.jpg)
អ្នកដំណើរត្រូវបានវាស់កម្ដៅ ពេលមកដល់ព្រលានយន្តហោះអន្តរជាតិភ្នំពេញ។ ហេង ជីវ័ន
ភ្នំពេញៈ ក្រសួងសុខាភិបាលបានប្រកាសកាលពីម្សិលមិញអំពីការសម្រេចកែសម្រួលវិធានការមួយចំនួនចំពោះអ្នកដំណើរដែលជាមន្ត្រីការទូត និងមន្ត្រីអង្គការអន្តរជាតិកាន់ទិដ្ឋាការប្រភេទ A និងប្រភេទ B ត្រូវធ្វើដំណើរមកកាន់កម្ពុជាក្នុងអំឡុងជំងឺកូវីដ ១៩ ដោយអ្នកដំណើរទាំង ២ ប្រភេទនេះត្រូវលើកលែងចំពោះការបង់ថ្លៃសេវាធ្វើតេស្ដរកជំងឺកូវីដលើកទី ១ និងលើកទី ២។
លិខិតរបស់លោក ម៉ម ប៊ុនហេង រដ្ឋមន្ត្រីក្រសួងសុខាភិបាលចុះថ្ងៃទី ៥ សីហា បញ្ជាក់ថា ការលើកលែងនេះ គឺជាការឈរលើគោលការណ៍មនុស្សធម៌ លើកកម្ពស់កិច្ចសហប្រតិបត្តិការ និងទំនាក់ទំនងល្អជាមួយប្រទេសជាមិត្ត និងផ្អែកលើកត្តាសត្យានុម័ត ដែលចំនួនអ្នកកាន់ទិដ្ឋាការការទូតប្រភេទ A និងទិដ្ឋាការផ្លូវការប្រភេទ B ពុំមានចំនួនច្រើនលើសលប់។ អ្នកដំណើរជនបរទេសម្នាក់ត្រូវចំណាយ ១០៥ ដុល្លារ សម្រាប់ការធ្វើតេស្ដលើកទី ១ រកជំងឺកូវីដ ១៩ និងសម្រាប់ថ្លៃសេវាដឹកជញ្ជូនពីព្រលានយន្តហោះទៅកាន់សណ្ឋាគារសា្នក់នៅហើយលទ្ធផលនៃការធ្វើតេស្ដលើកទី ១ នឹងទទួលបានលទ្ធផលយ៉ាងតិច ២៤ ម៉ោង។
លិខិតរបស់លោក ម៉ម ប៊ុនហេង ដដែលបន្តថា ក្នុងករណីអ្នកដំណើរជនបរទេសទាំង ២ ប្រភេទនេះត្រូវបានរកឃើញមានផ្ទុកជំងឺកូវីដ ១៩ គឺត្រូវបញ្ជូនទៅព្យាបាលនៅមន្ទីរពេទ្យរ៉ូយ៉ាល់ភ្នំពេញ ឬមន្ទីរពេទ្យផ្សេងទៀតតាមការឯកភាពរបស់ក្រសួងហើយរាល់ការចំណាយថ្លៃព្យាបាល គឺជាបន្ទុករបស់បុគ្គលផ្ទាល់ ឬស្ថានទូត និងអង្គការអន្តរជាតិ។ កាលពីថ្ងៃទី ៤ កក្កដា ក្រសួងសុខាភិបាលក៏បានសម្រេចកែសម្រួលវិធានការចំពោះអ្នកដំណើរជនបរទេស ដែលជាវិនិយោគិន ធុរជន បុគ្គលិកក្រុមហ៊ុន អ្នកជំនាញការ កម្មករជំនាញអ្នកបច្ចេកទេស និងក្រុមគ្រួសារគឺឱ្យពួកគេតម្កល់ប្រាក់ចុះពី ៣ ពាន់ដុល្លារមកនៅត្រឹម ២ ពាន់ដុល្លារដែលប្រាក់ទាំងនោះសម្រាប់ចំណាយលើថ្លៃស្នាក់នៅ ក្នុងអំឡុងពេលរង់ចាំការធ្វើតេស្ដជំងឺកូវីដ១៩ ថ្លៃដឹកជញ្ជូនពីអាកាសយានដ្ឋានទៅសណ្ឋាគារ និងចំណាយអំឡុងពេលធ្វើចត្តាឡីស័ក។
កាលពីថ្ងៃម្សិលមិញ ក្រសួងសុខាភិបាលបានរាយការណ៍ថា អ្នកជាសះស្បើយពីជំងឺកូវីដ ១៩ មានចំនួន ២ នាក់ និងមានករណីកូវីដថ្មីចំនួន ២ នាក់ ដែលជាបុរសជនជាតិខ្មែរធ្វើដំណើរមកពីប្រទេសប៉ាគីស្ថាន ហើយតជើងហោះហើរនៅប្រទេសម៉ាឡេស៊ី និងម្នាក់ទៀតជាស្ដ្រីជនជាតិកាហ្សាក់ស្ថាន ដែលបានធ្វើដំណើរមកពីប្រទេសកាហ្សាក់ស្ថាន តជើងហោះហើរនៅប្រទេសកូរ៉េខាងត្បូង។
គិតត្រឹមថ្ងៃម្សិលមិញ កម្ពុជាបានរកឃើញអ្នកឆ្លងជំងឺកូវីដ ១៩ សរុបចំនួន ២៤៣ នាក់ ក្នុងនោះត្រូវបានព្យាបាលជាសះស្បើយចំនួន ២០២ នាក់ និងកំពុងសម្រាកព្យាបាលនៅមន្ទីរពេទ្យចំនួន ៤១ នាក់៕
