.jpg)
ជនសង្ស័យជួញគ្រឿងញៀនត្រូវបានចាប់ខ្លួនថ្ងៃទី ១៨ តុលានៅខេត្តស្ទឹងត្រែង។រូប ប៉ូលិស
ស្ទឹងត្រែងៈ ជនសង្ស័យប្រុសស្រី ២ នាក់ កំពុងត្រូវបានព្រះរាជអាជ្ញាខេត្តស្ទឹងត្រែង សាកសួរករណីជួញដូរគ្រឿងញៀន ៤ កញ្ចប់ធំស្មើនឹងជិត ៤ គីឡូក្រាម បន្ទាប់ពីនគរបាលខេត្តឃាត់ខ្លួនកាលពីថ្ងៃទី ១៧-១៨ តុលានៅសង្កាត់ស្រះឫស្សី ក្រុងស្ទឹងត្រែង ខណៈពួកគេកំពុងចែកចាយគ្រឿងញៀន។ ជាមួយគ្នានេះអគ្គស្នងការដ្ឋាននគរបាលជាតិក៏បានបង្ហាញពីការចាប់ខ្លួនមនុស្ស ២៣ នាក់ពាក់ព័ន្ធគ្រឿងញៀនផងដែរ។
លោក ឈុំ ស៊ាងហាក់ អ្នកនាំពាក្យសាលាដំបូងខេត្តស្ទឹងត្រែងថ្លែងពីម្សិលមិញថា ជនសង្ស័យឈ្មោះ អ៊ិន ថា ភេទស្រី អាយុ ៤៧ ឆ្នាំ និងឈ្មោះ វ៉ាន ភូរ ភេទប្រុស អាយុ ២៧ ឆ្នាំ កំពុងត្រូវបានព្រះរាជអាជ្ញានៃសាលាដំបូងខេត្តសាកសួរតាមនីតិវិធីដោយមិនទាន់សម្រេចយ៉ាងណានោះទេ។
លោកថា៖ «យើងបានបញ្ជូនសំណុំរឿងហ្នឹងដល់ដៃព្រះរាជអាជ្ញាហើយ។ ព្រះរាជអាជ្ញាកំពុងធ្វើការសាកសួរមិនទាន់បានចោទប្រកាន់ទេ។ ខ្ញុំគិតថា ប្រហែលជានៅថ្ងៃទី ២០ ខែតុលា អាចនឹងសម្រេចចោទប្រកាន់ ឬសម្រេចជាផ្លូវការហើយ។ ប៉ុន្ដែចំពោះនៅថ្ងៃទី ១៩ ខែតុលានេះ គឺគ្រាន់តែធ្វើការសាកសួរសិន ព្រោះថ្ងៃនេះ [ថ្ងៃទី ១៩] ពេលវេលាខ្លីពេក»។
នាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តស្ទឹងត្រែងលោក ចែម ផានិត ថ្លែងម្សិលមិញថា សមត្ថកិច្ចបានបញ្ជូនជនសង្ស័យ ២ នាក់ទៅសាលាដំបូងខេត្តស្ទឹងត្រែងនៅថ្ងៃទី ១៩ តុលាឱ្យតុលាការចាត់តាមនីតិវិធីពាក់ព័ន្ធគ្រឿងញៀនចំនួនជិត ៤ គីឡូក្រាមប្រភេទមេតំហ្វេតាមីន និងថ្នាំគ្រវីចំនួន ២ ថង់តូចទៀត។
បើតាមមន្ត្រីរូបនេះជនសង្ស័យដែលសមត្ថកិច្ចឃាត់ខ្លួនបាននោះជាបងប្អូនជីដូនមួយនឹងគ្នារស់នៅសង្កាត់ស្រះឫស្សី ក្រុងស្ទឹងត្រែង។
លោក ចែម ផានិត បញ្ជាក់ថា៖ «ក្រោយពីបានសាកសួរជនសង្ស័យទាំង ២ នាក់យើងកំពុងធ្វើការស្រាវជ្រាវរកជនសង្ស័យពាក់ព័ន្ធបន្ថែមទៀត ប៉ុន្ដែអ្នកពាក់ព័ន្ធធំបំផុតគឺនៅប្រទេសឡាវ អ៊ីចឹងយើងពិបាកតាមចាប់ពួកគេ។ យើងអាចនឹងស្នើសុំខាងភាគីឡាវជួយសហការ ដើម្បីចាប់កាត់ផ្ដាច់បណ្ដាញជួញដូរ គ្រឿងញៀនឆ្លងដែនមកកម្ពុជា»។
តាមរបាយការណ៍របស់ស្នងការដ្ឋាននគរបាលខេត្តស្ទឹងត្រែងគឺប្រតិបត្តិការបង្ក្រាបនេះក្រោមការបញ្ជាផ្ទាល់ពីលោក អូត ស៊ីវត្ថា ស្នងការនគរបាលខេត្តស្ទឹងត្រែងដោយមានការសម្របសម្រួលពីអយ្យការអមសាលាដំបូងខេត្តស្ទឹងត្រែង។
កាលពីថ្ងៃទី ១៧ ខែតុលា កម្លាំងសមត្ថកិច្ចបានឃាត់ខ្លួនជនសង្ស័យម្នាក់ឈ្មោះ អ៊ិន ថានៅសង្កាត់ស្រះឫស្សី ក្រុងស្ទឹងត្រែង ខេត្តស្ទឹងត្រែង។ លុះដល់ថ្ងៃទី ១៨ ខែតុលា កម្លាំងសមត្ថកិច្ចក៏បានបន្តស្រាវជ្រាវឈានដល់ឃាត់ខ្លួនជនសង្ស័យម្នាក់ទៀតឈ្មោះ វ៉ាន ភូរ នៅជិតច្រកអន្តរជាតិត្រពាំងក្រៀលជាមួយប្រទេសឡាវដោយដកហូតគ្រឿងញៀនជិត ៤ គីឡូក្រាម និងសម្ភារមួយចំនួនទៀត។
របាយការណ៍របស់អគ្គស្នងការដ្ឋាននគរបាលជាតិពីម្សិលមិញឱ្យដឹងថា ជនសង្ស័យចំនួន ២៣ នាក់ (ស្រីម្នាក់) ត្រូវបានសមត្ថកិច្ចឃាត់ខ្លួនក្នុងប្រតិបត្តិការបង្ក្រាបបទល្មើស គ្រឿងញៀនចំនួន ១៥ ករណីទូទាំងប្រទេសនៅថ្ងៃទី ១៨ តុលា។ ក្នុងចំណោមជនសង្ស័យទាំង ២៣ នាក់ មានមុខសញ្ញាជួញដូរគ្រឿងញៀន ១៣ នាក់ និងប្រើប្រាស់ ១០ នាក់។
របាយការណ៍បន្តថា សមត្ថកិច្ចបានដកហូតវត្ថុតាងនៅថ្ងៃទី ១៨ តុលា រួមមាន មេតំហ្វេតាមីន (ice) ១,៧៤ ក្រាម និង ៤៩ កញ្ចប់តូច កេតាមីន ៩,៤២ ក្រាម។ បទល្មើសដែលបង្ក្រាបបានគឺនៅខេត្តបាត់ដំបង កំពង់ស្ពឺ ក្រចេះ តាកែវ និងរាជធានីភ្នំពេញ៕
