្ធនាគារខេត្តជាបណ្ដោះអាសន្នដោយចោទប្រកាន់ពីបទញុះញង់បង្កឲ្យមានការប្រព្រឹត្តបទឧក្រិដ្ឋជាអាទិ៍, ជេរប្រមាថជាសាធារណៈ និងបទគំរាមកំហែងថានឹងសម្លាប់តាមមាត្រា ៤៩៦, មាត្រា ៣០៧ និងមាត្រា ២៣៣ នៃក្រមព្រហ្មទណ្ឌ»។
យោងតាមបទចោទប្រកាន់ទាំង ៣ នេះជនសង្ស័យអាចនឹងប្រឈមការផ្ដន្ទាទោសជាប់ពន្ធនាគារពី ១៨ ខែទៅ ៥ ឆ្នាំ និង ពិន័យជាប្រាក់ ពី ៣,១ លានរៀលទៅ ២៦ លានរៀលជាប្រាក់ពី ១ សែនទៅ ១០ លានរៀល។ ចំណែកបទ «គំរាមកំហែងថានឹងសម្លាប់តាមមាត្រា ២៣៣ នៃក្រមព្រហ្មទណ្ឌ» ជនសង្ស័យនឹងត្រូវប្រឈមការផ្តន្ទាទោសជាប់ពន្ធនាគារពី ៦ ខែទៅ ២ ឆ្នាំ និងពិន័យជាប្រាក់ពី ១ លានរៀលទៅ ១០ លានរៀល។
ចំណែកលោក សុវណ្ណ រិទ្ធី អគ្គនាយកព័ត៌មាន TVFB ក៏ត្រូវបានសាលាដំបូងរាជធានីភ្នំពេញសម្រេចឲ្យនាំយកទៅឃុំខ្លួននៅពន្ធនាគាររាជធានីភ្នំពេញ (PJ) ជាបណ្ដោះអាសន្នផងដែរកាលពីរសៀលថ្ងៃព្រហស្បតិ៍ម្សិលមិញ។ លោក សុវណ្ណ រិទ្ធី ត្រូវបានកម្លាំងនគរបាលផែនសន្តិសុខនៃស្នងការដ្ឋាននគរបាលរាជធានីភ្នំពេញចាប់ឃាត់ខ្លួនកាលពីយប់ថ្ងៃទី ៧ ខែ មេសា ឆ្នាំ ២០២០ ពាក់ព័ន្ធករណីផ្សព្វផ្សាយព័ត៌មានរិះគន់ដែលមានចរិតញុះញង់បង្កឲ្យមានផលប៉ះពាល់ដល់សន្តិសុខ សណ្តាប់ធ្នាប់ និងសុវត្ថិភាពសង្គមជុំវិញវិធានការរបស់រាជរដ្ឋាភិបាលក្នុងការទប់ស្កាត់ជំងឺ COVID-19។
លោក គុជ គឹមឡុង អ្នកនាំពាក្យអយ្យការអមសាលាដំបូងរាជធានីភ្នំពេញ ថ្លែងថា ក្រោយបញ្ចប់ការស៊ើបសួរតំណាងអយ្យការលោក ប្លង់ សុផល បានសម្រេចចោទប្រកាន់លោក រិទ្ធី ពីបទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍តាមបញ្ញត្តិមាត្រា ៤៩៤ និង ៤៩៥ នៃក្រមព្រហ្មទណ្ឌ» ហើយត្រូវបានលោក កី ម៉ានេរ៉ា ចៅក្រមស៊ើបសួរសម្រេចឲ្យនាំយកទៅឃុំខ្លួន។ តាមមាត្រា ៤៩៥ នៃក្រមព្រហ្មទណ្ឌជនត្រូវចោទ រិទ្ធី នឹងត្រូវប្រឈមការផ្ដន្ទាទោសជាប់ពន្ធនាគារពី ៦ ខែទៅ ២ ឆ្នាំ និងពិន័យជាប្រាក់ពី ១ លានរៀល ទៅ ១០ លានរៀល។
នៅមុនពេលសមត្ថកិច្ចនាំយកទៅឃុំខ្លួននៅពន្ធនាគារលោក រិទ្ធី បាននិយាយផ្ដាំផ្ញើដល់មិត្តភក្ដិដែលជាអ្នកសារព័ត៌មានយ៉ាងខ្លីថា៖ «សូមជួយមើលថែប្រពន្ធ និងកូនខ្ញុំផង»។ ការផ្ដាំផ្ញើនេះបានធ្វើឲ្យលោក សុវណ្ណ សុខា ដែលជាឪពុកបង្កើតបានចេញឃ្លីបវីដេអូ ១ ស្នើសូមក្ដីសណ្ដោសប្រណីពីថ្នាក់ដឹកនាំគ្រប់ជាន់ថ្នាក់ដោយលោកនិយាយថា៖ «កំហុសឆ្គងរបស់កូនប្រុសខ្ញុំ គឺជាកំហុសរបស់ខ្ញុំ ដែលជាឪពុកមិនបានអប់រំប្រដៅកូនឲ្យបានគ្រប់ជ្រុងជ្រោយ។ កូនប្រុសខ្ញុំគឺត្រូវទទួលខុសត្រូវចំពោះមុខច្បាប់នូវអ្វីដែលគេបានធ្វើខុស ហើយខ្ញុំពេញចិត្តចំពោះចំណាត់ការផ្លូវច្បាប់ ប៉ុន្តែខ្ញុំសូមថ្នាក់ដឹកនាំគ្រប់ជាន់ថ្នាក់ មេត្តាសណ្ដោសប្រណីដល់កូនប្រុសខ្ញុំផង។ ខ្ញុំសន្យាថានឹងខិតខំអប់រំប្រៀនប្រដៅគេ មិនឲ្យកើតមានកំហុសបែបនេះទៀតឡើយ»៕
