ភ្នំពេញ៖ កម្លាំងនៃស្នងការដ្ឋាននគរបាលខេត្តកំពត បានចាប់ខ្លួនជនជាតិចិន ២ នាក់ និងជនជាតិអាល្លឺម៉ង់ម្នាក់ បន្ទាប់ពីពួកគេបានបំពានសេចក្ដីណែនាំរបស់រាជរដ្ឋាភិបាលក្នុងការបិទខ្ទប់មិនឲ្យមានការធ្វើចរាចរណ៍ និងពិសារគ្រឿងស្រវឹង ដើម្បីចូលរួមទប់ស្កាត់ការឆ្លងរីករាលដាលនៃជំងឺកូវីដ ១៩ ហើយពួកគេនឹងត្រូវបញ្ចូនទៅតុលាការនៅថ្ងៃស្អែក។
លោក ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានប្រាប់ ភ្នំពេញ ប៉ុស្តិ៍ នៅរសៀលថ្ងៃនេះថា ជនជាតិចិនចំនួន ០២ នាក់ ដែលត្រូវបានចាប់ខ្លួនកាលពីថ្ងៃទី ១៤ មេសា គឺមានឈ្មោះ LI CHANGQING កាន់លិខិតឆ្លងដែនលេខ EC7645585 និងទី២ ឈ្មោះ WANG YOUZHI កាន់លិខិតឆ្លងដែនលេខ EE771775018។ ពួកគេត្រូវបានឃាត់ខ្លួននៅពេលពួកគេបានធ្វើដំណើរមកពីភ្នំពេញ ហើយបានព្យាយាមឆ្លងកាត់ខេត្តកំពតទៅខេត្តព្រះសីហនុ ដោយបន្លំបើករថយន្ដសង្គ្រោះបន្ទាន់។
លោកបន្តថា ចំណែកមួយករណីទៀត គឺជាជនជាតិអាល្លឺម៉ង់ មិនស្គាល់ឈ្មោះ អាយុ ៣៦ ឆ្នាំ ដែលបើកអាជីវកម្មកម្សាន្តនៅក្នុងខេត្តកំពត។ ជននេះ ត្រូវបានចាប់ខ្លួននៅថ្ងៃទី ១៨ ខែមេសា បន្ទាប់ពីបានផឹកស៊ី ហើយបង្ហោះលើបណ្តាញសង្គម ដែលមានលក្ខណៈផ្គើននឹងបម្រាម។
លោកបញ្ជាក់ថា៖ «ជនបរទេសទាំងនេះ គឺយើងនឹងចោទប្រកាន់ពីបទល្មើសបម្រាមគោចររបស់រដ្ឋាភិបាល ដែលជនជាតិបរទេសទាំងនេះ បានបន្លំឡានសង្រ្គោះបន្ទាន់ បើកឆ្លងកាត់ខេត្ត ចំណែកជនជាតិអាល្លឺម៉ង់ គាត់បានផឹកគ្រឿងស្រវឹងបង្ហោះនៅលើបណ្តាញសង្គម ដែលមានលក្ខណៈផ្គើននឹងបម្រាមគោចរ»។
បើតាមលោក ម៉ៅ ច័នមធុរិទ្ធ ពួកគេទាំង ៣ នាក់ នឹងត្រូវបញ្ចូនទៅតុលាការ ដើម្បីចាត់ការតាមនីតិវិធីនៅថ្ងៃចន្ទស្អែកនេះ ក្រោយពីពួកគេ ត្រូវបានយកសំណាកទៅពិនិត្យ ដើម្បីស្វែងរកជំងឺកូវីដ ១៩៕