ព្រះសីហនុៈ ក្រុមជនសង្ស័យបរទេស ៤ នាក់ រួមមានជនជាតិចិន ប្រុសស្រី ៣ នាក់ និងស្ត្រីជនជាតិវៀតណាមម្នាក់ ត្រូវបាននគរបាលខេត្តព្រះសីហនុកសាងសំណុំរឿងបញ្ជូនទៅសាលាដំបូងខេត្តព្រះសីហនុកាលពីថ្ងៃម្សិលមិញបន្ទាប់ពីឃាត់ខ្លួននៅថ្ងៃទី ៨ ខែមីនា ដោយបានលាក់កញ្ចប់គ្រឿងញៀនក្នុងនំយកទៅឱ្យគ្នាគេក្នុងមណ្ឌលចត្តាឡីស័កក្នុងខេត្តព្រះសីហនុ។
លោក ជួន ណារិន្ទ ស្នងការនគរបាលខេត្តព្រះសីហនុប្រាប់ ភ្នំពេញ ប៉ុស្តិ៍ ពីម្សិលមិញថា ជនសង្ស័យជាជនជាតិចិនមានឈ្មោះ ZOU WUQI អាយុ ៣២ ឆ្នាំឈ្មោះ LIU HUA ភេទស្រី អាយុ ២២ ឆ្នាំឈ្មោះ Gao Yahong ភេទប្រុស អាយុ ២៩ ឆ្នាំ អ្នកទាំង ៣ នាក់គ្មានមុខរបរពិតប្រាកដ។ ចំណែកស្ត្រីជនជាតិវៀតណាមឈ្មោះ HOANG THI MANH អាយុ ២៨ ឆ្នាំមុខរបរលក់អីវ៉ាន់តាមអនឡាញ។
លោកថ្លែងថា៖ «ជនទាំង ៤ នាក់ ត្រូវបានសមត្ថកិច្ចកសាងសំណុំរឿងបញ្ជូនបន្តទៅតុលាការខេត្តព្រះសីហនុហើយដើម្បីតុលាការចាត់ការបន្តតាមនីតិវិធីច្បាប់»។
លោកស្នងការបានឱ្យដឹងថាអំពើជួញដូរគ្រឿងញៀនរបស់ជនសង្ស័យប្រុសស្រីទាំង ៤ នាក់ គឺបានធ្វើឡើងក្រោយឃាត់ជនសង្ស័យឈ្មោះ ម៉ាន់ ទីណូ ភេទប្រុស អាយុ ២៧ ឆ្នាំ ជនជាតិខ្មែរមុខរបររត់តាក់ស៊ីបានយកអីវ៉ាន់ទៅផ្ញើឱ្យអ្នកធ្វើចត្តាឡីស័កដោយបង្កប់គ្រឿងញៀននៅក្នុងក្នុងថង់នំមានម្សៅក្រាមពណ៌សថ្លាសង្ស័យជាសារធាតុញៀន ១ កញ្ចប់។
បន្ទាប់ពីសមត្ថកិច្ចសាកសួរ បុរសនោះបានឆ្លើយថា គាត់មិនបានដឹងថានៅក្នុងថង់នំនោះមានបង្កប់គ្រឿងញៀនទេ បន្ទាប់ពីសាកសួរចប់ បុរសម្នាក់នោះបានសហការ បន្តនាំសមត្ថកិច្ចទៅឃាត់ជនសង្ស័យបានជាបន្តបន្ទាប់។ ចំពោះវត្ថុតាងដែលសមត្ថកិច្ចដកហូតបានមានម្សៅក្រាមពណ៌សថ្លាសង្ស័យជាសារធាតុញៀនចំនួន ៨ កញ្ចប់, ថ្នាំគ្រាប់ពណ៌ក្រហមសញ្ញា (WY) ចំនួន ២ គ្រាប់, លិខិតឆ្លងដែនចំនួន ២ ក្បាលជាកម្មសិទ្ធិជនសង្ស័យទាំង ២ នាក់, ទូរស័ព្ទដៃចំនួន ៤ គ្រឿង, លុយយន់ចំនួន ៧១ យន់ និងសម្ភារវេចខ្ចប់មួយចំនួន។
ចំណែកស្ត្រីសង្ស័យម្នាក់ដែលជាម្ចាស់នំនោះសមត្ថកិច្ចដកហូតបានវត្ថុតាងមានម្សៅក្រាមពណ៌សថ្លាសង្ស័យជាសារធាតុញៀនចំនួន ៤ កញ្ចប់, ថ្នាំញៀនមេតំហ្វេតាមីន (WY) ចំនួន ៥ គ្រាប់, ទូរស័ព្ទដៃម៉ាក iPhone8 ពណ៌ខ្មៅ ១ គ្រឿង លិខិតឆ្លងដែន ១ ក្បាលជារបស់ជនសង្ស័យ៕